حضرت عطاء فرماتے کہ گونگے اور بچے کی طرف سے تلبیہ پڑھا جائے گا۔ [مصنف ابن ابي شيبه/كتاب الحج/حدیث: 15351]

حضرت حسن اس عورت کے متعلق فرماتے ہیں جو عمرہ کے لیے آئے لیکن اس کو حیض آجائے تو وہ عمرہ پر حج کا احرام باندھے گی اور وہ عرفات کی طرف چلے گی اس حال میں کہ وہ قران کرنے والی ہے۔ [مصنف ابن ابي شيبه/كتاب الحج/حدیث: 15352]

حضرت عطاء سے اسی طرح منقول ہے۔ [مصنف ابن ابي شيبه/كتاب الحج/حدیث: 15353]

حضرت طاؤس سے دریافت کیا گیا کہ کوئی شخص تلبیہ پڑھنے کی نیت کرے اور وہ تکبیر پڑھ لے؟ آپ نے فرمایا کہ اس کے لیے کافی ہوجائے گا۔ [مصنف ابن ابي شيبه/كتاب الحج/حدیث: 15354]

حضرت عطاء فرماتے ہیں کہ وہ (تلبیہ) لوٹائے گا۔ [مصنف ابن ابي شيبه/كتاب الحج/حدیث: 15355]

حضرت عطاء فرماتے ہیں کہ اس کی طرف سے کافی ہوجائے گا۔ [مصنف ابن ابي شيبه/كتاب الحج/حدیث: 15356]

حضرت مطر سے مروی ہے کہ ایک خاتون نے اپنے شوہر سے حج کی اجازت مانگی لیکن شوہر نے اس کو اجازت نہ دی، پھر اس نے خاوند سے کہیں ملنے جانے کی اجازت مانگی تو شوہر نے اجازت دے دی، پھر اس خاتون نے اپنے سفید کپڑے اپنے اوپر لپیٹ لیے اور بلند آواز سے حج کا تلبیہ پڑھنے لگی، لوگ حسن کے پاس آئے اور آپ سے دریافت کیا؟ حسن نے ارشاد فرمایا: بیوقوف عورت! اس کو یہ حق نہیں ہے۔ [مصنف ابن ابي شيبه/كتاب الحج/حدیث: 15357]

حضرت مطر فرماتے ہیں کہ حضرت قتادہ سے دریافت کیا گیا تو آپ نے فرمایا کہ وہ خاتون محرمہ ہے۔ [مصنف ابن ابي شيبه/كتاب الحج/حدیث: 15358]

حضرت مطر فرماتے ہیں کہ پھر میں مکہ مکرمہ گیا اور میں نے حضرت حکم بن عتیبہ سے دریافت کیا تو آپ نے فرمایا کہ وہ خاتون محرمہ ہے۔ [مصنف ابن ابي شيبه/كتاب الحج/حدیث: 15359]

حضرت مطر فرماتے ہیں کہ پھر میں نے ایک شخص سے کہا کہ وہ حضرت عطاء بن ابی رباح سے پوچھے، تو آپ نے فرمایا کہ نہیں! ہرگز نہیں، اس خاتون کو یہ حق نہیں ہے۔ [مصنف ابن ابي شيبه/كتاب الحج/حدیث: 15360]