حضرت مغیرہ فرماتے ہیں کہ جب حضرت ابراہیم کو سلام کیا جاتا تو آپ یوں جواب دیتے وعلیکم اور جب ان سے پوچھا جاتا: آپ کیسے ہیں؟ تو آپ جواب دیتے اللہ کی نعمت میں ہوں۔ [مصنف ابن ابي شيبه/ كتاب الأدب/حدیث: 27474]

حضرت اسماعیل بن ابی خالد فرماتے ہیں کہ ایک آدمی نے امام شعبی سے پوچھا: اے ابو عمرو! آپ نے کس حالت میں صبح کی؟ آپ نے فرمایا: نعمتوں میں۔ میں نے پوچھا: کس کی نعمت میں؟ آپ نے فرمایا: اللہ کی نعمتوں میں۔ [مصنف ابن ابي شيبه/ كتاب الأدب/حدیث: 27475]

حضرت مغیرہ فرماتے ہیں کہ حضرت علی رضی اللہ عنہ سے جب بیماری کی حالت میں پوچھا جاتا کہ آپ کیسے ہیں؟ آپ فرماتے بہت بری حالت میں اور یہ آیت تلاوت فرماتے۔ ترجمہ: اور ہم تمہیں آزمائیں گے خیر اور شر کے ساتھ۔ [مصنف ابن ابي شيبه/ كتاب الأدب/حدیث: 27476]

ایوب فرماتے ہیں کہ ایک آدمی حضرت عکرمہ سے مدینہ میں ملا، اور پوچھا: آپ کیسے ہیں؟ آپ نے فرمایا: بری حالت میں ہوں، میرے دونوں ہاتھ پھٹے ہوئے ہیں اور میں اس طرح اور اس طرح ہوں۔ راوی فرماتے ہیں کہ آپ اس آیت کی تاویل کرتے تھے۔ { وَنَبْلُوکُمْ بِالشَّرِّ وَالْخَیْرِ فِتْنَۃً وَإِلَیْنَا تُرْجَعُونَ }۔ [مصنف ابن ابي شيبه/ كتاب الأدب/حدیث: 27477]

حضرت عطاء بن سائب فرماتے ہیں کہ حضرت ابو عبد الرحمن سلمی سے جب پوچھا جاتا: کہ آپ کیسے ہیں؟ تو آپ فرماتے خیریت کے ساتھ اور ہم اللہ کا شکر ادا کرتے ہیں۔ [مصنف ابن ابي شيبه/ كتاب الأدب/حدیث: 27478]

حضرت عطاء فرماتے ہیں کہ میں نے حضرت ابو البختری کے سامنے یہ ذکر کیا تو آپ نے تین مرتبہ فرمایا: انہوں نے یہ طریقہ کہاں سے لیا؟ [مصنف ابن ابي شيبه/ كتاب الأدب/حدیث: 27479]

حضرت ابن عون فرماتے ہیں کہ ایک آدمی امام محمد سے ملا اور پوچھا: آپ کیسے ہیں؟ آپ نے فرمایا: بہت بری حالت میں ہوں۔ مجھے بھوک لگتی ہے اور میں اتنی طاقت نہیں رکھتا کہ میں سیر ہو سکوں اور مجھے پیاس لگتی ہے اور میں طاقت نہیں رکھتا کہ میں پیاس بجھا لوں۔ [مصنف ابن ابي شيبه/ كتاب الأدب/حدیث: 27480]

حضرت منصور فرماتے ہیں کہ ابراہیم نے ارشاد فرمایا: وہ حضرات اس بات کو ناپسند کرتے تھے کہ ان کے پیچھے چلا جائے۔ [مصنف ابن ابي شيبه/ كتاب الأدب/حدیث: 27481]

حضرت عبد اللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم کو کبھی نہیں دیکھا گیا کہ آپ صلی اللہ علیہ وآلہ وسلم نے ٹیک لگا کر کھانا کھایا ہو اور نہ ہی کبھی آپ صلی اللہ علیہ وآلہ وسلم کے پیچھے دو آدمی چلے۔ [مصنف ابن ابي شيبه/ كتاب الأدب/حدیث: 27482]

حضرت حارث بن سوید فرماتے ہیں کہ حضرت عمار نے ایک آدمی کو یوں بد دعا دی۔ اے اللہ! اگر یہ شخص جھوٹا ہے تو تو اس کے لیے دنیا کو کشادہ کر دے اور اس کو ایسا بنا دے کہ اس کے پیچھے پیچھے لوگ چلیں۔ [مصنف ابن ابي شيبه/ كتاب الأدب/حدیث: 27483]