حضرت سعید بن جبیر فرماتے ہیں کہ حضرت ابن عباس رضی اللہ عنہما اس آیت کو یوں پڑھتے تھے:{ دارست }۔ اور اس شعر سے استشہاد فرماتے:: دارس صاب اور علقم کے ذائقہ کی طرف کڑوا ہے۔ [مصنف ابن ابي شيبه/ كتاب الأدب/حدیث: 27754]

حضرت ابن عباس رضی اللہ عنہما فرماتے ہیں کہ قرآن مجید میں مستعمل لفظ زنیم سے مراد کمینہ، (کسی قوم کے ساتھ) ملایا ہوا شخص ہے۔ پھر آپ نے یہ شعر پڑھا۔: ایسا زنیم جسے لوگ زائد طور پر اپنے ساتھ بلاتے ہیں، جیسے چمڑے کی چوڑائی میں پائے زائد کر دیے جاتے ہیں۔ [مصنف ابن ابي شيبه/ كتاب الأدب/حدیث: 27755]

حضرت عباد فرماتے ہیں کہ قبیلہ بنو لیث کا ایک آدمی نبی کریم صلی اللہ علیہ وآلہ وسلم کی خدمت میں آیا اور کہا: یا رسول اللہ صلی اللہ علیہ وآلہ وسلم! کیا میں آپ صلی اللہ علیہ وآلہ وسلم کو شعر سناؤں؟ آپ صلی اللہ علیہ وآلہ وسلم نے تین مرتبہ فرمایا: نہیں: پھر چوتھی مرتبہ انہوں نے مدحیہ اشعار سنائے تو آپ صلی اللہ علیہ وآلہ وسلم نے فرمایا: اگر کوئی شاعر اچھا کہتا ہے تو تو نے اچھا کہا ہے۔ [مصنف ابن ابي شيبه/ كتاب الأدب/حدیث: 27756]

حضرت قتادہ فرماتے ہی کہ حضرت ابن عباس رضی اللہ عنہما نے ارشاد فرمایا: میں اللہ رب العزت کے قول: { رَبَّنَا افْتَحْ بَیْنَنَا وَبَیْنَ قَوْمِنَا بِالْحَقِّ } کے بارے میں نہیں جانتا تھا کہ اس کا کیا مطلب ہے۔ یہاں تک کہ میں نے بنت ذی یزن کو کہتے ہوئے سنا: آؤ میں تمہارا فیصلہ کروں۔ [مصنف ابن ابي شيبه/ كتاب الأدب/حدیث: 27757]

حضرت عامر فرماتے ہیں کہ حضرت ابن زبیر نے جبکہ وہ بیت اللہ کا طواف کر رہے تھے، حضرت خالد کے اشعار پڑھوائے۔ [مصنف ابن ابي شيبه/ كتاب الأدب/حدیث: 27758]

حضرت ہشام بن عروہ فرماتے ہیں کہ حضرت ابن زبیر نے اپنے مخالفین پر حملہ کردیا یہاں تک کہ ان کو دروازوں سے باہر نکال دیا۔ اور آپ نے یہ رجز پڑھا:: اگر میرا مقابل ایک ہی ہوتا تو میں اس کے لیے کافی ہوتا۔ اور یہ شعر پڑھ رہے تھے۔: ہم وہ لوگ نہیں ہیں جن کی ایڑیوں پر زخموں سے خون ٹپکتا ہے، ہمارا خون تو ہمارے پیروں پر گرتا ہے۔ [مصنف ابن ابي شيبه/ كتاب الأدب/حدیث: 27759]

حضرت ہشام بن عروہ فرماتے ہیں کہ حضرت عروہ بن زبیر نے ارشاد فرمایا: کہ شام والے حضرت ابن زبیر سے قتال کر رہے تھے اور چیخ چیخ کر پکار رہے تھے: اے ذات نطاقین کے بیٹے (دو پٹکے باندھنے والی عورت کے بیٹے)۔ حضرت ابن زبیر نے فرمایا:: یہ ایسا طعنہ ہے جس کی عار تجھ سے دور ہے۔ حضرت اسمائ نے پوچھا: کیا وہ لوگ اس سے تجھے عار دلاتے ہیں؟ آپ نے فرمایا: جی ہاں حضرت اسمائ نے فرمایا: اللہ کی قسم! یہ حق ہے۔ [مصنف ابن ابي شيبه/ كتاب الأدب/حدیث: 27760]

حضرت سفیان کسی شیخ سے نقل کرتے ہیں کہ حضرت ابن زبیر بیت اللہ کے طواف کے دوران شعر پڑھ رہے تھے۔ [مصنف ابن ابي شيبه/ كتاب الأدب/حدیث: 27761]

حضرت داؤد فرماتے ہیں کہ حضرت سعید بن مسیب نے ارشاد فرمایا: سورج طلوع نہیں ہوتا یہاں تک کہ اس کے ساتھ تین سو ستر فرشتے ہوتے ہیں۔ کیا تم نے امیہ بن ابی صلت کو کہتے ہوئے نہیں سنا: یہ سورج ہم پر اپنی خوشی سے طلوع نہیں ہوتا بلکہ اسے عذاب دیا جاتا ہے اور اسے کوڑے مارے جاتے ہیں۔ [مصنف ابن ابي شيبه/ كتاب الأدب/حدیث: 27762]

حضرت مجالد فرماتے ہیں کہ امام شعبی شعر کے آغاز میں بسم اللہ الرحمن الرحیم لکھنے کو مکروہ سمجھتے تھے۔ [مصنف ابن ابي شيبه/ كتاب الأدب/حدیث: 27763]