حضرت عمر بن خطاب اور حضرت عثمان بن عفان رضی اللہ عنہ ما فرماتے ہیں کہ عورت شوہر کے گم ہوجانے کی صورت میں چار سال انتظار کرے گی اور چار مہینے دس دن عدت گزارے گی۔ [مصنف ابن ابي شيبه/كتاب النكاح/حدیث: 17550]

حضرت عمر رضی اللہ عنہ عورت کا شوہر گم ہوجانے کی صورت میں فرماتے ہیں کہ عورت چار سال انتظار کرے گی پھر آدمی کے ولی کو بلایا جائے گا اور وہ عورت کو طلاق دے گا پھر وہ چار مہینے دس دن عدت گزارے گی۔ [مصنف ابن ابي شيبه/كتاب النكاح/حدیث: 17551]

حضرت سعید بن مسیب دونوں صفوں کے درمیان (میدان جنگ میں) گم ہوجانے والے کے بارے میں فرماتے ہیں کہ اس کی بیوی ایک سال عدت گزارے گی۔ [مصنف ابن ابي شيبه/كتاب النكاح/حدیث: 17552]

حضرت یحییٰ بن جعدہ فرماتے ہیں کہ حضرت عمر رضی اللہ عنہ کے زمانے میں ایک شخص کو جن اٹھا کرلے گئے۔ اس کی بیوی حضرت عمر رضی اللہ عنہ کے پاس آئی اور ساری صورت حال بتائی تو حضرت عمر رضی اللہ عنہ نے اسے حکم دیا کہ چار سال انتظار کرے۔ چار سال بعد خاوند کے ولی کو حکم دیا کہ وہ عورت کو طلاق دے دے۔ پھر عورت کو عدت گزارنے کا حکم دیا۔ جب عدت پوری ہوجائے تو وہ شادی کرسکتی ہے اور اگر اس کا خاوندواپس آجائے تو مرد کو بیوی اور مہر میں سے ایک چیز کا اختیار دیا جائے گا۔ [مصنف ابن ابي شيبه/كتاب النكاح/حدیث: 17553]

حضرت سعید بن مسیب دونوں صفوں کے درمیان (میدان جنگ میں) گم ہوجانے والے کے بارے میں فرماتے ہیں کہ اس کی بیوی ایک سال انتظار کرے گی۔ [مصنف ابن ابي شيبه/كتاب النكاح/حدیث: 17554]

حضرت عبد الرحمن بن ابی لیلیٰ فرماتے ہیں کہ میں حضرت عمر رضی اللہ عنہ کے پاس موجود تھا کہ انہوں ایک ایسے شخص کو جو گم ہوگیا تھا اور اس کی بیوی نے شادی کرلی تھی۔ اختیار دیا کہ چاہے تو بیوی واپس لے لے یا وہ مہر واپس لے لے جو اس نے عورت کو دیا تھا۔ [مصنف ابن ابي شيبه/كتاب النكاح/حدیث: 17555]

حضرت عمر اور حضرت عثمان رضی اللہ عنہ ما فرماتے ہیں کہ جب عورت کا خاوند واپس آئے تو اسے بیوی اور دیئے گئے مہر کے درمیان اختیار ہوگا۔ [مصنف ابن ابي شيبه/كتاب النكاح/حدیث: 17556]

حضرت شعبی فرماتے ہیں کہ حضرت عمر بن خطاب رضی اللہ عنہ سے اس شخص کے بارے میں دریافت کیا گیا جو غائب ہوگیا اور اس کی بیوی کو اس کے مرنے کی اطلاع ملی تو اس نے شادی کرلی۔ پھر پہلا خاوند آگیا تو کیا حکم ہے؟ حضرت عمر رضی اللہ عنہ نے فرمایا کہ پہلے خاوند کو مہر اور عورت کے درمیان اختیار دیا جائے گا۔ اگر وہ مہر اختیار کرلے تو عورت دوسرے خاوند کے پاس رہے گی اور اگر وہ چاہے تو اپنی بیوی کو اختیار کرلے۔ حضرت علی رضی اللہ عنہ فرماتے ہیں کہ دوسرے خاوند نے جو اس کی شرمگاہ کو اپنے لئے حلال کیا اس کے بدلے عورت کو اس کی طرف سے مہر ملے گا اور دونوں کے درمیان تفریق کرادی جائے گی، پھر وہ تین حیض عدت گزارے گی اور پہلے خاوند کو واپس کردی جائے گی۔ [مصنف ابن ابي شيبه/كتاب النكاح/حدیث: 17557]

حضرت عطاء بن سائب فرماتے ہیں کہ ایک آدمی ابراہیم کے پاس آیا اور کہا کہ اس نے ایک ایسی عورت سے شادی کی ہے جسے اس کے خاوند کے انتقال کرجانے کی خبر ملی تھی، اب اس خاوند کی طرف سے زندہ ہونے کا خط آگیا ہے۔ ابراہیم نے فرمایا کہ تم اس سے الگ رہو۔ پھر جب وہ آئے تو اگر چاہے تو اپنا دیا ہوا مہر لے لے اور عورت اپنی حالت پر تمہاری بیوی رہے گی اور اگر وہ عورت کو اختیار کرلے تو تمہاری طرف سے عدت گزرنے کے بعد وہ پہلے خاوند کی بیوی ہوگی۔ البتہ اس کی شرمگاہ کو حلال کرنے کے بدلے تمہاری طرف سے اسے مہر ضرور ملے گا۔ اس شخص نے کہا کہ کیا میں اس عورت کے ساتھ کھانا کھا سکتا ہوں؟ انہوں نے فرمایا ہاں البتہ اسے اطلاع دیئے بغیر اس کے پاس مت جانا۔ [مصنف ابن ابي شيبه/كتاب النكاح/حدیث: 17558]

حضرت سہیمہ بنت عمیر شیبانیہ فرماتی ہیں کہ مجھے قندابیل سے اپنے خاوند کے انتقال کی خبر ملی۔ میں نے بعد میں عباس بن طریف جو بنو قیس کے بھائی تھے شادی کرلی۔ بعد میں میرے پہلے خاوند بھی واپس آگئے۔ ہم مسئلہ پوچھنے حضرت عثمان بن عفان کے پاس گئے، اس وقت وہ محصور تھے۔ انہوں نے فرمایا کہ میں اس حال میں تمہارے درمیان فیصلہ کیسے کرسکتا ہوں؟ ہم نے کہا کہ ہم آپ کے فیصلے پر راضی ہیں۔ انہوں نے خاوند کو مہر اور عورت میں سے ایک چیز کا اختیار دیا۔ جب حضرت عثمان کو شہید کردیا گیا تو ہم حضرت علی رضی اللہ عنہ کے پاس گئے اور سارا واقعہ بیان کیا تو انہوں نے پہلے خاوند کو مہر اور عورت کے درمیان اختیار دیا۔ پس انہوں نے مہر کو اختیار کرتے ہوئے مجھ سے اور دوسرے خاوند سے دو دو ہزار لئے۔ [مصنف ابن ابي شيبه/كتاب النكاح/حدیث: 17559]