حضرت مسعر فرماتے ہیں کہ حضرت سعد بن ابراہیم نے ارشاد فرمایا: آدمی کی عقلمندی میں ہے کہ وہ کس جگہ تھوکتا ہے۔ [مصنف ابن ابي شيبه/ كتاب الأدب/حدیث: 28364]

حضرت عبد الرحمن بن یزید فرماتے ہیں کہ حضرت عبد اللہ بن مسعود رضی اللہ عنہ قبلہ رخ ہو کر بیٹھے ہوئے تھے۔ آپ نے اپنے بائیں جانب تھوکنے کا ارادہ کیا تو وہ جگہ بھری ہوئی تھی۔ پس آپ نے دائیں جانب تھوکنے کو مکروہ سمجھا۔ [مصنف ابن ابي شيبه/ كتاب الأدب/حدیث: 28365]

حضرت حمید بن ھلال فرماتے ہیں کہ حضرت معاذ نے ایک دن اپنے دائیں جانب تھوک دیا پھر فرمایا: آہ افسوس! جب سے مں ی نبی کریم صلی اللہ علیہ وآلہ وسلم کی صحبت میں آیا ہوں یا فرمایا: جب سے اسلام لایا ہوں، میں نے ایسا نہیں کیا۔ [مصنف ابن ابي شيبه/ كتاب الأدب/حدیث: 28366]

حضرت حمید بن ھلال فرماتے ہیں کہ حضرت ابوبکر نے اپنی ایک بیماری میں دائیں طرف تھوک دیا۔ اور فرمایا: میں نے ایسا کبھی نہیں کیا مگر صرف ایک مرتبہ یا یوں فرمایا: میں نے اس مرتبہ کے علاوہ ایسا کبھی نہیں کیا۔ [مصنف ابن ابي شيبه/ كتاب الأدب/حدیث: 28367]

حضرت ابن عون فرماتے ہیں کہ میں نے حضرت ابرہیم کے سامنے اس خبر سے اظہارِ براءت کی جو انہیں میرے متعلق پہنچی تھی۔ آپ نے فرمایا: تم عذر پیش مت کرو، ہم نے تمہارا عذر قبول کرلیا، عذر پیش کرنے سے پہلے ہی۔ [مصنف ابن ابي شيبه/ كتاب الأدب/حدیث: 28368]

حضرت رافع بن ابو رافع طائی فرماتے ہیں کہ میں حضرت ابوبکر کے پاس آیا اور میں نے کہا: آپ نے مجھے جو بھی حکم دیا تھا وہ دے دیا اور پھر آپ خود اس کام میں داخل ہوگئے جس میں داخل ہوئے۔ پھر آپ نے مسلسل عذر پیش کرتے رہے یہاں تک کہ میں نے ان کا عذر قبول کرلیا۔ [مصنف ابن ابي شيبه/ كتاب الأدب/حدیث: 28369]

حضرت ابراہیم فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: عذر کرنے سے بچو۔ اس لیے کہ اس میں بہت زیادہ جھوٹ ہوتا ہے۔ [مصنف ابن ابي شيبه/ كتاب الأدب/حدیث: 28370]

حضرت طارق فرماتے ہیں کہ امام شعبی نے ارشاد فرمایا: کہ حضرت شریح ہمارے پاس عذر پیش کرنے کے لیے تشریف لائے۔ [مصنف ابن ابي شيبه/ كتاب الأدب/حدیث: 28371]

حضرت شعبہ فرماتے ہیں کہ میں حضرت حکم کے ساتھ چل رہا تھا، اتنے میں ہم نے حضرت ابو معشر کو دیکھا، حضرت حکم نے فرمایا: بیشک ان کو میرے بارے میں یہ بات پہنچی ہے کہ میں نے ان کے متعلق کچھ کہا ہے۔ نہیں! اللہ کی قسم جس کے سوا کوئی معبود نہیں، میں نے ایسا کچھ نہیں کہا۔ راوی کہتے ہیں: جب حضرت ابو معشر آئے تو حضرت حکم نے ان کے سامنے عذر پیش کیا اور فرمایا: تحقیق میں نے شعبہ کے سامنے قسم اٹھائی ہے کہ جو بات آپ کو میری طرف سے پہنچی ہے وہ میں نے نہیں کہی۔ [مصنف ابن ابي شيبه/ كتاب الأدب/حدیث: 28372]

امام شعبی فرماتے ہیں کہ حضرت ابراہیم میرے پاس تشریف لائے اور آپ نے میرے سامنے اس بات کا عذر پیش کیا جو مجھے ان کی طرف سے پہنچی تھی۔ [مصنف ابن ابي شيبه/ كتاب الأدب/حدیث: 28373]