حضرت عامر فرماتے ہیں کہ حضرت حارثہ بن بدر تمیمی جو کہ بصری ہیں انہوں نے یہ شعر پڑھا:: جب تم ہمدان سے ملاقات کرو تو انہیں ہماری طرف سے سلام دینا اور پیغام دینا کہ ہمدان کو عیب دار کرنے والا دشمن سالم نہیں رہ سکتا۔ میں قسم کھا کر کہتا ہوں کہ ہمدان والے اللہ سے ڈرتے ہیں اور ان کا خطیب کتاب اللہ کی روشنی میں فیصلہ کرتا ہے۔ اور یہ شعر پڑھا:: میرے سر کے بال سفید ہوگئے اور ہماری عقلوں کو موت کی کڑک اور چمک نے ہلکا کردیا۔ ہمارے دل موت کو میٹھا سمجھتے ہیں اور زندگی کو کڑوا۔ حضرت عامر فرماتے ہیں: یہ بات حضرت عبد اللہ بن جعفر کو بیان کی گئی تو آپ نے فرمایا: ہم لوگ ہمدان سے زیادہ ان اشعار کے حقدار تھے۔ [مصنف ابن ابي شيبه/ كتاب الأدب/حدیث: 27734]

حضرت عبد اللہ بن عمرو رضی اللہ عنہ فرماتے ہیں کہ جب لوگوں نے صفین جنگ سے اپنے ہاتھ کھڑے کرلیے تو حضرت عمرو بن العاص نے یہ اشعار کہے:: جب جنگ بھڑک اٹھی تو میں نے اس کے لیے اونچے شانوں اور بھری ہوئی پیٹھ والا گھوڑا تیار کیا۔ وہ ایک دوڑ کو دوسری دوڑ سے ملاتا ہے اور جب گھوڑے تیز دوڑ سے اچھلنے لگیں تو وہ تیزی سے آگے نکلتا ہے۔ وہ مضبوط ہے، اس کا سب سے بڑا حصہ اس کا پیٹ ہے، اور جب وہ پانی سے بھیگ جائے تو نظر جما کر آگے دیکھتا ہے۔ اور حضرت عبد اللہ بن عمرو رضی اللہ عنہ نے یہ اشعار پڑھے:: اگر جمل نامی عورت صفیں میں میری بہادری کو دیکھ لیتا تو اس کے بال سفید ہوجاتے۔ جب عراق والے اس طرح حملہ آور ہوئے جیسے گھٹا چھاتی ہے۔ ہم اپنے دشمنوں کو نیست ونابود کرنے کے لیے اس طرح آئے ہیں کہ ہمارے لشکر سمندر کی موجوں کی طرح ہیں۔ دن کے روشن ہونے پر ہمارے اور ان کے درمیان جب جنگ تیزہوئی تو نہ کسی نے پیٹھ پھیر نہ کوئی فرار ہوا۔ جب کوئی کہے کہ وہ تیزی سے پیٹھ پھیر گئے تو اتنی دیر میں ان کے مزید لشکر ظاہر ہوجاتے ہیں۔ وہ یہ کہتے ہیں کہ حضرت علی رضی اللہ عنہ کے ہاتھ پر بعتی کرلو، ہم کہتے ہیں کہ ہم جنگ کریں گے۔ (محمد عوامہ کی تحقیق کے مطابق ان اشعار کی نسبت ان جلیل القدر صحابہ کی طرف درست نہیں۔ انہوں نے اپنے اس موقف کو بہت سے دلائل سے ثابت کیا ہے۔ دیکھیے۔ مصنف ابن ابی شیبہ ج ١٣ صفحہ ٣٠٤) [مصنف ابن ابي شيبه/ كتاب الأدب/حدیث: 27735]

