حضرت نافع فرماتے ہیں کہ حضرت ابن عمر رضی اللہ عنہما نے اس آدمی کے بارے میں جو کسی گھر یا مسجد میں داخل ہو اور وہاں کوئی نہ ہو یوں ارشاد فرمایا: کہ وہ شخص یوں کہے۔ (السَّلاَمُ عَلَیْنَا وَعَلَی عِبَادِ اللہِ الصَّالِحِینَ)۔ [مصنف ابن ابي شيبه/ كتاب الأدب/حدیث: 27504]

حضرت ابراہیم فرماتے ہیں کہ تم یہ کہو: ہم پر اور اللہ کے نیک بندوں پر سلامتی ہو۔ [مصنف ابن ابي شيبه/ كتاب الأدب/حدیث: 27505]

حضرت ابو سنان فرماتے ہیں کہ حضرت ماھان نے اللہ رب العزت کے اس قول: { فَإِذَا دَخَلْتُمْ بُیُوتًا فَسَلِّمُوا عَلَی أَنْفُسِکُمْ تَحِیَّۃً مِنْ عِنْدِ اللہِ مُبَارَکَۃً طَیِّبَۃً } کے بارے میں یوں ارشاد فرمایا: کہ وہ آدمی یوں سلام کرے: (السَّلاَمُ عَلَیْنَا مِنْ رَبِّنَا) ہم پر ہمارے رب کی طرف سے سلامتی ہو۔ [مصنف ابن ابي شيبه/ كتاب الأدب/حدیث: 27506]

حضرت عبدالکریم فرماتے ہیں کہ حضرت مجاہد یوں فرماتے تھے: السَّلاَمُ عَلَیْنَا، وَعَلَی عِبَادِ اللہِ الصَّالِحِینَ۔ [مصنف ابن ابي شيبه/ كتاب الأدب/حدیث: 27507]

حضرت عبد الکریم فرماتے ہیں کہ حضرت مجاہد نے ارشاد فرمایا: جب تم کسی گھر میں داخل ہو جہاں کوئی بھی نہ ہو تو تم یوں کہو: ”اللہ کے نام کے ساتھ داخل ہوتا ہوں۔ سب تعریفیں اللہ کے لیے ہیں۔ ہم پر اور اللہ کے نیک بندوں پر سلامتی ہو۔“ [مصنف ابن ابي شيبه/ كتاب الأدب/حدیث: 27508]

حضرت عبد الملک فرماتے ہیں کہ حضرت عطاء نے ارشاد فرمایا: جب گھر میں کوئی نہ ہو تو یوں کہا کرو۔ السلام علینا من ربنا۔ ہم پر ہمارے رب کی طرف سے سلامتی ہو۔ [مصنف ابن ابي شيبه/ كتاب الأدب/حدیث: 27509]

حضرت ابن سیرین فرماتے ہیں کہ ایک آدمی نے حضرت ابن عمر رضی اللہ عنہما کو خط میں یوں لکھا: اللہ کے نام کے ساتھ فلاں شخص کے لیے، اس پر حضرت ابن عمر رضی اللہ عنہما نے فرمایا: رک جاؤ۔ یقینا اللہ کا نام صرف اسی کے لیے خاص ہے۔ [مصنف ابن ابي شيبه/ كتاب الأدب/حدیث: 27510]

حضرت مغیرہ فرماتے ہیں کہ حضرت ابراہیم خط کے شروع میں یوں لکھنے کو مکروہ سمجھتے تھے۔ بسم اللّٰہ الرحمٰن الرحیم لفلان۔ اور اس کو پتہ کے شروع میں لکھنے میں کوئی حرج نہیں سمجھتے تھے۔ [مصنف ابن ابي شيبه/ كتاب الأدب/حدیث: 27511]

حضرت حمید فرماتے ہیں کہ حضرت بکر نے ارشاد فرمایا: یوں لکھا کرو۔ (الی فلان) فلاں آدمی کی طرف، یوں مت لکھا کرو۔ لِفلان۔ یعنی فلاں آدمی کے لیے۔ [مصنف ابن ابي شيبه/ كتاب الأدب/حدیث: 27512]

حضرت دینار فرماتے ہیں کہ حضرت ابن حنفیہ نے ارشاد فرمایا: کہ بسم اللّٰہ لفلان لکھنے میں کوئی حرج کی بات نہیں ہے۔ [مصنف ابن ابي شيبه/ كتاب الأدب/حدیث: 27513]