حضرت عبد اللہ بن عکیم فرماتے ہیں کہ حضرت ابوبکر نے ہمیں خطبہ دیا اور فرمایا: أَمَّابَعْدُ۔ [مصنف ابن ابي شيبه/ كتاب الأدب/حدیث: 27534]

حضرت بلال بن حارث فرماتے ہیں کہ حضرت عمر بن خطاب نے خطبہ دیا اور فرمایا: أَمَّابَعْدُ۔ [مصنف ابن ابي شيبه/ كتاب الأدب/حدیث: 27535]

امام محمد فرماتے ہیں کہ حضرت ابو موسیٰ نے حضرت عامر بن عبد اللہ کو جو حضرت ابن عبد القیس کے نام سے پکارے جاتے تھے کو خط میں یوں لکھا۔ أَمَّابَعْدُ۔ [مصنف ابن ابي شيبه/ كتاب الأدب/حدیث: 27536]

حضرت علقمہ فرماتے ہیں کہ میں حضرت عبد اللہ بن مسعود رضی اللہ عنہ کے ساتھ سلیحین مقام سے آ رہا تھا، کہ مقام حیرہ کے کچھ زمیندار بھی آپ کے ساتھ ہو لیے، جب یہ لوگ کوفہ میں داخل ہوئے تو انہوں نے اس راستہ کو چھوڑ کر دوسرا راستہ پکڑ لیا تو آپ ان کی طرف متوجہ ہوئے اور آپ نے ان کو دیکھا کہ وہ راستہ سے ہٹ گئے ہیں تو آپ نے ان کو سلام کیا، میں نے پوچھا: کیا آپ نے ان کافروں کو سلام کیا؟ آپ نے فرمایا: بیشک ان لوگوں نے میرا ساتھ اختیار کیا اور ساتھی کا بھی کچھ حق ہے۔ [مصنف ابن ابي شيبه/ كتاب الأدب/حدیث: 27537]

حضرت ابراہیم فرماتے ہیں کہ حضرت علقمہ نے فرمایا کہ حضرت عبد اللہ بن مسعود رضی اللہ عنہ نے ان کو اشارے سے زیادہ کچھ نہیں کہا۔ [مصنف ابن ابي شيبه/ كتاب الأدب/حدیث: 27538]

حضرت شعیب بن حبحاب فرماتے ہیں کہ میں حضرت علی بن عبد اللہ البارقی رحمہ اللہ کے ساتھ تھا کہ ہمارے پاس سے ایک یہودی یا نصرانی گزرا جس کے پاس کھانے کا بوجھ تھا۔ حضرت علی رحمہ اللہ نے اس کو سلام کیا۔ اس پر حضرت شعیب کہتے ہیں کہ میں نے فرمایا: یہ تو یہودی یا نصرانی ہے! تو حضرت علی رحمہ اللہ نے سورة زخرف کے آخری حصہ کی تلاوت فرمائی۔ ترجمہ: قسم ہے رسول کے اس کہے کی کہ اے رب یہ لوگ ہیں کہ یقین نہیں لاتے، سو تو منہ پھیر لے ان کی طرف سے اور کہہ سلام ہے۔ اب آخر کو وہ معلوم کرلیں گے۔ [مصنف ابن ابي شيبه/ كتاب الأدب/حدیث: 27539]

حضرت معمر فرماتے ہیں کہ مجھے خبر پہنچی کہ حضرت ابوہریرہ ایک یہودی کے پاس سے گزرے اور اس کو سلام کیا۔ آپ کو بتلایا گیا: یہ تو یہودی ہے! آپ نے فرمایا: اے یہودی مجھے میرا سلام لوٹا دو اور میں تمہارے لیے دعا کرتا ہوں۔ اس یہودی نے کہا کہ تحقیق میں نے اس کو لوٹا دیا۔ آپ نے یوں دعا فرمائی۔ اے اللہ! اس کے مال اور اولاد کو بڑھا دے۔ [مصنف ابن ابي شيبه/ كتاب الأدب/حدیث: 27540]

حضرت عاصم فرماتے ہیں کہ اما م محمد نے ارشاد فرمایا: سوار پیدل چلنے والے کو سلام کرے گا، اور پیدل چلنے والا بیٹھے ہوئے کو سلام کرے گا اور جب دو شخص ایک ہی حالت میں ملیں تو ان میں سے آخری ہی سلام میں پہل کرے گا۔ [مصنف ابن ابي شيبه/ كتاب الأدب/حدیث: 27541]

حضرت حصین فرماتے ہیں کہ میں اور امام شعبی ایک سوار آدمی سے ملے تو امام شعبی نے سلام میں پہل کی، میں نے عرض کیا۔ آپ سلام میں پہل کررہے ہیں حالانکہ ہم دونوں پیدل ہیں اور وہ سوار ہے؟ آپ نے فرمایا: میں نے حضرت شریح کو دیکھا تھا کہ آپ نے سوار کو سلام کیا۔ [مصنف ابن ابي شيبه/ كتاب الأدب/حدیث: 27542]

حضرت برد فرماتے ہیں کہ حضرت مکحول اور حضرت سلیمان بن موسیٰ ان دونوں حضرات نے ارشاد فرمایا: چھوٹا بڑے کو سلام کرے گا، اور کھڑا شخص بیٹھے ہوئے کو سلام کرے گا، اور سوار شخص پیدل چلنے والے کو سلام کرے گا، اور تھوڑے لوگ زیادہ لوگوں کو سلام کریں گے۔ [مصنف ابن ابي شيبه/ كتاب الأدب/حدیث: 27543]