حضرت موسیٰ بن عُلیّ فرماتے ہیں کہ ان کے والد حضرت عُلیّ نے ارشاد فرمایا: کسی آدمی نے ابو عیسیٰ کنیت اختیار کی تو رسول اللہ صلی اللہ علیہ وآلہ وسلم نے ارشاد فرمایا: یقینا عیسیٰ کے والد نہیں تھے۔ [مصنف ابن ابي شيبه/ كتاب الأدب/حدیث: 28374]

حضرت اسلم فرماتے ہیں کہ حضرت عمر نے اپنے ایک بیٹے کو مارا جس نے ابو عیسیٰ کنیت اختیار کی اور فرمایا: یقینا حضرت عیسیٰ کے کوئی والد نہیں تھے۔ [مصنف ابن ابي شيبه/ كتاب الأدب/حدیث: 28375]

حضرت حمید فرماتے ہیں کہ حضرت حسن بصری نے ارشاد فرمایا: زیادہ ہنسنا دل کو مردہ کردیتا ہے۔ [مصنف ابن ابي شيبه/ كتاب الأدب/حدیث: 28376]

حضرت ثابت فرماتے ہیں کہ حضرت حسن بصری نے ارشاد فرمایا: مومن کا ہنسنا اس کے دل کے غافل ہونے کی نشانی ہے۔ [مصنف ابن ابي شيبه/ كتاب الأدب/حدیث: 28377]

حضرت عون فرماتے ہیں کہ نبی کریم صلی اللہ علیہ وآلہ وسلم ہنستے نہیں تھے مگر مسکرا کر اور متوجہ نہیں ہوتے تھے مگر مکمل طور پر۔ [مصنف ابن ابي شيبه/ كتاب الأدب/حدیث: 28378]

حضرت مجاہد فرماتے ہیں کہ حضرت عمر کو خبر ملی کہ ان کا مقرر کردہ گورنر قیلولہ نہیں کرتا۔ حضرت عمر نے اس کو خط لکھا: قیلولہ کیا کرو، اس لیے کہ مجھے بیان کیا گیا ہے کہ بیشک شیطان قیلولہ نہیں کرتا۔ [مصنف ابن ابي شيبه/ كتاب الأدب/حدیث: 28379]

حضرت مجاہد نے فرمایا: بیشک شیاطین قیلولہ نہیں کرتے۔ [مصنف ابن ابي شيبه/ كتاب الأدب/حدیث: 28380]

حضرت عبد الرحمن بن ابی لیلیٰ فرماتے ہیں کہ حضرت خوات بن جبیر جو بدری صحابی ہیں انہوں نے ارشاد فرمایا: دن کے ابتدائی حصہ میں سونا بےوقوفی ہے اور دن کے درمیان میں سونا فطرت ہے اور دن کے آخری حصہ میں سونا حماقت ہے۔ [مصنف ابن ابي شيبه/ كتاب الأدب/حدیث: 28381]

حضرت عبد الرحمن بن یزید بن جابر فرماتے ہیں کہ حضرت مکحول عصر کے بعد سونے کو مکروہ سمجھتے تھے اور فرماتے: ایسا کرنے پر وسوسوں میں مبتلا ہوجانے کا اندیشہ ہے۔ [مصنف ابن ابي شيبه/ كتاب الأدب/حدیث: 28382]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم کا گزر کسی آدمی کے پاس سے ہوا جو پیٹ کے بل لیٹا ہو اتھا۔ آپ صلی اللہ علیہ وآلہ وسلم نے فرمایا: بیشک یہ وہ لیٹنا ہے جسے اللہ پسند نہیں فرماتے۔ [مصنف ابن ابي شيبه/ كتاب الأدب/حدیث: 28383]