حضرت ابراہیم رحمہ اللہ اس شخص کے متعلق فرماتے ہیں جس نے مرض الوفات میں اپنا غلام آزاد کیا پھر فوت ہوگیا اور اس پر دین بھی ہو اور اس غلام کے علاوہ اس کے پاس مال بھی نہ ہو، فرماتے ہیں وہ اپنی قیمت کی بقدر کوشش کرے گا، اگر اس کی قیمت قرض سے زیادہ ہو تو وہ قرض خواہوں کے لئے ان کے قرض کی کوشش کرے گا، جو کچھ باقی رہ گیا ہے اس میں غور کیا جائے گا، پھر ورثاء کا اس میں دو تہائی ہوگا اور اس کا ایک تہائی حصہ ہوگا۔ [مصنف ابن ابي شيبه/كتاب البيوع والأقضية/حدیث: 23136]

حضرت شعبی رحمہ اللہ فرماتے ہیں کہ اگر کوئی شخص مرض الوفات میں غلام آزاد کر دے اور اس کے پاس اس کے علاوہ دوسرا مال نہ ہو، تو اس غلام کی منصفانہ قیمت لگائی جائے گی اور پھر وہ غلام اس قیمت میں کوشش کرے گا۔ [مصنف ابن ابي شيبه/كتاب البيوع والأقضية/حدیث: 23137]

حضرت مسروق رحمہ اللہ سے دریافت کیا گیا کہ ایک شخص نے مرض الوفات میں اپنا غلام آزاد کردیا اور اس کے پاس اس کے علاوہ دوسرا مال بھی نہیں ہے؟ آپ رحمہ اللہ نے فرمایا: اس کا یہ فیصلہ کل پر نافذ ہوگا، جس چیز کو اس نے اللہ کے لئے آزاد کیا میں اس کو رد نہیں کرسکتا۔ [مصنف ابن ابي شيبه/كتاب البيوع والأقضية/حدیث: 23138]

اور حضرت شریح رحمہ اللہ نے فرمایا: میں اس کے ایک ثلث پر نافذ کروں گا اور باقی دو ثلث میں اس سے کوشش کرواؤں گا۔ [مصنف ابن ابي شيبه/كتاب البيوع والأقضية/حدیث: 23139]

حضرت اسماعیل فرماتے ہیں کہ میں نے حضرت شعبی رحمہ اللہ سے عرض کیا کہ: دونوں میں سے کون سا قول آپ کو زیادہ پسند ہے؟ آپ رحمہ اللہ نے فرمایا: حضرت مسروق رحمہ اللہ کا قول فتویٰ میں مجھے پسند ہے۔ اور حضرت شریح رحمہ اللہ کا قول قضاء میں مجھے زیادہ پسند ہے۔ [مصنف ابن ابي شيبه/كتاب البيوع والأقضية/حدیث: 23140]

حضرت ابن مسعود رضی اللہ عنہارشاد فرماتے ہیں اس کا ثلث آزاد شمار ہوگا۔ [مصنف ابن ابي شيبه/كتاب البيوع والأقضية/حدیث: 23141]

حضرت ابراہیم رحمہ اللہ ایسے شخص کے متعلق فرماتے ہیں جو مرض الوفات میں اپنا غلام آزاد کر دے اور اس کے پاس اس کے علاوہ دوسرا مال بھی نہ ہو، اس کا ثلث آزاد شمار ہوگا، اور باقی دو ثلث میں وہ کوشش کرے گا؟ [مصنف ابن ابي شيبه/كتاب البيوع والأقضية/حدیث: 23142]

حضرت شعبی رحمہ اللہ فرماتے ہیں کہ اگر کوئی شخص اپنے غلام کو آزاد کرنے کی وصیت کرے تو وہ وصیت ثلث مال میں نافذ ہوگی، اگر غلام کی قیمت ثلث سے زائد ہو تو جو زائد رقم ہے اس کے لئے غلام کوشش کرے گا۔ [مصنف ابن ابي شيبه/كتاب البيوع والأقضية/حدیث: 23143]

حضرت یونس رحمہ اللہ سے مروی ہے کہ لوگ گمان کرتے تھے کہ حضرت حسن رحمہ اللہ نے اس شخص کے متعلق فرمایا تھا جس نے مرض الوفات میں اپنا بعض غلام آزاد کردیا تھا، آپ نے فرمایا جتنا اس نے آزاد کیا ہے اتنا آزاد شمار ہوگا، اور جو حصہ باقی ہے اس کی قیمت کے لئے اس غلام سے کوشش کرائی جائے گی۔ [مصنف ابن ابي شيبه/كتاب البيوع والأقضية/حدیث: 23144]

حضرت عطاء رحمہ اللہ اس شخص کے متعلق فرماتے ہیں جس نے اپنا ثلث غلام مرض الوفات میں آزاد کردیا، فرمایا: وہ ثلث مال میں نافذہو گا، اور اگر اس نے کچھ وصیتیں کی تھیں تو غلام سے قیمت کی کوشش کروائی جائے گی۔ [مصنف ابن ابي شيبه/كتاب البيوع والأقضية/حدیث: 23145]