حضرت عامر، حضرت سالم، حضرت قاسم اور حضرت عطاء رحمہ اللہ فرماتے ہیں کہ اگر غلام کسی شخص کو مال دے اور وہ شخص اس مال سے غلام کو خرید کر آزاد کر دے تو ایسا کرنا جائز نہیں ہے۔ [مصنف ابن ابي شيبه/كتاب البيوع والأقضية/حدیث: 22976]

حضرت شعبی رحمہ اللہ فرماتے ہیں کہ ایسا کرنا جائز نہیں ہے، اور جو ایسا کرے اس کو سزا دی جائے گی۔ [مصنف ابن ابي شيبه/كتاب البيوع والأقضية/حدیث: 22977]

حضرت حسن رحمہ اللہ اور حضرت ابن سیرین رحمہ اللہ فرماتے ہیں کہ ایسا کرنا جائز نہیں ہے۔ جو ایسا کرے وہ فاسق ہے۔ [مصنف ابن ابي شيبه/كتاب البيوع والأقضية/حدیث: 22978]

حضرت ابن عباس رضی اللہ عنہما سے مروی ہے کہ حضرت عمر رضی اللہ عنہ کا خبر ملی کہ فلاں شخص شراب بیچتا ہے۔ آپ رضی اللہ عنہ نے فرمایا کیا ہوگیا اس کو اللہ اس کو ہلاک کرے۔ کیا اس کو نہیں معلوم کہ حضور اکرم صلی اللہ علیہ وسلم نے ارشاد فرمایا: یہودیوں پر اللہ کی لعنت ہو، ان پر چربی حرام کی گئی، انہوں نے اس کو پگھلا کر بیچنا شروع کردیا اور اس کے ثمن کو کھالیا۔ [مصنف ابن ابي شيبه/كتاب البيوع والأقضية/حدیث: 22979]

حضرت ابو سعید رضی اللہ عنہ سے مروی ہے کہ ہمارے پاس ایک یتیم بچہ کی شرا ب تھی۔ جب سورة المائدہ میں شراب کی حرمت نازل ہوئی تو ہم نے نبی کریم صلی اللہ علیہ وسلم سے اس کے متعلق دریافت کیا؟ آپ صلی اللہ علیہ وسلم نے فرمایا: اس کو گِرا دو۔ [مصنف ابن ابي شيبه/كتاب البيوع والأقضية/حدیث: 22980]

حضرت عائشہ رضی اللہ عنہا سے مروی ہے کہ جب سود کی آیات نازل ہوئیں تو نبی کریم صلی اللہ علیہ وسلم منبر پر تشریف فرما ہوئے اور لوگوں کو آیات پڑھ کر سنائیں پھر شراب کی تجارت کو حرام قرار دے دیا۔ [مصنف ابن ابي شيبه/كتاب البيوع والأقضية/حدیث: 22981]

حضرت عائشہ رضی اللہ عنہا رضی اللہ عنہ سے اسی کے مثل قول منقول ہے۔ [مصنف ابن ابي شيبه/كتاب البيوع والأقضية/حدیث: 22982]

حضرت مغیرہ بن شعبہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: جو شراب کی بیع کرے تو اسے چاہیے کہ خنزیروں کو بھی ذبح کر کے ٹکڑے کرے۔ [مصنف ابن ابي شيبه/كتاب البيوع والأقضية/حدیث: 22983]

حضرت عمر رضی اللہ عنہ نے ارشاد فرمایا: فلاں پر اللہ کی لعنت ہو، وہ پہلا شخص ہے جس نے شراب کی بیع کی اجازت دی، جس چیز کا کھانا اور پینا حلال نہیں اس کی تجارت بھی ٹھیک نہیں۔ [مصنف ابن ابي شيبه/كتاب البيوع والأقضية/حدیث: 22984]

حضرت ابو داؤد فرماتے ہیں کہ میں حضرت حذیفہ رضی اللہ عنہ کے منبر کے قریب بیٹھا ہوا تھا آپ اس وقت مدائن میں تھے۔ آپ نے اللہ کی حمدو ثناء کی پھر فرمایا: اما بعد: لوگو! سن لو شراب کی تجارت کرنے والا اور شراب پینے والا دونوں گناہ میں برابر ہیں۔ اور خبردار خنزیر کو پالنے والا اور اس کا گوشت کھانے والا دونوں گناہ میں برابر ہیں۔ [مصنف ابن ابي شيبه/كتاب البيوع والأقضية/حدیث: 22985]