حضرت ابن عمر رضی اللہ عنہما سے مروی ہے کہ آنحضرت صلی اللہ علیہ وسلم نے دو یہودیوں کو رجم فرمایا۔ میں بھی ان لوگوں میں سے ہوں جنہوں نے ان کو رجم کیا تھا۔ [مصنف ابن ابي شيبه/كتاب البيوع والأقضية/حدیث: 23166]

حضرت کردوس رحمہ اللہ سے مروی ہے کہ ایک نوجوان کو شراب کی وجہ سے حد لگائی گئی، پھر اس نے حضرت شریح رحمہ اللہ کے پاس گواہی دی، انہوں نے اس کے بارے میں مجھ سے دریافت کیا؟ میں نے عرض کیا ہمارے نوجوانوں میں سے اچھا ہے۔ تو آپ نے اس کی گواہی کو قبول فرمایا۔ [مصنف ابن ابي شيبه/كتاب البيوع والأقضية/حدیث: 23167]

حضرت عمر رضی اللہ عنہ نے حضرت ابو موسیٰ اشعری رضی اللہ عنہ کو تحریر فرمایا کہ شرابی اگر توبہ کرلے تو اس کی گواہی قبول کرلو۔ [مصنف ابن ابي شيبه/كتاب البيوع والأقضية/حدیث: 23168]

حضرت شعبی رحمہ اللہ نے ایسے شخص کی گواہی قبول فرمائی جس کو شراب کی وجہ سے حد لگائی گئی تھی۔ [مصنف ابن ابي شيبه/كتاب البيوع والأقضية/حدیث: 23169]

حضرت عمر بن عبد العزیز رحمہ اللہ نے بھائی کی گواہی بھائی کے حق میں قبول فرمائی۔ [مصنف ابن ابي شيبه/كتاب البيوع والأقضية/حدیث: 23170]

حضرت عطاء بن ابی رباح رحمہ اللہ سے مروی ہے کہ محلہ کے دو آدمیوں کے درمیان جھگڑا ہوگیا، ان میں سے ایک کے لیے اس کے سگے بھائی نے حضرت شریح رحمہ اللہ کے سامنے گواہی دی، حضرت شریح رحمہ اللہ نے اس شخص سے فرمایا کہ کیا تو اس کا بھائی ہے؟ پھر دریافت فرمایا کہ: کیا تیرے لئے کوئی چیز ہے اس شخص سے جس پر تو گواہی دے رہا ہے؟ اس نے کہا کہ نہیں۔ آپ نے خصم سے فرمایا پھر میں کس چیز کی وجہ سے اس کی گواہی کو رد کروں؟ [مصنف ابن ابي شيبه/كتاب البيوع والأقضية/حدیث: 23171]

حضرت شعبی رحمہ اللہ فرماتے ہیں کہ سب سے قریبی رشتہ دار کہ جس کی گواہی جائز ہے وہ ایک بھائی کی دوسرے بھائی کے لیے گواہی ہے۔ [مصنف ابن ابي شيبه/كتاب البيوع والأقضية/حدیث: 23172]

حضرت ابراہیم رحمہ اللہ بھائی کی گواہی بھائی کے حق میں قبول (معتبر) سمجھتے تھے۔ [مصنف ابن ابي شيبه/كتاب البيوع والأقضية/حدیث: 23173]

حضرت شعبی رحمہ اللہ سے اسی طرح مروی ہے۔ [مصنف ابن ابي شيبه/كتاب البيوع والأقضية/حدیث: 23174]

حضرت ابن زبیر رضی اللہ عنہ نے بھائی کی گواہی کو بھائی کے حق میں معتبر قرار دیا۔ [مصنف ابن ابي شيبه/كتاب البيوع والأقضية/حدیث: 23175]