حضرت شعبہ رحمہ اللہ کہتے ہیں کہ میں نے حضرت حکم رحمہ اللہ اور حضرت حماد رحمہ اللہ سے سوال کیا کہ اگر ایک آدمی نے اپنی بیوی سے کہا کہ جب تو چاہے تجھے طلاق ہے تو کیا حکم ہے؟ حضرت حکم نے فرمایا کہ وہ جب چاہے اسے طلاق ہوجائے گی۔ [مصنف ابن ابي شيبه/كتاب الطلاق/حدیث: 20214]

اور حضرت حماد رحمہ اللہ نے فرمایا کہ (صرف) ایک مرتبہ طلاق ہوگی۔ [مصنف ابن ابي شيبه/كتاب الطلاق/حدیث: 20215]

حضرت عطاء رحمہ اللہ فرماتے ہیں کہ جب باپ نے شادی کرائی تو طلاق کا اختیار بھی اسی کو ہوگا۔ [مصنف ابن ابي شيبه/كتاب الطلاق/حدیث: 20216]

حضرت مجاہد رحمہ اللہ فرماتے ہیں کہ جو نکاح کا مالک ہوگا وہی طلاق کا بھی مالک ہوگا۔ [مصنف ابن ابي شيبه/كتاب الطلاق/حدیث: 20217]

حضرت ابراہیم رحمہ اللہ حالتِ شرک میں دی گئی طلاق کو جائز قرار دیتے تھے۔ [مصنف ابن ابي شيبه/كتاب الطلاق/حدیث: 20218]

حضرت عطاء رحمہ اللہ اور حضرت شعبی رحمہ اللہ حالتِ شرک میں دی گئی طلاق کو جائز قرار دیتے تھے۔ [مصنف ابن ابي شيبه/كتاب الطلاق/حدیث: 20219]

حضرت شعبی رحمہ اللہ سے بھی منقول ہے کہ وہ دونوں (عطاء اور شعبی) حالتِ شرک میں دی گئی طلاق کو جائز قرار دیتے تھے۔ [مصنف ابن ابي شيبه/كتاب الطلاق/حدیث: 20220]

حضرت حسن رحمہ اللہ حالتِ شرک میں دی گئی طلاق کو جائز نہیں سمجھتے تھے۔ [مصنف ابن ابي شيبه/كتاب الطلاق/حدیث: 20221]

حضرت ابن جریج رحمہ اللہ فرماتے ہیں کہ میں نے حضرت عطاء سے پوچھا کہ کیا آپ کو رسول اللہ صلی اللہ علیہ وسلم کے حوالے سے یہ بات پہنچی ہے کہ آپ نے اہل جاہلیت کو ان میں رائج نکاح اور طلاق کے ضابطوں کو باقی رکھا تھا؟ انہوں نے فرمایا جی ہاں ایسا ہی ہے۔ [مصنف ابن ابي شيبه/كتاب الطلاق/حدیث: 20222]

حضرت شعبہ رحمہ اللہ کہتے ہیں کہ میں نے حضرت حکم اور حضرت حماد سے حالت شرک میں دی گئی طلاق کے بارے میں سوال کیا تو انہوں نے فرمایا کہ یہ جائز ہے۔ [مصنف ابن ابي شيبه/كتاب الطلاق/حدیث: 20223]