محمد رحمہ اللہ سے مروی ہے کہ حضرت قاسم بن محمد اپنا جھگڑا ایک قاضی کے پاس لے کر گئے، انہوں نے اس کے خلاف فیصلہ کردیا، پھر اس قاضی کو معزول کردیا گیا، پھر اس کے بعد قاضی تبدیل ہوگیا۔ دوسرا قاضی قاسم کے حق میں فیصلہ کیا کرتا تھا۔ کسی نے ان سے کہا کہ اگر آپ جھگڑا اس کے پاس لے جاتے! حضرت قاسم نے فرمایا: نہیں، میں جھگڑا ایک قاضی کے پاس لے کر گیا تھا پس اس نے میرے خلاف فیصلہ کردیا۔ [مصنف ابن ابي شيبه/كتاب البيوع والأقضية/حدیث: 24636]

حضرت محمد رحمہ اللہ فرماتے ہیں کہ اس طرح کہہ کر اگر کوئی کپڑ ا فروخت کرے تو کوئی حرج نہیں ہے کہ اگر پورا لو گے تو دس درہم کا، اگر آدھا لو گے تو گیارہ درہم کا۔ [مصنف ابن ابي شيبه/كتاب البيوع والأقضية/حدیث: 24637]

حضرت عامر اس خط کو قابل عمل سمجھتے تھے جو قاضی کی طرف سے مہر لگا ہوا ان کے پاس آتا تھا۔ [مصنف ابن ابي شيبه/كتاب البيوع والأقضية/حدیث: 24638]

حضرت عمر بن ابو زائدہ سے مروی ہے کہ ہم کوفہ کے قاضی کا خط لے کر حضرت ایاس بن معاویہ کے پاس آئے، جب میں آیا تو حضرت ایاس کو معزول کردیا گیا تھا اور حضرت حسن کو قاضی بنادیا گیا تھا، میں نے اپنا خط ان کو دیا تو انہوں نے اس کو قبول فرمایا اور مجھ سے اس کے متعلق سوال نہیں کیا، پھر اس خط کو کھولا اور اس کو پھیلایا اور اس میں میرے لئے بصرہ کے ایک شخص کے خلاف پانچ سو دراہم پر دو گواہوں کی گواہی پائی، پھر آپ نے اُ س شخص سے کہا جو آپ کے پا س کھڑا تھا، اس کو ابن زیاد کے پاس لے جاؤ اور اُ س سے کہو کہ اس کو فلاں بن فلاں کے پاس بھیج دے اور اُ س سے پانچ سو دراہم وصول کر کے اس کو دے دو، راوی فرماتے ہیں کہ پھر وہ مجھے لے کر گیا اور اس نے اسی طرح کیا۔ [مصنف ابن ابي شيبه/كتاب البيوع والأقضية/حدیث: 24639]

حضرت ابراہیم فرماتے ہیں کہ قاضی کا قاضی کو خط لکھنا درست ہے اس کو نافذ کیا جائے گا۔ [مصنف ابن ابي شيبه/كتاب البيوع والأقضية/حدیث: 24640]

حضرت شعبی رحمہ اللہ گواہ سے دریافت کرتے تھے کہ وہ اس کو لے کر آئے جو اس کا تزکیہ کرے۔ [مصنف ابن ابي شيبه/كتاب البيوع والأقضية/حدیث: 24641]

حضرت داؤد بن سنان سے مروی ہے کہ ایک شخص نے آٹھ سو دراہم میں انار کا باغ خریدا، پھر اس میں سے کچھ بیس درہم میں فروخت کیا، پھر جو باقی بچا اس کو بیع مرابحہ کے طور پر فروخت کیا، پھر اس کے ساتھی کو معلو م ہوا تو وہ بازار کے امین کے پاس جھگڑا لے گیا، امین سوق نے اس کو اس سے بری کردیا، راوی فرماتے ہیں کہ میں نے حضرت سالم اور حضرت قاسم سے اس کے متعلق دریافت کیا؟ آپ دونوں حضرات نے فرمایا: درست نہیں ہے۔ [مصنف ابن ابي شيبه/كتاب البيوع والأقضية/حدیث: 24642]

حضرت ابراہیم فرماتے ہیں کہ اگر کوئی شخص جانور خریدنے کے بعد اس کی داڑھ میں عیب پائے اور اس کو واپس کرنا چاہے تو وہ یوں قسم اٹھائے گا کہ وہ اس داڑھ کے عیب کی وجہ سے واپس کر رہا ہے، اور اگر اس کے علاوہ کوئی عیب ہو تو پھر قسم نہیں اٹھائے گا۔ [مصنف ابن ابي شيبه/كتاب البيوع والأقضية/حدیث: 24643]

حضرت علی بن مدرک النخعی رحمہ اللہ سے مروی ہے کہ ایک شخص نے دوسرے سے باندی خریدی اس کی داڑھ نہ تھی، وہ جھگڑا حضرت شریح رحمہ اللہ کے پاس لے گیا، حضرت شریح نے فرمایا: تو اس بات پر گواہ پیش کر کہ اس نے تجھے بلا داڑھ کے باندی فروخت کی ہے، وگرنہ وہ قسم اٹھائے گا کہ اس نے تجھے فروخت کیا ہے اور اس کی داڑھ تھی۔ [مصنف ابن ابي شيبه/كتاب البيوع والأقضية/حدیث: 24644]

حضرت منصور فرماتے ہیں کہ میں نے حضرت ابراہیم سے دریافت کیا کہ جوتے بنانے والے نے میرے جوتے بغیر اجرت کے بنائے ہیں لیکن اس نے خراب بنائے ہیں تو کیا میں اس کو ضامن ٹھہراؤں؟ انہوں نے جواب دیا کہ میں اچھا نہیں سمجھتا کہ اجرت تو دی نہیں اور اب ضامن بھی بناؤ۔ [مصنف ابن ابي شيبه/كتاب البيوع والأقضية/حدیث: 24645]