حضرت ابن سیرین رحمہ اللہ فرماتے ہیں کہ وہ اس وقت تک اس سے جماع نہ کرے جب تک وہ کر نہ لے جس کا وہ کہہ رہا ہے۔ [مصنف ابن ابي شيبه/كتاب الطلاق/حدیث: 20194]

حضرت شریح رحمہ اللہ فرماتے ہیں کہ حضرت عروہ بارقی میرے پاس حضرت عمر رضی اللہ عنہ کی طرف سے پیغام لے کر آئے کہ اگر کوئی شخص اپنی بیوی کو مرض الوفات میں تین طلاقیں دے دے تو عورت اس کی وارث ہوگی جب کہ وہ عورت کا وارث نہیں ہوگا۔ اور عورت پر اس عورت کی عدت لازم ہوگی جس کا خاوند انتقال کرچکا ہو۔ [مصنف ابن ابي شيبه/كتاب الطلاق/حدیث: 20195]

حضرت ابراہیم رحمہ اللہ فرماتے ہیں کہ عورت پر اس عورت کی عدت لازم ہوگی جس کا خاوند انتقال کرچکا ہو۔ [مصنف ابن ابي شيبه/كتاب الطلاق/حدیث: 20196]

حضرت حسن رحمہ اللہ اور محمد رحمہ اللہ فرماتے ہیں کہ اگر آدمی کا انتقال عورت کی عدت میں ہوجائے تو وہ چار مہینے دس دن عدت گزارے گی۔ [مصنف ابن ابي شيبه/كتاب الطلاق/حدیث: 20197]

حضرت شعبی رحمہ اللہ فرماتے ہیں کہ یہ طلاق کا ایک بہت اہم باب ہے، جب وہ وارث ہوگی تو عدت بھی گزارے گی۔ [مصنف ابن ابي شيبه/كتاب الطلاق/حدیث: 20198]

حضرت عکرمہ رحمہ اللہ فرماتے ہیں کہ اگر عدت کا ایک ہی دن باقی رہ جائے اور وہ مرجائے تو عورت وارث ہوگی اور نئے سرے سے اس عورت کی عدت گزارے گی جس کا خاوند انتقال کرگیا ہو۔ [مصنف ابن ابي شيبه/كتاب الطلاق/حدیث: 20199]

حضرت شریح رحمہ اللہ فرماتے ہیں کہ وہ نئے سرے سے عدت گزارے گی۔ [مصنف ابن ابي شيبه/كتاب الطلاق/حدیث: 20200]

حضرت مسروق رحمہ اللہ فرماتے ہیں کہ حضور صلی اللہ علیہ وسلم نے اپنی ام ولد کو اپنے اوپر حرام کرلیا اور اس بات کی قسم کھالی کہ اس کے قریب نہیں جائیں گے۔ اس پر اللہ تعالیٰ نے یہ آیت آخر تک نازل فرمائی { یَا أَیُّہَا النَّبِیُّ لِمَ تُحَرِّمُ مَا أَحَلَّ اللَّہُ لَکَ تَبْتَغِی مَرْضَاۃَ أَزْوَاجِکَ } تو اس میں آپ سے کہا گیا کہ جسے حرام کیا ہے وہ حلال ہے اور جو قسم آپ نے کھائی ہے تو اللہ تعالیٰ نے قسموں کا کفارہ مقرر فرما دیا ہے۔ [مصنف ابن ابي شيبه/كتاب الطلاق/حدیث: 20201]

حضرت حسن رحمہ اللہ فرماتے ہیں کہ اگر کسی آدمی نے اپنی ام ولد سے کہا کہ تو مجھ پر حرام ہے تو وہ اس قسم کا کفارہ ادا کرے اور اپنی باندی کے پاس جائے۔ [مصنف ابن ابي شيبه/كتاب الطلاق/حدیث: 20202]

حضرت ابن ابی لیلیٰ رحمہ اللہ فرماتے ہیں کہ اگر کسی شخص نے کہا کہ اس کی باندی اس پر حرام ہے تو وہ اپنی قسم کا کفارہ دے اور اپنی باندی کے پاس جائے۔ [مصنف ابن ابي شيبه/كتاب الطلاق/حدیث: 20203]