حضرت عامر فرماتے ہیں کہ قریش کے ان لوگوں میں سے جن کا نام عاصی تھا سوائے حضرت مطیع کے کسی نے اسلام کو نہیں قبول کیا اور ان کا نام عاصی تھا پس رسول اللہ صلی اللہ علیہ وآلہ وسلم نے ان کا نام مطیع رکھا۔ [مصنف ابن ابي شيبه/ كتاب الأدب/حدیث: 27574]

حضرت عبد اللہ بن سلام فرماتے ہیں کہ میں رسول اللہ صلی اللہ علیہ وآلہ وسلم کے پاس آیا اور میرا نام عبد اللہ بن سلام نہیں تھا، رسول اللہ صلی اللہ علیہ وآلہ وسلم نے میرا نام عبد اللہ بن سلام رکھا۔ [مصنف ابن ابي شيبه/ كتاب الأدب/حدیث: 27575]

حضرت ھانی بن شریح فرماتے ہیں کہ ایک قوم وفد لے کر نبی کریم صلی اللہ علیہ وآلہ وسلم کے پاس آئی پس آپ صلی اللہ علیہ وآلہ وسلم نے سنا کہ ان لوگوں نے ایک آدمی کو عبد الحجر کے نام سے پکارا، آپ صلی اللہ علیہ وآلہ وسلم نے اس شخص سے پوچھا: تیرا نام کیا ہے؟ اس نے کہا: عبد الحجر، تو رسول اللہ صلی اللہ علیہ وآلہ وسلم نے اس سے فرمایا: بیشک تم تو عبداللہ (اللہ کے بندے) ہو۔ [مصنف ابن ابي شيبه/ كتاب الأدب/حدیث: 27576]

حضرت مسروق فرماتے ہیں کہ میں حضرت عمر بن خطاب سے ملا تو آپ نے پوچھا! تم کون ہو؟ میں نے عرض کیا: کہ مسروق بن اجدع ہوں۔ اس پر حضرت عمر نے فرمایا کہ میں نے رسول اللہ صلی اللہ علیہ وآلہ وسلم کو یوں فرماتے سنا کہ اجدع تو شیطان ہے۔ [مصنف ابن ابي شيبه/ كتاب الأدب/حدیث: 27577]

حضرت اعمش فرماتے ہیں کہ حضرات ابن عمر رضی اللہ عنہما نے عبد ربہ نام رکھنے کو ناپسند کیا۔ [مصنف ابن ابي شيبه/ كتاب الأدب/حدیث: 27578]

حضرت عبد الکریم فرماتے ہیں کہ حضرت مجاہد نے عبد ربہ نام کو ناپسند کیا۔ [مصنف ابن ابي شيبه/ كتاب الأدب/حدیث: 27579]

حضرت ابن ابی نجیح فرماتے ہیں کہ حضرت مجاہد نے ارشاد فرمایا: کہ اللہ نے مالک نام رکھنے کو ناپسند فرمایا۔ [مصنف ابن ابي شيبه/ كتاب الأدب/حدیث: 27580]

حضرت سمرہ فرماتے ہیں کہ رسول اللہ صلی اللہ علیہ وآلہ وسلم نے ہمیں اپنے غلاموں کے چار نام رکھنے سے منع فرمایا: و ہ نام یہ ہیں۔ أفلح، نافع، رباح، اور یسار۔ [مصنف ابن ابي شيبه/ كتاب الأدب/حدیث: 27581]

حضرت جابر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: اگر میں زندہ رہا تو ان شاء اللہ میں اپنی امت کو ان ناموں کے رکھنے سے منع کروں گا۔ نافع، افلح، اور برکۃ۔ [مصنف ابن ابي شيبه/ كتاب الأدب/حدیث: 27582]

حضرت اعمش فرماتے ہیں کہ مجھے معلوم نہیں کہ راوی نے رافع نام ذکر کیا یا نہیں۔ اس لیے کہ جب کوئی آدمی آ کر پوچھتا: کیا برکۃ یہاں ہے؟ تو گھر والے کہتے ہیں: نہیں۔ [مصنف ابن ابي شيبه/ كتاب الأدب/حدیث: 27583]