حضرت شیبانی فرماتے ہیں کہ حضرت شعبی نے ارشاد فرمایا: کہ یمن کے علاقہ وادعہ میں ایک شخص مردہ حالت میں پایا گیا پس یہ معاملہ حضرت عمر کی خدمت میں پیش کیا گیا تو آپ نے ان میں سے پچاس آدمیوں سے یوں قسم اٹھوائی ہم نے قتل نہیں کیا اور نہ ہمیں قاتل معلوم ہے پھر آپ نے اس مقتول کی دیت ادا کی۔ [مصنف ابن ابي شيبه/كتاب الديات/حدیث: 29651]

حضرت ہشام فرماتے ہیں کہ حضرت حسن بصری نے ارشاد فرمایا: قسامت میں یوں اللہ کی قسم اٹھوائی جائے گی، ہم نے قتل نہیں کیا اور نہ ہمیں قاتل معلوم ہے۔ [مصنف ابن ابي شيبه/كتاب الديات/حدیث: 29652]

حضرت حسن بصری اور حضرت محمد بن سیرین یہ دونوں حضرات فرماتے ہیں کہ حضرت شریح نے ان لوگوں سے یوں قسم اٹھوائی: اللہ کی قسم ہم نے قتل نہیں کیا اور نہ ہمیں قاتل کا علم ہے۔ [مصنف ابن ابي شيبه/كتاب الديات/حدیث: 29653]

حضرت ابن ابو ملیکہ فرماتے ہیں کہ حضرت عمر بن عبدالعزیز اور حضرت ابن زبیر نے قسامت کے ذریعہ قصاص لیا۔ [مصنف ابن ابي شيبه/كتاب الديات/حدیث: 29654]

حضرت معمر سے مروی ہے کہ حضرت زہری فرمایا کرتے تھے کہ بیشک قسامت کے ذریعہ بھی قصاص لیا جاسکتا ہے۔ [مصنف ابن ابي شيبه/كتاب الديات/حدیث: 29655]

حضرت قاسم فرماتے ہیں کہ حضرت عمر نے ارشاد فرمایا: بیشک قسامت دیت ہی کو لازم کرتی ہے اور خون نہیں بہاتی۔ [مصنف ابن ابي شيبه/كتاب الديات/حدیث: 29656]

حضرت حسن بصری فرماتے ہیں کہ حضرت ابوبکر، حضرت عمر اور پہلی جماعت یہ سب حضرات قسامت کے ذریعے قتل نہیں کرتے تھے۔ [مصنف ابن ابي شيبه/كتاب الديات/حدیث: 29657]

حضرت فضیل فرماتے ہیں کہ حضرت ابراہیم نے ارشاد فرمایا قسامۃ کے ذریعہ قصاص لینا ظلم ہے۔ [مصنف ابن ابي شيبه/كتاب الديات/حدیث: 29658]

حضرت سعید فرماتے ہیں کہ حضرت قتادہ نے ارشاد فرمایا: قسامت دیت کا حقدار تو بناتی ہے لیکن اس کی وجہ سے قصاص نہیں لیا جاسکتا۔ [مصنف ابن ابي شيبه/كتاب الديات/حدیث: 29659]

حضرت ابو معشر فرماتے ہیں کہ نخعی نے ارشاد فرمایا: قسامت کے ذریعے دیت کا حقدار ہوتا ہے اس کے ذریعے قصاص نہیں لیا جاسکتا۔ [مصنف ابن ابي شيبه/كتاب الديات/حدیث: 29660]