حضرت حکم سے سوال کیا گیا کہ اگر غلاموں کی ایک جماعت کو مکاتب بنایا جائے اور ان میں سے کچھ مرجائیں تو کیا حکم ہے؟ انہوں نے فرمایا کہ ان کا حصہ ساقط ہوجائے گا۔ [مصنف ابن ابي شيبه/كتاب البيوع والأقضية/حدیث: 21766]

حضرت علی رضی اللہ عنہ سے سوال کیا گیا کہ ایک آدمی کوئی باندی خریدے اور اس باندی سے اس کی اولاد بھی ہو اور پھر کوئی آدمی اس بات پر گواہی قائم کردے کہ یہ باندی اس کی ہے تو کیا حکم ہے؟ انہوں نے فرمایا کہ یہ باندی اس کو واپس کی جائے گی، باندی کے بچے کی قیمت خریدار پر لگائی جائے گی اور باندی کو بیچنے والے سے اس کا جرمانہ وصول کیا جائے گا، خواہ وہ زیادہ ہو یا کم۔ [مصنف ابن ابي شيبه/كتاب البيوع والأقضية/حدیث: 21767]

ابراہیم فرماتے ہیں کہ اگر ایک آدمی نے اپنی باندی کو کسی آدمی کے پاس دیکھا کہ اس آدمی نے اس کی باندی کو خریدا اور اس سے اس آدمی کی اولاد ہوئی تو وہ باندی کو لے لے گا اور اولاد کے باپ سے اولاد کی قیمت لے گا اور اس قیمت میں سے کچھ کم کردے گا۔ [مصنف ابن ابي شيبه/كتاب البيوع والأقضية/حدیث: 21768]

حضرت ابومیسرہ فرماتے ہیں کہ ہر خادم کے بدلے ایک خادم ہے، یہ ایک طے شدہ فریضہ ہے جو دوہا اور باندھا جا چکا ہے۔ [مصنف ابن ابي شيبه/كتاب البيوع والأقضية/حدیث: 21769]

حضرت حسن فرماتے ہیں کہ ہر خادم کے بدلے ایک خادم ہے۔ [مصنف ابن ابي شيبه/كتاب البيوع والأقضية/حدیث: 21770]

حضرت محمد بن سالم کہتے ہیں کہ میں نے حضرت شعبی سے سوال کیا کہ لڑکے کی قیمت کب سے لگائی جائے گی؟ انہوں نے فرمایا کہ جس دن وہ پیدا ہوا۔ [مصنف ابن ابي شيبه/كتاب البيوع والأقضية/حدیث: 21771]

حضرت ابن ابی ملیکہ کہتے ہیں کہ حضرت ابن عباس رضی اللہ عنہما نے مجھے ایک خط میں لکھا کہ عاریہ (مانگی ہوئی چیز) کا ضمان دلواؤ اگر چیز کا مالک چاہے۔ [مصنف ابن ابي شيبه/كتاب البيوع والأقضية/حدیث: 21772]

حضرت سوادہ بن زیاد کہتے ہیں کہ میں نے حضرت عمر بن عبد العزیز کے نام خط لکھا کہ ایک عورت نے شادی کے لئے کسی سے زیور مانگا، پھر وہ زیور ضائع ہوگیا۔ اس کا کیا حکم ہے؟ انہوں نے فرمایا کہ اگر عورت نے اس میں کوئی خیانت نہیں کی تو ضمان نہیں ہے۔ [مصنف ابن ابي شيبه/كتاب البيوع والأقضية/حدیث: 21773]

حضرت عمر بن عبد العزیز عاریہ (مانگی ہوئی چیز) کا ضمان مقرر کرتے تھے۔ [مصنف ابن ابي شيبه/كتاب البيوع والأقضية/حدیث: 21774]

حضرت علی رضی اللہ عنہ عاریہ (مانگی ہوئی چیز) کے بارے میں فرماتے ہیں کہ وہ امانت ہے۔ [مصنف ابن ابي شيبه/كتاب البيوع والأقضية/حدیث: 21775]