حضرت ابو سنان فرماتے ہیں کہ حضرت سعید بن جبیر نے ارشاد فرمایا: اگر فرعون بھی مجھے کہے: بارک اللّٰہ فیک: اللہ تجھ میں برکت دے تو میں بھی کہوں گا اور تجھ میں بھی۔ [مصنف ابن ابي شيبه/ كتاب الأدب/حدیث: 27494]

حضرت ابو الزبیر فرماتے ہیں کہ میں نے حضرت جابر سے اس آدمی کے بارے میں سوال کیا: جو مجھ سے اجازت تو طلب کرے اور سلام نہ کرے کیا میں اسے اجازت دے دوں؟ آپ نے فرمایا: میں ناپسند کرتا ہوں کہ میں اس کو اجازت دوں اور لوگ تو ایسے ہی کرتے ہیں۔ [مصنف ابن ابي شيبه/ كتاب الأدب/حدیث: 27495]

حضرت عطاء فرماتے ہیں کہ حضرت ابوہریرہ نے ارشاد فرمایا: تم اجاز ت نہ دو، یہاں تک کہ سلام کے ذریعہ تم سے اجازت مانگی جائے۔ [مصنف ابن ابي شيبه/ كتاب الأدب/حدیث: 27496]

حضرت ابو الاحوص فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: جب تجھے بلایا گیا ہو تو یہ تیرے لیے اجازت ہے، پس سلام کر پھر داخل ہوجا۔ [مصنف ابن ابي شيبه/ كتاب الأدب/حدیث: 27497]

حضرت ابن بریدہ فرماتے ہیں کہ ایک آدمی نے نبی کریم صلی اللہ علیہ وآلہ وسلم کے صحابہ میں سے کسی صحابی سے اجازت مانگی اس حال میں کہ وہ دروازے پر کھڑے ہوئے تھے۔ اس شخص نے تین مرتبہ کہا۔ کیا میں داخل ہو جاؤں؟ آپ اس کی طرف دیکھ رہے تھے مگر س کو اجازت نہیں دی۔ پھر اس نے ان سے یوں پوچھا: السلام علیکم کیا میں داخل ہو جاؤں؟ آپ نے اس سے کہا: داخل ہو جاؤ۔ پھر فرمایا: اگر تم پوری رات بھی کھڑے ہو کر کہتے رہتے کہ کیا میں داخل ہو جاؤں؟ تو میں تمہیں اجازت نہ دیتا یہاں تک کہ تم سلام سے ابتداء کرتے۔ [مصنف ابن ابي شيبه/ كتاب الأدب/حدیث: 27498]

حضرت صالح القدادی فرماتے ہیں کہ میرے گھر والوں نے مجھے حضرت سعید بن جبیر کے پاس ہدیہ دے کر بھیجا، میں ان کے دروازے پر پہنچا اس حال میں کہ وہ وضو فرما رہے تھے۔ میں نے کہا: کیا میں داخل ہو جاؤں؟ پس وہ تین دفعہ خاموش رہے۔ فرمایا: یوں کہو: السلام علیکم۔ راوی کہتے ہیں، پھر میں داخل ہوگیا تو آپ نے فرمایا: میں نے تمہیں سنت کے راستہ پر چلتے ہوئے نہیں دیکھا لہٰذا میں نے تمہیں سنت سکھا دی۔ [مصنف ابن ابي شيبه/ كتاب الأدب/حدیث: 27499]

حضرت جابر فرماتے ہیں کہ میں نے نبی کریم صلی اللہ علیہ وآلہ وسلم سے اجازت طلب کی تو آپ صلی اللہ علیہ وآلہ وسلم نے پوچھا: یہ کون شخص ہے؟ میں نے کہا: میں ہوں۔ اس پر نبی کریم صلی اللہ علیہ وآلہ وسلم نے فرمایا: میں میں! میں میں کیا ہوتا ہے۔ [مصنف ابن ابي شيبه/ كتاب الأدب/حدیث: 27500]

حضرت ابو مجلز فرماتے ہیں کہ حضرت ابن عمر رضی اللہ عنہما جب اجازت طلب کرتے اور ان کو یوں کہہ دیا جاتا، کہ سلامتی کے ساتھ داخل ہوجاؤ، تو آپ واپس لوٹ جاتے اور فرماتے میں نہیں جانتا کہ میں سلامتی کے ساتھ ہوں گا یا بغیر سلامتی کے؟ [مصنف ابن ابي شيبه/ كتاب الأدب/حدیث: 27501]

حضرت ابو الجراح فرماتے ہیں کہ اہل حجاز میں سے ایک آدمی نے بیان کیا کہ میری بیوی نے مجھے کہا: تم حضرت ابوہریرہ کو میرے پاس لے آؤ یہاں تک کہ میں ان سے اپنے متعلق فتویٰ پوچھ لوں، پس میں آپ کے پاس آیا تو آپ میرے ساتھ آگئے، جب ہم دروازے پر پہنچے تو آپ نے فرمایا: گھر میں داخل ہو جاؤ، تو میں داخل ہوگیا اور میں نے کہا: یہ حضرت ابوہریرہ آگئے ہیں۔ آپ نے فرمایا: السلام علیکم: کیا میں داخل ہو جاؤں؟ ہم نے کہا: آپ سلامتی کے ساتھ داخل ہوجائیں۔ آپ نے دو بارہ کہا: السلام علیکم، کیا میں داخل ہو جاؤں؟ ہم نے پھر کہا: آپ سلامتی کے ساتھ داخل ہوجائیں۔ آپ نے فرمایا: تم لوگ یوں کہو کہ داخل ہوجائیں۔ آپ نے پوچھا: السلام علیکم، کیا میں داخل ہو جاؤں؟ ہم نے ان سے کہا: داخل ہوجائیں۔ پس آپ داخل ہوگئے۔ [مصنف ابن ابي شيبه/ كتاب الأدب/حدیث: 27502]

حضرت عمرو فرماتے ہیں کہ حضرت عکرمہ نے ارشاد فرمایا: جب تم ایسے گھر میں داخل ہو جس میں کوئی نہ ہو تو تم یوں کہو: (السَّلاَمُ عَلَیْنَا وَعَلَی عِبَادِ اللہِ الصَّالِحِینَ) سلامتی ہو ہم پر اور اللہ کے نیک بندوں پر۔ [مصنف ابن ابي شيبه/ كتاب الأدب/حدیث: 27503]