حضرت مجاہد قرآن مجید کی آیت { وَلاَ یَحِلُّ لَہُنَّ أَنْ یَکْتُمْنَ مَا خَلَقَ اللَّہُ فِی أَرْحَامِہِنَّ } کی تفسیر میں فرماتے ہیں کہ اس سے مرادحمل اور حیض ہے۔ [مصنف ابن ابي شيبه/كتاب الطلاق/حدیث: 20234]

راوی کہتے ہیں کہ ابراہیم رحمہ اللہ فرماتے ہیں کہ اس سے مراد صرف حیض ہے۔ [مصنف ابن ابي شيبه/كتاب الطلاق/حدیث: 20235]

حضرت سعد بن ابراہیم رحمہ اللہ فرماتے ہیں کہ ایک شخص نے اپنی بیوی سے کہا کہ تجھے طلاق ہے، پھر اس نے اس بارے میں حضرت سالم رحمہ اللہ اور حضرت قاسم رحمہ اللہ سے سوال کیا تو انہوں نے فرمایا کہ ہماری رائے یہ ہے کہ اس سے قسم لی جائے کہ اس نے حتمی طلاق کا ارادہ نہیں کیا۔ [مصنف ابن ابي شيبه/كتاب الطلاق/حدیث: 20236]

حضرت سعید بن مسیب رحمہ اللہ فرماتے ہیں کہ اگر کسی شخص نے اپنی بیوی سے کہا کہ تجھے طلاق ہے اور اس نے تعداد کا تذکرہ نہیں کیا تو اس کی نیت کا اعتبار ہوگا کہ ایک دی ہے یا د و یا تین۔ [مصنف ابن ابي شيبه/كتاب الطلاق/حدیث: 20237]

حضرت ابراہیم رحمہ اللہ فرماتے ہیں کہ مطلقہ پر ہر روز گندم کا نصف صاع خرچ کیا جائے گا۔ [مصنف ابن ابي شيبه/كتاب الطلاق/حدیث: 20238]

حضرت شعبی رحمہ اللہ نے اس عورت کے لئے ہر مہینے میں گندم کے پندرہ صاع اور دو درہم لازم کئے جس کے خاوند نے اسے نقصان پہنچایا تھا۔ [مصنف ابن ابي شيبه/كتاب الطلاق/حدیث: 20239]

حضرت علی رضی اللہ عنہ نے نفقہ میں عورت اور اس کی خادمہ کے لئے ہر مہینے بارہ درہم مقرر کئے، چار خادمہ کے لئے اور آٹھ عورت کے لئے۔ [مصنف ابن ابي شيبه/كتاب الطلاق/حدیث: 20240]

حضرت ام خصیب وابشیہ فرماتی ہیں کہ ان کے خاوند کا انتقال ہوگیا اور وہ حاملہ تھیں۔ وہ اپنا مقدمہ لے کر حضرت شریح کے پاس گئیں تو انہوں نے فرمایا کہ کل مال میں سے ان پر پندرہ خرچ کئے جائیں گے۔ [مصنف ابن ابي شيبه/كتاب الطلاق/حدیث: 20241]

حضرت حکم رحمہ اللہ فرماتے ہیں کہ (نفقہ میں) ایک خادمہ کا خرچہ دیا جائے گا۔ [مصنف ابن ابي شيبه/كتاب الطلاق/حدیث: 20242]

حضرت عکرمہ رحمہ اللہ فرماتے ہیں کہ حضرت عمر رضی اللہ عنہ نے ام عاصم کو فریق بنا کر حضرت عاصم کی پرورش کا مسئلہ حضرت ابوبکر رضی اللہ عنہ کے پاس پیش کیا۔ انہوں نے فیصلہ فرمایا کہ بچہ حضرت ام عاصم کے پاس رہے گا جب تک بڑا نہ ہوجائے یا جب تک ام عاصم شادی نہ کرلیں، پھر بچہ اپنے لئے خود انتخاب کرے گا۔ اور فرمایا کہ ماں بچے پر زیادہ مہربان، رحم کرنے والی، نرم دل اور شفقت کرنے والی ہوتی ہے۔ [مصنف ابن ابي شيبه/كتاب الطلاق/حدیث: 20243]