حضرت حسن رحمہ اللہ فرماتے ہیں کہ جھگڑے کی صورت میں جو چیزیں مردوں کی ہوتی ہیں وہ مردوں کی ہوں گی اور جو عورتوں کی ہوتی ہیں وہ عورتوں کی ہوں گی۔ اور باقی ماندہ اس کے لئے ہوگا جس نے گواہی قائم کی۔ [مصنف ابن ابي شيبه/كتاب الطلاق/حدیث: 20264]

حضرت ابراہیم رحمہ اللہ فرماتے ہیں کہ جس چیزکاتعلق مردوں سے ہو وہ مردوں کے لئے ہے اور جس کا تعلق عورتوں سے ہو وہ عورتوں کو ملے گی اور جو باقی بچے وہ ان کے درمیان تقسیم ہوگا۔ [مصنف ابن ابي شيبه/كتاب الطلاق/حدیث: 20265]

حسن رحمہ اللہ فرماتے ہیں کہ جس عورت کا خاوند فوت ہوجائے تو اس کے لئے وہ سب کچھ ہوگا جس پر اس نے اپنا دروازہ بند کیا (یعنی گھر کا سامان)، سوائے اس کے جو مرد کا سامان ہو جیسے چادر (طیلسان) اور قمیص وغیرہ۔ [مصنف ابن ابي شيبه/كتاب الطلاق/حدیث: 20266]

حضرت حماد رحمہ اللہ سے گھر کے سامان کی بابت سوال کیا گیا تو انہوں نے فرمایا کہ عورت کے کپڑے عورت کے لئے اور مرد کے کپڑے مرد کے لئے ہیں۔ اور جس چیز کے بارے میں ان کا جھگڑا ہوجائے وہ اس کا ہوگا جس کے قبضے میں ہو۔ [مصنف ابن ابي شيبه/كتاب الطلاق/حدیث: 20267]

حضرت شعبی رحمہ اللہ فرماتے ہیں کہ جب عورت اپنے خاوند کے پاس آئے اور اس کے پاس زیورات اور سامان ہوں اور وہ اپنے خاوند کے پاس ٹھہری رہے یہاں تک کہ اس (عورت) کا انتقال ہوجائے تو یہ سب کچھ میراث ہوگا۔ خواہ عورت کے گھر والے اس بات پر گواہی بھی قائم کردیں کہ یہ اس کے پاس صرف استعمال کے لئے تھا۔ البتہ اگر وہ عورت کی زندگی میں اس کی وفات سے پہلے خاوند کو اس بات سے آگاہ کرچکے ہوں تو ٹھیک ہے۔ [مصنف ابن ابي شيبه/كتاب الطلاق/حدیث: 20268]

حضرت شریح رحمہ اللہ گھر کے سامان کے بارے میں فرمایا کرتے تھے کہ ہتھیار اور مردوں کا سامان مرد کے لئے ہوگا۔ [مصنف ابن ابي شيبه/كتاب الطلاق/حدیث: 20269]

حضرت حکم رحمہ اللہ فرماتے ہیں کہ اگر کوئی شخص انتقال کرجائے اور گھر میں کچھ سامان چھوڑے تو مردوں والا سامان مرد کے لئے اور عورتوں والا سامان عورت کے لئے ہوگا۔ اور جو مردوں اور عورتوں کے درمیان مشترک ہوتا ہے وہ مرد کے لئے ہوگا۔ البتہ اگر عورت اس بات پر گواہی قائم کردے کہ یہ اس کا ہے تو پھر اسی کا ہوگا۔ [مصنف ابن ابي شيبه/كتاب الطلاق/حدیث: 20270]

حضرت ابن معقل رحمہ اللہ فرماتے ہیں کہ بچے کی رضاعت اس کے حصے میں سے ہوگی۔ [مصنف ابن ابي شيبه/كتاب الطلاق/حدیث: 20271]

حضرت حسن رحمہ اللہ فرماتے ہیں کہ بچے کی رضاعت اس کے حصے میں سے ہوگی۔ [مصنف ابن ابي شيبه/كتاب الطلاق/حدیث: 20272]

حضرت محمد رحمہ اللہ فرماتے ہیں کہ حضرت عبد اللہ بن عتبہ رحمہ اللہ کے پاس ایک بچے کی رضاعت کا مقدمہ لایا گیا انہوں نے رضاعت بچے کے مال میں سے لازم فرمائی اور اس کے ولی سے کہا کہ اگر اسکا مال نہ ہوتا توہم آپ کے مال میں سے اس کے دودھ کا انتظام کرتے۔ کیا تم نے قرآن مجید کی یہ آیت نہیں پڑھی { وَعَلَی الْوَارِثِ مِثْلُ ذَلِکَ } [مصنف ابن ابي شيبه/كتاب الطلاق/حدیث: 20273]