حضرت علی رضی اللہ عنہ جب ٹوٹتا ہوا ستارہ دیکھتے تو یہ دعا کرتے: اے اللہ! تو اس کو نشانے پر پہنچا اور اس کے ذریعہ نشانہ لگا اور ہمیں بچا اس چیز کے شر سے جس کے یہ پیچھے ہے۔ [مصنف ابن ابي شيبه/ كتاب الأدب/حدیث: 28334]

حضرت غیلان بن جریر فرماتے ہیں کہ حضرت مطرف نے ارشاد فرمایا: تم میں کوئی ہرگز دو مرتبہ جھوٹ مت بولے کہ وہ کسی چیز کے متعلق یوں کہے: کوئی چیز نہیں، وہ کوئی چیز نہیں۔ [مصنف ابن ابي شيبه/ كتاب الأدب/حدیث: 28335]

حضرت ابن عون فرماتے ہیں کہ حضرت محمد بن سیرین فرمایا کرتے تھے۔ یقینا یہ علم دین ہے تم غور کرلیا کرو کہ تم اس کو کس سے حاصل کر رہے ہو۔ [مصنف ابن ابي شيبه/ كتاب الأدب/حدیث: 28336]

حضرت مغیرہ فرماتے ہیں کہ حضرت ابراہیم مکروہ سمجھتے تھے یوں کہنے کو کہ گھر میں کوئی نہیں ہے اور فرماتے کہ: یوں کہنے میں کوئی حرج نہیں کہ گھر میں کوئی شخص بھی موجود نہیں ہے۔ [مصنف ابن ابي شيبه/ كتاب الأدب/حدیث: 28337]

ایوب فرماتے ہیں کہ ایک دن حضرت سعید بن جبیر نے ہمیں حدیث بیان کی۔ میں نے کھڑے ہو کر آپ سے عرض کیا: آپ اس کو دوبارہ دہرا دیں۔ آپ نے فرمایا: میں ہر وقت دودھ دوھ کر پلا نہیں سکتا۔ [مصنف ابن ابي شيبه/ كتاب الأدب/حدیث: 28338]

حضرت عبد الجبار فرماتے ہیں کہ میں نے حضرت ابن شھاب کو یوں فرماتے ہوئے سنا: حدیث کو دہرانا پتھروں کے اٹھانے سے زیادہ سخت ہے۔ [مصنف ابن ابي شيبه/ كتاب الأدب/حدیث: 28339]

حضرت عبایہ فرماتے ہیں کہ میں نے حضرت ابن عمر رضی اللہ عنہما کو وضو کروایا تو میں ان کی دائیں جانب کھڑا ہوگیا اور میں نے ان پر پانی ڈالا۔ جب آپ فارغ ہوئے تو آپ نے مجھ پر نظر ڈالی اور فرمایا: تم نے یہ ادب کہاں سے سیکھا؟ میں نے کہا: اپنے دادا حضرت رافع سے، انہوں نے فرمایا: تمہیں مبارک ہو۔ [مصنف ابن ابي شيبه/ كتاب الأدب/حدیث: 28340]

حضرت لیث فرماتے ہیں کہ حضرت مجاہد نے ارشاد فرمایا: جب تم اپنے بھائی سے ملو تو اس سے مت پوچھو! کہ تم کہاں سے آئے؟ اور نہ یہ پوچھو کہ تم کہا جا رہے ہو؟ اور نہ تم اپنے بھائی کی طرف گھور کردیکھو۔ [مصنف ابن ابي شيبه/ كتاب الأدب/حدیث: 28341]

حضرت یحییٰ بن ابی کثیر فرماتے ہیں کہ مجھے یہ حدیث پہنچی ہے کہ رسول اللہ صلی اللہ علیہ وآلہ وسلم نے ارشاد فرمایا: جب تم میں کوئی جھکی ہوئی دیوار یا جھکی ہوئی چوٹی کے پاس سے گزرے تو اس کو چاہیے کہ وہ جلدی چلے، اور اللہ رب العزت سے عافیت کا سوال کرے۔ [مصنف ابن ابي شيبه/ كتاب الأدب/حدیث: 28342]

حضرت یزید بن نعامہ ضبی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جب ایک آدمی دوسرے آدمی کو اپنا بھائی بنائے تو اس کو چاہیے کہ وہ اس سے اس کا نام اور اس کے والد کا نام پوچھ لے اور یہ پوچھ لے کہ وہ کس قبیلہ سے ہے؟ اس لیے کہ یہ بات محبت کو زیادہ کرنے والی ہے۔ [مصنف ابن ابي شيبه/ كتاب الأدب/حدیث: 28343]