حضرت حمزہ ابو عمارہ فرماتے ہیں کہ حضرت عمر بن عبد العزیز نے حضرت عبید اللہ بن عبد اللہ بن عتبہ سے فرمایا: تمہیں شعر سے کیا تعلق؟ انہوں نے کہا جو چیز سینے میں ہو اسے نکالے بغیر گزارہ نہیں۔ [مصنف ابن ابي شيبه/ كتاب الأدب/حدیث: 27736]

امام زہری فرماتے ہیں کہ میں نے جب بھی حضرت عبید اللہ بن عبد اللہ سے ملاقات کی گویا میں نے کسی سمندر میں انقلاب پیدا کردیا ہو۔ [مصنف ابن ابي شيبه/ كتاب الأدب/حدیث: 27737]

حضرت ابو سلمہ فرماتے ہیں کہ رسول اللہ صلی اللہ علیہ وآلہ وسلم کے صحابہ تنگ مزاج اور سکڑے ہوئے نہیں تھے اور نہ ہی مصنوعی طور پر مردہ دلی دکھانے والے تھے۔ وہ اپنی مجلسوں میں اشعار پڑھا کرتے تھے، اور زمانہ جاہلیت کے واقعات ذکر کرتے تھے۔ اور جب ان میں سے کسی سے اس کے دین کے کسی معاملے میں کوئی بات منوانے کا ارادہ کیا جاتا تو اس کی آنکھوں کے حلقے ایسے گھومتے تھے گویا کہ وہ شخص مجنون ہو۔ [مصنف ابن ابي شيبه/ كتاب الأدب/حدیث: 27738]

حضرت محمد بن فضیل فرماتے ہیں کہ حضرت ابن شبرمہ نے ارشاد فرمایا: فرزدق سب سے بڑا شاعر تھا۔ [مصنف ابن ابي شيبه/ كتاب الأدب/حدیث: 27739]

حضرت ابو سفیان سعدی فرماتے ہیں کہ میں نے حضرت حسن بصری کو کسی شاعر کا یہ شعر پڑھتے ہوئے سنا:: جب آدمی مہلک بیماری کی پہچان حاصل کرلے گا تو اسے اپنے تقویٰ اور پرہیز گاری پر خوشی ہوگی۔ [مصنف ابن ابي شيبه/ كتاب الأدب/حدیث: 27740]

حضرت عائشہ رضی اللہ عنہا فرماتی ہیں کہ جب رسول اللہ صلی اللہ علیہ وآلہ وسلم کو بات پہنچنے میں تاخیر ہوجاتی تو آپ صلی اللہ علیہ وآلہ وسلم طرفہ بن عبد کا یہ شعر پڑھتے: اور تمہارے پاس خبریں وہ شخص لائے گا جسے تم نے زاد راہ نہیں دیا۔ [مصنف ابن ابي شيبه/ كتاب الأدب/حدیث: 27741]

حضرت عیینہ کے والد حضرت عبد الرحمن فرماتے ہیں کہ میں اپنے والد کے ساتھ مسجد میں رسول اللہ صلی اللہ علیہ وآلہ وسلم کے صحابہ کی مجلس میں بیٹھا کرتا تھا وہ لوگ اشعار پڑھتے تھے اور زمانہ جاہلیت کی باتیں ذکر کرتے۔ [مصنف ابن ابي شيبه/ كتاب الأدب/حدیث: 27742]

حضرت جابر بن سمرۃ فرماتے ہیں کہ ہم لوگ نبی کریم صلی اللہ علیہ وآلہ وسلم کی خدمت میں آتے تھے۔ اور ہم میں ہر کوئی مجلس کے آخری حصہ تک بیٹھتا تھا۔ اور صحابہ شعر پڑھتے اور زمانہ جاہلیت کے واقعات کا ذکر کرتے۔ رسول اللہ صلی اللہ علیہ وآلہ وسلم کے سامنے، اور آپ صلی اللہ علیہ وآلہ وسلم ان کو منع نہیں کرتے اور کبھی کبھار مسکرا دیتے۔ [مصنف ابن ابي شيبه/ كتاب الأدب/حدیث: 27743]