حضرت عبایہ فرماتے ہیں کہ ایک مرتبہ حضرت ابن عمر رضی اللہ عنہما کی موجودگی میں ایک اونٹ کنویں میں گر گیا۔ ایک آدمی اسے نحر کرنے کے لیے نیچے اترا لیکن اس نے کہا کہ میں اسے نحر نہیں کرسکتا۔ حضرت ابن عمر رضی اللہ عنہما سے پوچھا گیا تو انہوں نے فرمایا کہ اللہ کا نام لے کر اس کے پہلو کی جانب سے نیزہ مار کر اس کا کام تمام کردو۔ اس نے ایسا ہی کیا۔ پھر اسے ٹکڑے ٹکڑے کر کے نکالا گیا اور حضرت ابن عمر رضی اللہ عنہما نے اس میں سے دس حصے دو یا چار درہم میں خرید لیے۔ [مصنف ابن ابي شيبه/كتاب الصيد/حدیث: 21015]

حضرت مسروق فرماتے ہیں کہ اگر کوئی بہت بڑا اونٹ کنویں میں گر کر پھنس جائے تو اس کے ٹکڑے کاٹ کر کھالو۔ [مصنف ابن ابي شيبه/كتاب الصيد/حدیث: 21016]

حضرت ابو راشد سلمانی فرماتے ہیں کہ میں اپنی حاملہ اونٹنیوں کو کوفہ کے پاس چرا رہا تھا کہ ایک اونٹ پانی میں بری طرح پھنس گیا۔ مجھے ڈر تھا کہ ذبح کرنے سے پہلے اس کی جان نکل جائے گی، چناچہ میں نے ایک لوہا پکڑا اور اس کی کمر یا اس کے کوہان میں مار دیا۔ پھر میں نے اس کے ٹکڑے کردیئے اور اپنے گھر والوں کو دے دئیے۔ لیکن انہوں نے ساری تفصیل سن کر اسے کھانے سے انکار کردیا۔ میں حضرت علی رضی اللہ عنہ کے پاس حاضر ہوا اور ان کے محل کے دروازے کے پاس کھڑے ہو کر میں نے آواز لگائی: اے امیر المؤمنین! اے امیر المؤمنین! حضرت علی رضی اللہ عنہ نے فرمایا کہ میں حاضر ہوں، میں حاضر ہوں۔ میں نے انہیں پوری بات سنائی تو انہوں نے فرمایا کہ اسے کھالو اور اس کے پچھلے حصے کا گوشت مجھے دے دو۔ [مصنف ابن ابي شيبه/كتاب الصيد/حدیث: 21017]

حضرت شریح اور حضرت مسروق فرمایا کرتے تھے کہ اگر اونٹ کنویں میں گرجائے اور اس کو نحر کرنا ممکن نہ ہو تو اس کو چھری مار دیں، یہی اس کو ذبح کرنا ہے۔ [مصنف ابن ابي شيبه/كتاب الصيد/حدیث: 21018]

ابو مرہ مولیٰ عقیل بن ابی طالب فرماتے ہیں کہ میں اپنے گھر آیا تو ان کے پاس ایک بکری تھی جو مری ہوئی محسوس ہو رہی تھی میں نے اسے ذبح کیا، تو اس نے حرکت کی، میں نے یہ ساری بات حضرت ابوہریرہ رضی اللہ عنہ سے ذکر کی تو انہوں نے مجھے وہ بکری کھانے کا حکم دیا۔ [مصنف ابن ابي شيبه/كتاب الصيد/حدیث: 21019]

انہوں نے کہا کہ پھر میں حضرت زید بن ثابت رضی اللہ عنہ کے پاس آیا اور ان سے اس کا ذکر کیا تو انہوں نے فرمایا کہ مردہ جانور بھی حرکت کرتا ہے۔ [مصنف ابن ابي شيبه/كتاب الصيد/حدیث: 21020]

حضرت عبید بن عمیر ذبیحہ کے بارے میں فرماتے ہیں کہ اگر وہ اپنی دم ہلائے یا آنکھ حرکت کرے یا (کسی طرح بھی) حرکت کرے تو وہ حلال ہے۔ [مصنف ابن ابي شيبه/كتاب الصيد/حدیث: 21021]

حضرت طاوس فرماتے ہیں کہ اس میں کوئی حرج نہیں۔ [مصنف ابن ابي شيبه/كتاب الصيد/حدیث: 21022]

حضرت عطاء فرماتے ہیں کہ اگر ذبیحہ نے ذبح کے بعد دم، آنکھ یا پاؤں ہلایا ہو تو وہ حلال ہے۔ [مصنف ابن ابي شيبه/كتاب الصيد/حدیث: 21023]

حضرت حسن فرماتے ہیں کہ اگر ذبیحہ نے اپنی آنکھ یا پاؤں ہلایا تو وہ حلال ہے۔ [مصنف ابن ابي شيبه/كتاب الصيد/حدیث: 21024]