حضرت یونس سے مروی ہے کہ دو آدمیوں کا ایک غلام تھا، انہوں نے اس کو اس شرط پر آزاد کیا کہ وہ ان کی خدمت کرے گا جب تک زندہ رہیں، پھر ان میں ایک نے اپنے ساتھی کا حصہ خرید لیا، پھر حضرت ابن سیرین سے اس کے متعلق دریافت کیا گیا آپ نے اس میں کوئی حرج نہ سمجھا۔ [مصنف ابن ابي شيبه/كتاب البيوع والأقضية/حدیث: 23466]

حضرت ابو جعفر سے مروی ہے کہ آنحضرت صلی اللہ علیہ وسلم نے مدبر غلام کی خدمت کو فروخت فرمایا۔ [مصنف ابن ابي شيبه/كتاب البيوع والأقضية/حدیث: 23467]

حسن فرماتے ہیں کہ جب تم مسلمانوں کے بازار جاؤ تو جو ملے اس کو خرید سکتے ہو جب تک تم کو معلوم نہ ہوجائے کہ یہ شے چوری یا خیانت کی ہے (تب نہ خریدنی چاہیے)۔ [مصنف ابن ابي شيبه/كتاب البيوع والأقضية/حدیث: 23468]

نبی کریم صلی اللہ علیہ وسلم کا ارشاد ہے، جس شخص کو معلوم ہو کہ یہ چوری کا مال ہے پھر بھی اس کو خرید لے تو وہ اس کی عار اور گناہ میں شریک ہے۔ [مصنف ابن ابي شيبه/كتاب البيوع والأقضية/حدیث: 23469]

حضرت ابن سیرین فرماتے ہیں کہ میں نے حضرت عبیدہ سے دریافت کیا کہ: کیا میں چوری کا مال خرید سکتا ہوں جبکہ مجھے معلوم ہو کہ یہ چوری کا مال ہے؟ فرمایا: نہیں۔ میں نے دریافت کیا: کیا میں خیانت کا مال خرید سکتا ہوں جبکہ مجھے معلوم ہو کہ یہ خیانت کا مال ہے؟ فرمایا: نہیں۔ میں نے دریافت کیا: کیا میں سرکاری ملازمت سے حاصل ہونے والا مال خرید سکتا ہوں؟ فرمایا: کیا تم اس کو چھوڑ سکتے ہو؟ [مصنف ابن ابي شيبه/كتاب البيوع والأقضية/حدیث: 23470]

حضرت عبیدہ سے اسی طرح مروی ہے۔ [مصنف ابن ابي شيبه/كتاب البيوع والأقضية/حدیث: 23471]

حضرت حماد کمیشن ایجنٹ کا اجرت لینے کو ناپسند کرتے تھے ہاں مگر اجرت متعین ہو۔ [مصنف ابن ابي شيبه/كتاب البيوع والأقضية/حدیث: 23472]

حضرت طاؤس فرماتے ہیں کہ میں نے حضرت ابن عباس رضی اللہ عنہما سے دریافت کیا کہ شہری دیہاتی کے لیے بیع نہ کرے، اس کا کیا مطلب ہے؟ انہوں نے جواب دیا کہ وہ دلال (ایجنٹ) نہیں بن سکتا۔ [مصنف ابن ابي شيبه/كتاب البيوع والأقضية/حدیث: 23473]

حضرت حکم فرماتے ہیں کہ اگر نقد خریدے تو کمیشن ایجنٹ کی اجرت دینے میں کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 23474]

اور حضرت حماد، ابراہیم اور حضرت ابن سیرین سے نقل کرتے ہیں کہ ان حضرات نے فرمایا: اگر نقد خریدے تو کمیشن ایجنٹ کی اجرت دینے میں کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 23475]