حضرت عمر رضی اللہ عنہ فرماتے ہیں کہ نامرد کو ایک سال کی مہلت دی جائے گی، اگر وہ کسی قابل ہوجائے تو ٹھیک ورنہ دونوں کے درمیان جدائی کرادی جائے گی۔ [مصنف ابن ابي شيبه/كتاب النكاح/حدیث: 17300]

حضرت شعبی فرماتے ہیں کہ حضرت عمر بن خطاب رضی اللہ عنہ نے حضرت شریح کو خط میں لکھا کہ نامرد کو اس دن سے ایک سال کی مہلت دی جائے گی جب سے اس کا مقدمہ قاضی کے پاس پیش ہوا۔ [مصنف ابن ابي شيبه/كتاب النكاح/حدیث: 17301]

حضرت شعبی فرماتے ہیں کہ حضرت حارث بن عبد اللہ بن ابی ربیعہ نے اس شخص کو دس مہینے کی مہلت دی جو اپنی بیوی سے جماع کرنے کے قابل نہ تھا۔ [مصنف ابن ابي شيبه/كتاب النكاح/حدیث: 17302]

حضرت ابراہیم فرماتے ہیں کہ جو شخص اپنی بیوی سے جماع کرنے کے قابل نہ ہو اسے علاج کے لیے ایک سال یا دس مہینے کی مہلت دی جائے گی۔ [مصنف ابن ابي شيبه/كتاب النكاح/حدیث: 17303]

حسن اور ابراہیم فرماتے ہیں کہ نامرد کو اس دن سے مہلت دی جائے گی جب سے اس کا فیصلہ سلطان کی مجلس میں پیش ہوا۔ حسن فرماتے ہیں کہ اسے ایک سال کی مہلت دی جائے گی۔ ابراہیم فرماتے ہیں کہ مجھے وقت تو یاد نہیں البتہ اسے اس دن سے مہلت دی جائے گی جس دن اس کا مقدمہ قاضی کی عدالت میں پیش ہوا۔ [مصنف ابن ابي شيبه/كتاب النكاح/حدیث: 17304]

حسن اور ابراہیم فرماتے ہیں کہ نامرد کو اس دن سے مہلت دی جائے گی جب سے اس کا مقدمہ حاکم کے پاس پیش ہوا۔ یونس نے حسن سے نقل کیا کہ اسے ایک سال کی مہلت دی جائے گی۔ اور مغیرہ نے ابراہیم سے نقل کیا کہ مجھے مدت تو یاد نہیں البتہ اسے اس دن سے مہلت دی جائے گی جس دن اس کا مقدمہ حاکم کے پاس پیش ہوا۔ [مصنف ابن ابي شيبه/كتاب النكاح/حدیث: 17305]

حضرت عامر شعبی فرماتے ہیں کہ رسول اللہ صلی اللہ علیہ وسلم کے اصحاب فرمایا کرتے تھے کہ نامرد کو ایک سال کی مہلت دی جائے گی۔ [مصنف ابن ابي شيبه/كتاب النكاح/حدیث: 17306]

حضرت عطاء فرماتے ہیں کہ نامرد کو ایک سال کی مہلت دی جائے گی، اگر وہ کسی قابل ہوجائے تو ٹھیک ورنہ دونوں کے درمیان جدائی کرادی جائے گی۔ [مصنف ابن ابي شيبه/كتاب النكاح/حدیث: 17307]

حضرت سعید بن مسیب فرماتے ہیں کہ نامرد کو اور اس شخص کو جسے (جادو کے ذریعے) اس کی بیوی سے روک دیا گیا ہو، ایک سال کی مہلت دی جائے گی۔ [مصنف ابن ابي شيبه/كتاب النكاح/حدیث: 17308]

حضرت عطاء فرماتے ہیں کہ جس دن عورت خاوند کے خلاف مقدمہ عدالت میں پیش کرے اس دن سے ایک سال کی مدت شمار کی جائے گی۔ [مصنف ابن ابي شيبه/كتاب النكاح/حدیث: 17309]