حضرت محمد فرماتے ہیں کہ حضرت عائشہ رضی اللہ عنہا نے ارشاد فرمایا: تم یوں کہو کہ خاتم النبیین ہیں۔ یوں مت کہو: آپ صلی اللہ علیہ وآلہ وسلم کے بعد کوئی نبی نہیں۔ [مصنف ابن ابي شيبه/ كتاب الأدب/حدیث: 28354]

حضرت عامر فرماتے ہیں کہ کسی شخص نے حضرت مغر ہ بن شعبہ کے پاس یوں درود پڑھا۔ اللہ رحمت بھیجے محمد (صلی اللہ علیہ وآلہ وسلم) پر جو خاتم النبیین (صلی اللہ علیہ وآلہ وسلم) ہیں اور ان کے بعد کوئی نبی نہیں۔ حضرت مغیرہ نے فرمایا: تمہارے لیے اتنا کہنا کافی ہے کہ خاتم الانبیاء ہیں اس لیے کہ ہمیں بیان کیا جاتا تھا کہ عیسیٰ نکلنے والے ہیں۔ پس جب وہ نکل آئیں گے تو وہ آپ صلی اللہ علیہ وآلہ وسلم سے پہلے بھی تھے اور بعد میں بھی ہوئے۔ [مصنف ابن ابي شيبه/ كتاب الأدب/حدیث: 28355]

حضرت زہری فرماتے ہیں کہ نبی کریم صلی اللہ علیہ وآلہ وسلم نے چیونٹی اور شہد کی مکھی کو مارنے سے منع فرمایا ہے۔ [مصنف ابن ابي شيبه/ كتاب الأدب/حدیث: 28356]

حضرت حماد فرماتے ہیں کہ حضرت ابراہیم نے ارشاد فرمایا: جب چیونٹی تمہیں تکلیف پہنچائے تو تم اسے مار دو۔ [مصنف ابن ابي شيبه/ كتاب الأدب/حدیث: 28357]

حضرت خالد بن دینار فرماتے ہیں کہ میں نے حضرت ابو العالیہ کو دیکھا کہ انہوں نے اپنے بچھونے پر چیونٹیوں کو دیکھا تو انہیں مار دیا۔ [مصنف ابن ابي شيبه/ كتاب الأدب/حدیث: 28358]

حضرت سلیمان احول فرماتے ہیں کہ حضرت طاؤس نے ارشاد فرمایا: ہم چیونٹیوں کو پانی کے ذریعہ غرق کردیتے ہیں یعنی جب وہ ہمیں تکلیف پہنچاتی ہیں۔ [مصنف ابن ابي شيبه/ كتاب الأدب/حدیث: 28359]

حضرت ہشام بن عروہ فرماتے ہیں کہ میرے والد حضرت عروہ نے مجھے پو چھا: کیا تو نے لکھا ہے؟ میں نے کہا: جی ہاں! انہوں نے پوچھا: کیا تم نے اس کو اصل نسخہ سے ملا کر دیکھا؟ میں نے کہا: نہیں۔ انہوں نے فرمایا: (پھر تو) تم نے لکھا ہی نہیں۔ [مصنف ابن ابي شيبه/ كتاب الأدب/حدیث: 28360]

حضرت سوار بن عبد اللہ فرماتے ہیں کہ حضرت محمد مکروہ سمجھتے تھے کہ وہ کوئی ایسا واقعہ بیان کریں جس کے بارے میں وہ نہیں جانتے۔ [مصنف ابن ابي شيبه/ كتاب الأدب/حدیث: 28361]

حضرت ابو اسحاق فرماتے ہیں کہ حضرت عبداللہ بن مسعود مکروہ سمجھتے تھے کہ آدمی نماز کے علاوہ میں بھی دائیں طرف تھوک پھینکے۔ حضرت ابان نے راوی سے پوچھا: آپ نے کس سے نقل کیا: انہوں نے فرمایا: حضرت عبد الرحمن بن یزید سے انہوں نے حضرت عبد اللہ بن مسعود رضی اللہ عنہ سے۔ [مصنف ابن ابي شيبه/ كتاب الأدب/حدیث: 28362]

حضرت ابن عون فرماتے ہیں کہ حضرت ابن سیرین کے بائیں جانب ایک بند دروازہ تھا۔ آپ اس کی طرف متوجہ ہو کر اس میں تھوکا کرتے تھے۔ [مصنف ابن ابي شيبه/ كتاب الأدب/حدیث: 28363]