حضرت ابن عباس رضی اللہ عنہما سے روایت ہے کہ جناب رسول اللہ صلی اللہ علیہ وآلہ وسلم نے گودنے والی اور گدوانے والی پر، بال جوڑنے والی اور بال جڑوانے والی پر لعنت فرمائی ہے۔ [مصنف ابن ابي شيبه/كتاب اللباس/حدیث: 26860]

حضرت علی رضی اللہ عنہ سے روایت ہے کہ جناب رسول اللہ صلی اللہ علیہ وآلہ وسلم نے گودنے والی اور گدوانے والی پر لعنت فرمائی۔ [مصنف ابن ابي شيبه/كتاب اللباس/حدیث: 26861]

حضرت فاطمہ بنت علی بن ابی طالب رحمہا اللہ سے روایت ہے۔ وہ کہتی ہیں کہ جناب رسول اللہ صلی اللہ علیہ وآلہ وسلم نے بالوں کے ساتھ بال جوڑنے والی پر لعنت فرمائی۔ [مصنف ابن ابي شيبه/كتاب اللباس/حدیث: 26862]

حضرت عائشہ رضی اللہ عنہا سے روایت ہے کہ انصار کی ایک لڑکی کی شادی ہوئی اور وہ بیمار ہوگئی۔ جس سے اس کے بال جھڑ گئے۔ لوگوں نے اس کے بال لگوانا چاہے تو جناب رسول اللہ صلی اللہ علیہ وآلہ وسلم سے اس کے بارے میں سوال کیا؟ آپ صلی اللہ علیہ وآلہ وسلم نے بال جوڑنے والی اور بال جڑوانے والی پر لعنت فرمائی۔ [مصنف ابن ابي شيبه/كتاب اللباس/حدیث: 26863]

حضرت سعید بن مسیب سے روایت ہے۔ وہ کہتے ہیں کہ حضرت معاویہ مدینہ میں تشریف لائے تو آپ نے ہمیں خطبہ ارشاد فرمایا اور بالوں کا ایک گچھا نکالا اور فرمایا: میرے خیال میں کوئی یہ کام نہیں کرتا۔ جناب رسول اللہ صلی اللہ علیہ وآلہ وسلم کو اس کی خبر پہنچی تھی تو آپ صلی اللہ علیہ وآلہ وسلم نے اس کو جھوٹ قرار دیا تھا۔ [مصنف ابن ابي شيبه/كتاب اللباس/حدیث: 26864]

حضرت عثمان بن غیاث، حضرت عکرمہ کے بارے میں روایت کرتے ہیں کہ وہ اس جوڑے کو ناپسند کرتے تھے، جو عورتیں، اپنے سروں میں بناتی ہیں۔ [مصنف ابن ابي شيبه/كتاب اللباس/حدیث: 26865]

حضرت ابوہریرہ سے روایت ہے۔ کہ جناب رسول اللہ صلی اللہ علیہ وآلہ وسلم نے ارشاد فرمایا: ”اللہ تعالیٰ نے بال جوڑنے والی اور بال جڑوانے والی، گودنے والی اور گدوانے والی پر لعنت فرمائی ہے۔“ [مصنف ابن ابي شيبه/كتاب اللباس/حدیث: 26866]

حضرت ابراہیم سے روایت ہے۔ وہ کہتے ہیں کہ اس جوڑے میں کوئی حرج نہیں ہے جو اوپر رکھا جاتا ہے۔ [مصنف ابن ابي شيبه/كتاب اللباس/حدیث: 26867]

حضرت بہیّہ، حضرت عائشہ رضی اللہ عنہا کے بارے میں روایت کرتی ہیں کہ وہ بالوں میں (بال) جوڑنے سے منع کرتی تھیں۔ [مصنف ابن ابي شيبه/كتاب اللباس/حدیث: 26868]

حضرت ابن عباس رضی اللہ عنہما سے روایت ہے۔ وہ کہتے ہیں کہ اگر اون کے ذریعہ جوڑا جائے تو پھر اس میں کوئی حرج نہیں ہے۔ [مصنف ابن ابي شيبه/كتاب اللباس/حدیث: 26869]