حضرت یونس فرماتے ہیں کہ ایک آدمی نے حضرت حسن کی جانب سے صالح بن عبد الرحمن کی طرف خط لکھا تو اس نے یوں لکھا، بسم اللہ الرحمن الرحیم۔ حسن کی جانب سے صالح کی طرف، تو ایک آدمی نے کہا: اے ابو سعید اگر آپ اس کے نام سے ابتدا کرتے تو اچھا ہوتا، تو آپ نے اس شخص کے نام سے ابتدا کی۔ [مصنف ابن ابي شيبه/ كتاب الأدب/حدیث: 27564]

حضرت اسماعیل مکی فرماتے ہیں کہ حضرت حسن بصری اور حضرت نخعی یہ دونوں حضرات اس بات میں کوئی حرج نہیں سمجھتے تھے کہ ایک آدمی کسی آدمی کو خط لکھے تو اس کے نام سے خط کی ابتدا کرے۔ [مصنف ابن ابي شيبه/ كتاب الأدب/حدیث: 27565]

حضرت ابوفزارہ فرماتے ہیں کہ حضرت حکم نے ارشاد فرمایا: اس میں کوئی حرج نہیں کہ تم جس کی طرف خط لکھ رہے ہو اس کے نام سے خط کی ابتدا کرو۔ [مصنف ابن ابي شيبه/ كتاب الأدب/حدیث: 27566]

حضرت ابو رافع فرماتے ہیں کہ حضرت ابوہریرہ نے ارشاد فرمایا: کہ حضرت زینب کا نام برّہ تھا۔ ان کو کہا گیا کہ تم نے اپنے نفس کی پاکیزگی بیان کی! پس رسول اللہ صلی اللہ علیہ وآلہ وسلم نے ان کا نام زینب رکھ دیا۔ [مصنف ابن ابي شيبه/ كتاب الأدب/حدیث: 27567]

حضرت نافع فرماتے ہیں کہ حضرت ابن عمر رضی اللہ عنہما نے ارشاد فرمایا: کہ حضر ت عمر کی ایک بیٹی تھی جس کا نام عاصیہ تھا، پس رسول اللہ صلی اللہ علیہ وآلہ وسلم نے اس کا نام جمیلہ رکھ دیا۔ [مصنف ابن ابي شيبه/ كتاب الأدب/حدیث: 27568]

حضرت خیثمہ فرماتے ہیں کہ میرے والد کا نام زمانہ جاہلیت میں عزیز تھا، پس رسول اللہ صلی اللہ علیہ وآلہ وسلم نے ان کا نام عبدالرحمن رکھ دیا۔ [مصنف ابن ابي شيبه/ كتاب الأدب/حدیث: 27569]

حضرت عروہ بن زبیر فرماتے ہیں کہ نبی کریم صلی اللہ علیہ وآلہ وسلم جب کوئی بُرا نام سنتے تو آپ صلی اللہ علیہ وآلہ وسلم اس نام کو اچھے نام سے تبدیل فرما دیتے۔ [مصنف ابن ابي شيبه/ كتاب الأدب/حدیث: 27570]

حضرت کریب فرماتے ہیں کہ حضرت ابن عباس رضی اللہ عنہما نے ارشاد فرمایا کہ حضرت جویریہ کا نام برہ تھا، پس رسول اللہ صلی اللہ علیہ وآلہ وسلم نے ان کا نام تبدیل فرما دیا۔ [مصنف ابن ابي شيبه/ كتاب الأدب/حدیث: 27571]

حضرت عروہ بن زبیر فرماتے ہیں کہ ایک آدمی کا نام حباب تھا پس رسول اللہ صلی اللہ علیہ وآلہ وسلم نے اس کا نام عبد اللہ رکھا اور فرمایا: حباب تو شیطان ہے۔ [مصنف ابن ابي شيبه/ كتاب الأدب/حدیث: 27572]

حضرت عروہ نے فرمایا: ایک آدمی کا نام مضطجع تھا پس رسول اللہ صلی اللہ علیہ وآلہ وسلم نے اس کا نام منبعث رکھا۔ [مصنف ابن ابي شيبه/ كتاب الأدب/حدیث: 27573]