حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم حضرت ضباعہ بنت زبیر کے پاس تشریف لے گئے، اور ان سے فرمایا کہ کیا تو اس سال حج کرنا چاہتی ہے؟ انھوں نے عرض کیا کہ اے اللہ کے رسول (صلی اللہ علیہ وآلہ وسلم)! میں بیمار ہوں، آپ صلی اللہ علیہ وآلہ وسلم نے ارشاد فرمایا کہ تو حج کر اور احرام باندھتے وقت شرط لگا لے، انھوں نے عرض کیا کہ میں کیا کہوں؟ آپ صلی اللہ علیہ وآلہ وسلم نے ارشاد فرمایا کہ یوں کہہ: اے اللہ! میں حاضر ہوں میرے احرام کھولنے کی جگہ وہ ہے جہاں سے تو مجھے محبوس (روک) کر دے۔ [مصنف ابن ابي شيبه/كتاب الحج/حدیث: 15391]

حضرت عبد اللہ فرماتے ہیں کہ جب تم حج کرو تو شرط لگا لو۔ [مصنف ابن ابي شيبه/كتاب الحج/حدیث: 15392]

حضرت ابوبکر بن عبد الرحمن بن حارث عمرہ کرتے وقت شرط لگا لیا کرتے تھے۔ [مصنف ابن ابي شيبه/كتاب الحج/حدیث: 15393]

حسن اور حضرت عطاء اس غلام کے متعلق فرماتے ہیں جس کو اس وقت آزاد کیا جائے جب لوگ عرفات سے چلے جائیں، یا فرمایا کہ بچے کو احتلام ہوجائے (بالغ ہوجائے) یا لڑکی کو حیض آجائے تو یہ سب واپس عرفات کی طرف لوٹیں گے اور طلوع فجر سے پہلے وہاں وقوف کریں گے، تو ان کی طرف سے اسلام کا وہ حج ادا ہوجائے گا جو ان کے ذمہ لازم تھا۔ [مصنف ابن ابي شيبه/كتاب الحج/حدیث: 15394]

حسن فرماتے ہیں کہ اگر ایک آدمی دوسرے کی طرف سے حج کرے اور اس کے پاس (خرچ میں سے) کچھ بچ جائے تو انہیں بتادے اگر وہ اسے دے دیں تو ٹھیک وگرنہ واپس کر دے۔ [مصنف ابن ابي شيبه/كتاب الحج/حدیث: 15395]

حضرت محمد بن عباد بن جعفر فرماتے ہیں کہ میں نے حضرت ابن عباس رضی اللہ عنہما کو دیکھا کہ آپ یوم الترویہ میں تشریف لائے اور حجر اسود کو بوسہ دیا اور اس پر سر رکھ کر سجد ہ کیا، آپ نے یہ عمل تین بار فرمایا۔ [مصنف ابن ابي شيبه/كتاب الحج/حدیث: 15396]

حضرت عکرمہ سے مروی ہے کہ حضرت ابن عباس رضی اللہ عنہما نے حجر اسود پر سر رکھ کر سجدہ فرمایا۔ [مصنف ابن ابي شيبه/كتاب الحج/حدیث: 15397]

حضرت طاؤس سے مروی ہے کہ حضرت عمر نے اس پر سجدہ فرمایا۔ [مصنف ابن ابي شيبه/كتاب الحج/حدیث: 15398]

حضرت عابس بن ربیعہ فرماتے ہیں کہ میں نے حضرت عمر کو دیکھا کہ آپ نے حجر اسود کا استلام کیا اور اس کا بوسہ لیا پھر فرمایا کہ اگر میں نے رسول اکرم (صلی اللہ علیہ وآلہ وسلم) کو نہ دیکھتا ہوتا کہ آپ صلی اللہ علیہ وآلہ وسلم نے اس کا بوسہ لیا تھا تو میں بھی بوسہ نہ لیتا۔ [مصنف ابن ابي شيبه/كتاب الحج/حدیث: 15399]

حضرت طاؤس سے مروی ہے کہ حضرت عمر نے تین بار حجر اسود کا بوسہ لیا اور ہر بوسہ کے ساتھ اس پر سجدہ بھی فرمایا اور فرمایا کہ آپ صلی اللہ علیہ وآلہ وسلم بھی اسی طرح فرماتے تھے۔ [مصنف ابن ابي شيبه/كتاب الحج/حدیث: 15400]