حضرت شداد بن اوس مرفوعاً بیان کرتے ہیں کہ یقینا اللہ رب العزت نے ہر چیز پر اچھا برتاؤ فرض کردیا ہے پس جب تم قتل کرو تو احسن انداز میں قتل کرو۔ [مصنف ابن ابي شيبه/كتاب الديات/حدیث: 29771]

حضرت صفیہ بنت مغیرہ بن شعبہ فرماتی ہیں کہ رسول اللہ صلی اللہ علیہ وآلہ وسلم نے مثلہ کرنے سے منع فرمایا۔ [مصنف ابن ابي شيبه/كتاب الديات/حدیث: 29772]

حضرت ابو الاشعث فرماتے ہیں کہ حضرت شداد بن اوس نے مرفوعا بیان کیا ہے کہ یقینا اللہ رب العزت نے ہر چیز پر اچھا برتاؤ کرنا فرض کیا ہے پس جب تم قتل کرو تو احسن انداز میں کرو اور جب تم ذبح کرو تو احسن انداز میں ذبح کرو۔ [مصنف ابن ابي شيبه/كتاب الديات/حدیث: 29773]

حضرت علقمہ فرماتے ہیں کہ حضرت عبداللہ بن مسعود نے ارشاد فرمایا: قتل میں سب سے زیادہ عمدگی برتنے والے اہل ایمان ہیں۔ [مصنف ابن ابي شيبه/كتاب الديات/حدیث: 29774]

حضرت عبید بن تعلی رحمہ اللہ فرماتے ہیں کہ ہم لوگ روم کے علاقہ میں جہاد کرنے کے لیے گئے اور رسو ل اللہ (صلی اللہ علیہ وآلہ وسلم) کے صحابی حضرت ابو ایوب انصاری بھی ہمارے ساتھ تھے۔ اور حضرت معاویہ کے زمانے میں لوگوں پر حضرت عبدالرحمن بن خالد بن ولید امیر تھے۔ ہم آپ کے پاس تھے کہ ایک آدمی آپ کے پاس آیا اور کہنے لگا: ابھی امیر کے پاس چار عجمی کافر لائے گئے۔ تو اس نے حکم دیا اور ان کو باندھ دیا گیا۔ ان کو تیر مارے گئے یہاں تک کہ ان کو مار دیا۔ راوی کہتے ہیں حضرت ابو ایوب انصاری گھبرا کر اٹھے یہاں تک کہ آپ حضرت عبدالرحمن کے پاس تشریف لائے اور فرمایا: کیا تم نے ان کو باندھ کر نشانہ بنایا؟ البتہ تحقیق میں نے رسول اللہ صلی اللہ علیہ وآلہ وسلم کو جانور کو باندھ کر نشانہ بنانے سے منع فرماتے ہوئے سنا ہے۔ اور میں پسند نہیں کرتا کہ میں ایک مرغی کو باندھ کر نشانہ بناؤں اور مجھے اس کے بدلے میں اتنا اور اتنا مال ملے۔ راوی کہتے ہیں: پس انہوں نے اس کو بہت بڑا معاملہ سمجھا۔ اس پر حضرت عبدالرحمن نے اپنے چار غلاموں کو بلایا اور اپنے اس فعل کے بدلے ان چاروں کو آزاد کردیا۔ [مصنف ابن ابي شيبه/كتاب الديات/حدیث: 29775]

حضرت عبداللہ بن یزید فرماتے ہیں کہ رسول اللہ صلی اللہ علیہ وآلہ وسلم نے مثلہ کرنے سے منع فرمایا۔ [مصنف ابن ابي شيبه/كتاب الديات/حدیث: 29776]

حضرت عمران بن حصین اور حضرت سمرہ بن جندب فرماتے ہیں کہ رسول اللہ صلی اللہ علیہ وآلہ وسلم نے مثلہ کرنے سے منع فرمایا۔ [مصنف ابن ابي شيبه/كتاب الديات/حدیث: 29777]

حضرت یعلی رضی اللہ عنہ بن مرہ فرماتے ہیں کہ میں نے رسو ل اللہ (صلی اللہ علیہ وآلہ وسلم) کو یوں ارشاد فرماتے ہوئے سنا کہ اللہ رب العزت نے فرمایا ہے کہ میرے بندوں کو مثلہ مت بناؤ۔ [مصنف ابن ابي شيبه/كتاب الديات/حدیث: 29778]

حضرت منصور فرماتے ہیں کہ حضرت طلق بن حبیب نے اللہ رب العزت کے قول { فَلاَ یُسْرِفْ فِی الْقَتْلِ } کی تفسیر یوں بیان فرمائی: کہ تم قاتل کے علاوہ کسی اور کو قتل کرو یا تم اپنے قاتل کو مثلہ بنادو۔ [مصنف ابن ابي شيبه/كتاب الديات/حدیث: 29779]

حضرت خصیف فرماتے ہیں کہ حضرت سعید بن جبیر نے اللہ رب العزت کے قول { فَلاَ یُسْرِفْ فِی الْقَتْلِ } کی تفسیر یوں بیان فرمائی کہ دو لوگوں کو ایک کے بدلے قتل کردیا جائے۔ [مصنف ابن ابي شيبه/كتاب الديات/حدیث: 29780]