حضرت ایوب فرماتے ہیں کہ حضرت عطاء خراسانی نے مجھے لکھا کہ انہوں نے حضرت سعید بن مسیب، فقہاء مدینہ اور غالباً حضرت سلیمان بن یسار سے اس عورت کے بارے میں سوال کیا جسے تین طلاقیں دے دی گئی ہوں اور اس عورت کے بارے میں جس کے خاوند کا انتقال ہوگیا ہو، تو انہوں نے فرمایا کہ وہ دونوں سوگ منائیں گی اور سرمہ، خضاب، خوشبو اور کنگھی کا استعمال نہیں کریں گی۔ [مصنف ابن ابي شيبه/كتاب الطلاق/حدیث: 20064]

حضرت سعید بن مسیب رحمہ اللہ فرماتے ہیں کہ تین طلاق یافتہ عورت اور وہ جس کا خاوند فوت ہوگیا ہو زینت کے معاملے میں دونوں کا ایک حکم ہے۔ [مصنف ابن ابي شيبه/كتاب الطلاق/حدیث: 20065]

حضرت ابراہیم رحمہ اللہ فرماتے ہیں کہ تین طلاق یافتہ عورت زینت کے لئے سرمہ نہیں لگائے گی۔ [مصنف ابن ابي شيبه/كتاب الطلاق/حدیث: 20066]

حضرت محمد رحمہ اللہ فرماتے ہیں کہ وہ عورت جسے تین طلاقیں دے دی گئی ہوں اور وہ عورت جس کے خاوند کا انتقال ہوگیا ہو وہ دونوں سرمہ نہیں لگائیں گی اور خضاب بھی استعمال نہیں کریں گی۔ [مصنف ابن ابي شيبه/كتاب الطلاق/حدیث: 20067]

حضرت حکم رحمہ اللہ فرماتے ہیں کہ جس عورت کو تین طلاقیں دے دی گئی ہوں وہ سرمہ نہیں لگائے گی اور زینت بھی اختیار نہیں کرے گی۔ اس کا حکم اس عورت سے زیادہ سخت ہے جس کا خاوند انتقال کرگیا ہو۔ [مصنف ابن ابي شيبه/كتاب الطلاق/حدیث: 20068]

حضرت سعید بن مسیب رحمہ اللہ فرماتے ہیں کہ وہ عورت جسے تین طلاقیں دے دی گئی ہوں اور وہ عورت جس کے خاوند کا انتقال ہوگیا ہو وہ دونوں زینت کے حکم میں برابر ہیں۔ [مصنف ابن ابي شيبه/كتاب الطلاق/حدیث: 20069]

حضرت ام عطیہ فرماتی ہیں کہ جس عور ت کا خاوند انتقال کر گیا وہ وہ عدت میں سرمہ اور خضاب استعمال نہیں کرے گی، رنگا ہوا کپڑے نہیں پہنے گی، البتہ عصب نامی کپڑا پہن سکتی ہے۔ خوشبو استعمال نہیں کرے گی البتہ حیض کا غسل کرتے ہوئے قسط اور اظفار نامی خوشبو میں سے تھوڑی سی لگاسکتی ہے۔ [مصنف ابن ابي شيبه/كتاب الطلاق/حدیث: 20070]

حضرت ابن عباس رضی اللہ عنہما اس عورت کو خوشبو اور زینت سے منع کیا کرتے تھے جس کے خاوند کا انتقال ہوگیا ہو۔ [مصنف ابن ابي شيبه/كتاب الطلاق/حدیث: 20071]

حضرت نافع رحمہ اللہ فرماتے ہیں کہ حضرت ابن عمر رضی اللہ عنہما کے وصال کے بعد ان کی اہلیہ حضرت صفیہ کی آنکھ میں تکلیف ہوئی تو وہ آنکھ میں صبر نامی بوٹی کا پانی ٹپکایا کرتی تھیں۔ (یعنی علاج کے لئے بھی سرمہ نہیں لگاتی تھیں) [مصنف ابن ابي شيبه/كتاب الطلاق/حدیث: 20072]

حضرت ابن عمر رضی اللہ عنہما فرماتے ہیں کہ جس عورت کا خاوند انتقال کرجائے وہ سرمہ، خوشبو، زیور اور رنگ استعمال نہیں کرے گی۔ [مصنف ابن ابي شيبه/كتاب الطلاق/حدیث: 20073]