حضرت صباح بن ثابت کہتے ہیں کہ میں نے حضرت عامر بن عبدہ سے سوال کیا کہ ایک بطخ کنویں میں گرگئی تھی، لوگوں نے اسے نکالا تو اس میں زندگی کی رمق موجود تھی، اس کا کیا حکم ہے؟ انہوں نے فرمایا کہ اسے ذبح کر کے کھالو۔ [مصنف ابن ابي شيبه/كتاب الصيد/حدیث: 21025]

حضرت علی رضی اللہ عنہ فرماتے ہیں کہ اگر ذبیحہ نے اپنی آنکھ، یا دم یا پاؤں ہلایا تو اسے کھالو۔ [مصنف ابن ابي شيبه/كتاب الصيد/حدیث: 21026]

حضرت ضحاک فرماتے ہیں کہ کسی جانور کو اگر تم اس حال میں ذبح کرو اور اس نے اپنی آنکھ یا دم ہلائی تھی تو وہ حلال ہے۔ اگر اس کو ذبح کیا گیا لیکن اس نے نہ اپنی آنکھ ہلائی نہ دم تو وہ مردار ہے اور حرام ہے۔ [مصنف ابن ابي شيبه/كتاب الصيد/حدیث: 21027]

حضرت نعمان بن علی رحمہ اللہ فرماتے ہیں کہ حضرت سعید بن جبیر ایک شتر مرغ کے پاس سے گذرے جسے کوڑے کے ڈھیر پر پھینکا گیا تھا اور وہ حرکت کر رہا تھا۔ حضرت سعید بن جبیر نے پوچھا کہ یہ کیا ہے؟ لوگوں نے بتایا کہ ہمیں ڈر ہے کہ یہ موقوذہ (چوٹ سے مرنے والا جانور) نہ ہو۔ حضرت سعید نے فرمایا کہ قریب تھا کہ تم اسے شیطان کے لیے چھوڑ دیتے۔ موقوذہ تو وہ ہوتا ہے جو چوٹ لگنے سے مر جائے۔ [مصنف ابن ابي شيبه/كتاب الصيد/حدیث: 21028]

حضرت ابو مجلز فرماتے ہیں کہ اسلاف قرآن مجید کی آیت (الّا ما ذکیتم) کو گلا گھونٹے ہوئے، مردار اور گر کر ہلاک ہونے والے جانور سے استثناء مانتے تھے۔ پھر اللہ تعالیٰ نے ذبح کردہ کے علاوہ ہر ایک چیز کو حرام قرار دے دیا۔ [مصنف ابن ابي شيبه/كتاب الصيد/حدیث: 21029]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے خیبر کے دن مجثمہ کو حرام قرار دیا۔ ٭ مجثمہ اس جانور کو کہا جاتا ہے جسے باندھ کر تیر مارا جائے۔ [مصنف ابن ابي شيبه/كتاب الصيد/حدیث: 21030]

حضرت ابو قلابہ فرماتے ہیں کہ حضور صلی اللہ علیہ وسلم نے مجثمہ سے منع فرمایا۔ [مصنف ابن ابي شيبه/كتاب الصيد/حدیث: 21031]

حضرت عکرمہ فرماتے ہیں کہ مجثمہ سے منع کیا گیا ہے۔ [مصنف ابن ابي شيبه/كتاب الصيد/حدیث: 21032]

حضرت جابر بن عبد اللہ رضی اللہ عنہ فرماتے ہیں کہ غزوہ خیبر میں حضور صلی اللہ علیہ وسلم نے تین چیزوں کو حرام قرار دیا وہ جانور جنہیں باندھ کر شکار کیا گیا ہو۔ B وہ جانور جنہیں کسی درندے سے چھڑایا جائے اور وہ ذبح کرنے سے پہلے مرجائیں۔ C وہ جانور جنھیں کسی سے چھینا گیا ہو۔ [مصنف ابن ابي شيبه/كتاب الصيد/حدیث: 21033]

حضرت ابن عباس رضی اللہ عنہما فرماتے ہیں کہ حضور صلی اللہ علیہ وسلم نے مجثمہ سے منع فرمایا۔ [مصنف ابن ابي شيبه/كتاب الصيد/حدیث: 21034]