حضرت عائشہ رضی اللہ عنہا سے مروی ہے کہ حضرت ہند نبی کریم صلی اللہ علیہ وسلم کی خدمت میں حاضر ہوئی اور عرض کیا اے اللہ کے رسول صلی اللہ علیہ وسلم ! ابو سفیان بخیل انسان ہے اور مجھے اتنا نہیں دیتا جو میرے اور بچوں کے لئے کافی ہو، پھر میں اس کے مال میں سے اس کے علم کے بغیر کچھ نکال لیتی ہوں، آپ صلی اللہ علیہ وسلم نے فرمایا: جو تیرے اور بچوں کے لئے کافی ہو اتنا اچھے طریقے سے لے لیا کرو۔ [مصنف ابن ابي شيبه/كتاب البيوع والأقضية/حدیث: 23496]

حضرت حسن سے مروی ہے کہ ایک شخص نبی کریم صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول صلی اللہ علیہ وسلم ! میرا اور میری خاتون کا حکم (معاملہ) کیا ہے؟ آپ نے فرمایا تم دونوں کا کون سا معاملہ؟ اس نے عرض کیا کہ وہ میرے گھر سے میری اجازت کے بغیر صدقہ کرتی ہے، آپ نے فرمایا ثواب دونوں کو ملے گا، اس نے عرض کیا کہ اگر میں اس کو اس سے روک لوں؟ آپ نے فرمایا اس کو اس کا ثواب ملے گا جو اس نے ارادہ کیا اور تیرے لئے (وبال ہے) جو تو نے بخل سے کام لیا۔ [مصنف ابن ابي شيبه/كتاب البيوع والأقضية/حدیث: 23497]

حضرت سعد سے مروی ہے کہ جب آپ صلی اللہ علیہ وسلم نے خواتین سے بیعت لی تو ایک باوقار خاتون کھڑی ہوئی گویا کہ وہ مضر میں سے تھی، عرض کی اے اللہ کے رسول صلی اللہ علیہ وسلم ! ہم اپنے والدوں، شوہروں اور بیٹوں پر بوجھ ہیں، ان اموال میں سے ہمارے لئے کیا حلال ہے؟ آپ صلی اللہ علیہ وسلم نے ارشاد فرمایا: ہر وہ تر چیز (جس کو ذخیرہ نہیں کرسکتے) اس کو کھاؤ بھی اور ہدیہ بھی کرو۔ [مصنف ابن ابي شيبه/كتاب البيوع والأقضية/حدیث: 23498]

حضرت ابو امامہ باہلی رضی اللہ عنہ فرماتے ہیں کہ میں نے رسول اکرم صلی اللہ علیہ وسلم کو حجۃ الوداع میں فرماتے ہوئے سنا: کوئی بھی خاتون اپنے شوہر کے گھر سے اس کی اجازت کے بغیر خرچ نہ کرے، پوچھا گیا اے اللہ کے رسول صلی اللہ علیہ وسلم ! کھانا بھی؟ آپ صلی اللہ علیہ وسلم نے ارشاد فرمایا: وہ تو سب سے افضل مال ہے۔ [مصنف ابن ابي شيبه/كتاب البيوع والأقضية/حدیث: 23499]

حضرت شعبی رحمہ اللہ، محمد رحمہ اللہ اور حضرت شریح رحمہ اللہ فرماتے ہیں کہ شریک کا بیع کرنا جائز ہے جب تک منع نہ کیا گیا ہو۔ [مصنف ابن ابي شيبه/كتاب البيوع والأقضية/حدیث: 23500]

حضرت شعبی رحمہ اللہ فرماتے ہیں کہ ہر شریک کے لئے اپنی شرکت والی چیز کو فروخت کرنا جائز ہے، سوائے میراث والی مشترکہ چیز کے۔ [مصنف ابن ابي شيبه/كتاب البيوع والأقضية/حدیث: 23501]

حضرت سوید بن قیس کہتے ہیں کہ میں اور مخرفہ عبدی مقام ہجر سے کپڑا لائے۔ حضور صلی اللہ علیہ وسلم ہمارے پاس تشریف لائے اور ہم سے شلوار کا سودا کرنا چاہا۔ ہمارے پاس ایک وزن کرنے والا تھا جو اجرت پر وزن کرتا تھا۔ رسول اللہ صلی اللہ علیہ وسلم نے اس سے فرمایا کہ وزن کرو اور زیادہ دو۔ [مصنف ابن ابي شيبه/كتاب البيوع والأقضية/حدیث: 23502]

حضرت جابر رضی اللہ عنہ فرماتے ہیں کہ آنحضرت صلی اللہ علیہ وسلم نے مجھ سے اونٹ خریدا اور میرے لئے ثمن کو تولا اور کچھ زائد عطاء کیا۔ [مصنف ابن ابي شيبه/كتاب البيوع والأقضية/حدیث: 23503]

حضرت جابر رضی اللہ عنہ فرماتے ہیں کہ آنحضرت صلی اللہ علیہ وسلم کے ذمہ میرا کچھ قرض تھا، آپ نے وہ بھی اور کچھ زائد ادا فرمایا۔ [مصنف ابن ابي شيبه/كتاب البيوع والأقضية/حدیث: 23504]

حضرت ابو خالد فرماتے ہیں کہ حضرت حسن بن علی رضی اللہ عنہ کے ذمہ میرا قرض تھا، میں ان کے پاس وصول کرنے آیا وہ اس وقت حمام سے نکل رہے تھے، اور مہندی کے اثرات ان کے ناخونوں پر تھے، اور ان کی باندی بوتل سے ان کی مہندی کو صاف (کھرچ) کر رہی تھی۔ آپ نے ایک پیالہ منگوایا جس میں درہم تھے، اور مجھ سے فرمایا یہ لے لو، میں نے عرض کیا کہ یہ تو میرے حق سے زیادہ ہے، آپ نے فرمایا رکھ لو، میں نے وہ رکھ لئے اور اس میں میں نے اپنے حق سے ساٹھ یا ستر دراہم زائد پائے۔ [مصنف ابن ابي شيبه/كتاب البيوع والأقضية/حدیث: 23505]