راوی کہتے ہیں کہ حضرت عامر رحمہ اللہ نے فرمایا کہ کوئی حرج نہیں ہے، ناپسند صرف وہ چیز کی گئی ہے جس پر اس کے مالک کا دل راضی نہ ہو۔ [مصنف ابن ابي شيبه/كتاب البيوع والأقضية/حدیث: 22426]

حضرت ابو مسعود انصاری رضی اللہ عنہ کا معمول تھا کہ جب بچوں پر چیزیں لٹائی جا رہی ہوتیں تو یہ بچوں کو ان کے لینے سے منع فرماتے اور ان کو خرید کردیتے۔ [مصنف ابن ابي شيبه/كتاب البيوع والأقضية/حدیث: 22427]

حضرت خالد بن سعد سے مروی ہے کہ حضرت ابو مسعود رضی اللہ عنہ بچوں پر شیرینی وغیر لٹانے کو ناپسند سمجھتے تھے۔ [مصنف ابن ابي شيبه/كتاب البيوع والأقضية/حدیث: 22428]

حضرت حکم رحمہ اللہ فرماتے ہیں کہ میں ابراہیم رحمہ اللہ اور حضرت شعبی رحمہ اللہ کے ساتھ تھا، اُن دونوں حضرات سے شادی میں شیرینی وغیرہ لٹانے کے متعلق دریافت کیا گیا، ابراہیم رحمہ اللہ نے اس کو ناپسند فرمایا۔ [مصنف ابن ابي شيبه/كتاب البيوع والأقضية/حدیث: 22429]

اور حضرت شعبی رحمہ اللہ نے اس میں کوئی حرج نہ سمجھا۔ [مصنف ابن ابي شيبه/كتاب البيوع والأقضية/حدیث: 22430]

حضرت شعبی رحمہ اللہ اس میں کوئی حرج نہ سمجھتے۔ [مصنف ابن ابي شيبه/كتاب البيوع والأقضية/حدیث: 22431]

اور ابراہیم رحمہ اللہ اس کو ناپسند کرتے۔ [مصنف ابن ابي شيبه/كتاب البيوع والأقضية/حدیث: 22432]

حضرت عکرمہ رحمہ اللہ شیرینی وغیرہ لٹانے کو ناپسند کرتے تھے۔ [مصنف ابن ابي شيبه/كتاب البيوع والأقضية/حدیث: 22433]

حضرت عطاء رحمہ اللہ بھی اس کو ناپسند کرتے تھے۔ [مصنف ابن ابي شيبه/كتاب البيوع والأقضية/حدیث: 22434]

حضرت ابن مسعود رضی اللہ عنہ سے قرآن مجید کی آیت { وَمِنَ النَّاسِ مَنْ یَشْتَرِی لَہْوَ الْحَدِیثِ } کی تفسیر کے متعلق دریافت کیا گیا؟ آپ رضی اللہ عنہ نے فرمایا گانا مراد ہے، قسم ہے اس ذات کی جس کے سوا کوئی معبود نہیں۔ [مصنف ابن ابي شيبه/كتاب البيوع والأقضية/حدیث: 22435]