حضرت یعیش بن قیس بن طخفہ فرماتے ہیں کہ میرے والد اصحاب صفہ میں سے تھے وہ فرماتے ہیں کہ اس درمیان کہ میں سحر کے وقت پیٹ کے بل لیٹا ہو اتھا کہ اچانک کسی آدمی نے مجھے اپنے پاؤں سے دھکیلا اور فرمایا: یہ وہ لیٹنا جسے اللہ تعالیٰ سخت ناپسند فرماتے۔ آپ فرماتے ہیں کہ میں نے سر اٹھا کر دیکھا تو وہ رسول اللہ صلی اللہ علیہ وآلہ وسلم تھے۔ [مصنف ابن ابي شيبه/ كتاب الأدب/حدیث: 28384]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: ہر وہ خطبہ جس میں کلمہ شہادت نہ ہو وہ کٹے ہوئے ہاتھ کی مانند ہے۔ [مصنف ابن ابي شيبه/ كتاب الأدب/حدیث: 28385]

حضرت عطاء فرماتے ہیں کہ حضرت ابو البختری نے ارشاد فرمایا: ہر وہ ضرورت جس میں کلمہ شہادت نہ ہو تو وہ دم بریدہ ہے۔ [مصنف ابن ابي شيبه/ كتاب الأدب/حدیث: 28386]

حضرت حماد بن سلمہ فرماتے ہیں کہ حضرت حمید بن ھلال نے ارشاد فرمایا: ہر وہ خطبہ جس میں کلمہ شہادت نہ ہو تو وہ دم بریدہ ہے۔ [مصنف ابن ابي شيبه/ كتاب الأدب/حدیث: 28387]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ہر وہ شاندار کلام جس کی ابتدا لحمد للہ سے نہ کی جائے تو وہ نامکمل ہے۔ [مصنف ابن ابي شيبه/ كتاب الأدب/حدیث: 28388]

حضرت ابو المھزم فرماتے ہیں کہ حضرت ابوہریرہ نے کسی آدمی کو دیکھا جس کے پیچھے ایک لڑکا بھاگ رہا تھا، آپ نے فرمایا؛ اس کو بھی سوار کرلو۔ بیشک یہ تمہارا مسلمان بھائی ہے اور اس کی روح بھی تمہاری روح کی طرح ہے۔ [مصنف ابن ابي شيبه/ كتاب الأدب/حدیث: 28389]

حضرت یوسف بن مہاجر فرماتے ہیں کہ میں نے حضرت ابو جعفر کو دیکھا اس حال میں کہ وہ خچر یا خچرنی پر سوار تھے اور ان کے ساتھ ایک بچہ تھا جو ان کے دائیں بائیں جانب چل رہا تھا۔ [مصنف ابن ابي شيبه/ كتاب الأدب/حدیث: 28390]

حضرت شمیسہ فرماتی ہیں کہ میں نے حضرت عائشہ رضی اللہ عنہا کو یوں فرماتے ہوئے سنا کہ ان سے یتیم بچہ کو اد ب سکھانے کے متعلق سوال کیا گیا؟ آپ نے فرمایا: بیشک میں ان میں سے کسی کو مارتی ہوں یہاں تک کہ وہ سیدھا ہوجائے۔ [مصنف ابن ابي شيبه/ كتاب الأدب/حدیث: 28391]

حسن عرنی فرماتے ہیں کسی صحابی نے نبی کریم صلی اللہ علیہ وآلہ وسلم سے پوچھا: میں اپنے یتیم کو کس بات پر مار سکتا ہوں؟ آپ صلی اللہ علیہ وآلہ وسلم نے فرمایا: تم اس کو اس بات پر مارو جس پر تم اپنے بچہ کو مارتے ہو۔ [مصنف ابن ابي شيبه/ كتاب الأدب/حدیث: 28392]

حضرت ابو جعفر خطمی فرماتے ہیں کہ ان کے والد نے حضرت سعید بن مسیب سے سوال کیا یا یوں فرمایا: کہ انہوں نے اپنے غلام کو بھیجا اور میں ان کے ساتھ تھا کہ آدمی اپنے یتیم کو کس بات پر مار سکتا ہے؟ آپ نے فرمایا: جس بات پر آدمی اپنے بچہ کو مار سکتا ہے۔ [مصنف ابن ابي شيبه/ كتاب الأدب/حدیث: 28393]