حضرت مطرف فرماتے ہیں کہ میں سفر میں حضرت عمران بن حصین کے ساتھ تھا۔ کوئی دن ایسا نہیں گزرا جس میں آپ نے شعر نہ پڑھا ہو۔ [مصنف ابن ابي شيبه/ كتاب الأدب/حدیث: 27744]

حضرت ہشام فرماتے ہیں کہ کسی آدمی نے جو نماز پڑھنے کا ارادہ کر رہا تھا اس نے حضرت محمد سے یہ سوال کیے اس حال میں کہ آپ مسجد میں تھے کیا شعر پڑھنے والا دوبارہ وضو کرے گا؟ اور مسجد میں شعر پڑھا جاسکتا ہے؟ راوی کہتے ہیں کہ آپ نے حضرت حسان بن ثابت کے ان فصیح اشعار کو پڑھا پھر آپ نے نماز شروع کردی۔ [مصنف ابن ابي شيبه/ كتاب الأدب/حدیث: 27745]

حضرت اسود بن سریع فرماتے ہیں کہ میں نے عرض کی: یا رسول اللہ صلی اللہ علیہ وآلہ وسلم! یقینا میں نے اللہ کی مدح و تعریف میں بھی اشعار کہے ہیں اور آپ کی مدح میں بھی، آپ صلی اللہ علیہ وآلہ وسلم نے فرمایا: سناؤ، اور جو تم نے اللہ کی مدح بیان کی ہے اس سے ابتدا کرو۔ [مصنف ابن ابي شيبه/ كتاب الأدب/حدیث: 27746]

حضرت ثابت فرماتے ہیں کہ حضرت انس نے ارشاد فرمایا: میں جنگ میں حاضر تھا کہ حضرت عبد اللہ بن رواحہ نے کہا: اے نفس! میں دیکھ رہا ہوں کہ تجھے جنت میں جانا پسند نہیں۔ میں اللہ کی قسم کھا کر کہتا ہوں کہ تجھے جنت میں جانا ہوگا خواہ خوش ہو کر جا یا ناخوش ہوکر۔ [مصنف ابن ابي شيبه/ كتاب الأدب/حدیث: 27747]

حضرت قاسم فرماتے ہیں کہ حضرت عائشہ رضی اللہ عنہا نے ارشاد فرمایا: اس حال میں کہ حضرت ابوبکر فیصلہ فرما رہے تھے اور میں یہ شعر پڑھ رہی تھی۔: وہ سفید چہرے والا جس کی ذات کے وسیلہ سے بادل مانگے جاتے ہیں۔ وہ یتیموں کی پناہ گاہ اور بیواؤں کی عزت و آبرو ہیں۔ حضرت ابوبکر نے فرمایا: وہ تو رسول اللہ صلی اللہ علیہ وآلہ وسلم ہیں۔ [مصنف ابن ابي شيبه/ كتاب الأدب/حدیث: 27748]

امام زہری فرماتے ہیں کہ رسول اللہ صلی اللہ علیہ وآلہ وسلم نے کوئی ایسا شعر نہیں کہا جو آپ سے پہلے نہ کہا گیا ہو سوائے اس شعر کے:: یہ بوجھ خیبر کے بوجھ کی طرح نہیں ہے۔ اے ہمارے رب! یہ زیادہ نیک اور زیادہ پاکیزہ ہے۔ (یہ شعر آپ نے مسجد نبوی کی تعمیر کے وقت کہا تھا) [مصنف ابن ابي شيبه/ كتاب الأدب/حدیث: 27749]

حضرت براء بن عازب فرماتے ہیں کہ میں نے نبی کریم صلی اللہ علیہ وآلہ وسلم کو غزوہ خندق کے دن دیکھا اس حال میں کہ آپ صلی اللہ علیہ وآلہ وسلم کے سینہ مبارک پر بہت زیادہ بال تھے، اور آپ صلی اللہ علیہ وآلہ وسلم عبد اللہ بن رواحہ کے ان اشعار کو بطور رجز پڑھ رہے تھے۔ اور فرما رہے تھے۔ اے اللہ! اگر آپ کا فضل نہ ہوتا تو ہم ہدایت یافتہ نہ ہوتے۔ اور نہ ہم صدقہ کرنے اور نہ ہم نماز پڑھتے۔ پس تو ہم پر رحمت و سکینہ نازل فرما اور دشمن سے ملاقات ہونے کی صورت میں ہمیں ثابت قدمی عطا فرما۔ یقینا ان لوگوں نے ہم پر سرکشی کی۔ اور اگر وہ ہمارے خلاف فتنہ پیدا کریں گے تو ہم قبول نہیں کریں گے۔ [مصنف ابن ابي شيبه/ كتاب الأدب/حدیث: 27750]

حضرت براء بن عازب فرماتے ہیں کہ رسول اللہ صلی اللہ علیہ وآلہ وسلم غزوہ حنین کے دن پیٹھ پھیر کر نہیں بھاگے۔ اور حضرت عباس اور حضرت ابو سفیان نے آپ صلی اللہ علیہ وآلہ وسلم کے خچر کی لگام پکڑی ہوئی تھی اور آپ صلی اللہ علیہ وآلہ وسلم فرما رہے تھے کہ: میں نبی ہوں، اس میں کوئی جھوٹ نہیں ہے۔ میں عبد المطلب کا بیٹا ہوں۔ [مصنف ابن ابي شيبه/ كتاب الأدب/حدیث: 27751]

حضرت جندب بن سفیان فرماتے ہیں کہ نبی کریم صلی اللہ علیہ وآلہ وسلم کسی غار میں تھے کہ آپ صلی اللہ علیہ وآلہ وسلم کی انگلی کو چوٹ لگ گئی تو آپ صلی اللہ علیہ وآلہ وسلم نے فرمایا: تو تو محض ایک انگلی ہے جس سے خون بہہ رہا ہے اور تجھے اللہ کے راستے میں چوٹ آئی ہے۔ [مصنف ابن ابي شيبه/ كتاب الأدب/حدیث: 27752]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: یقینا زندگی تو آخرت کی زندگی ہے۔ اے اللہ! تو انصار اور مہاجرین کی مغفرت فرما۔ [مصنف ابن ابي شيبه/ كتاب الأدب/حدیث: 27753]