حضرت بریدہ فرماتے ہیں کہ رسو ل اللہ (صلی اللہ علیہ وآلہ وسلم) جب کوئی لشکر بھیجتے تو ارشاد فرماتے: تم مثلہ ہرگز مت کرنا۔ [مصنف ابن ابي شيبه/كتاب الديات/حدیث: 29781]

حضرت ابو سعید فرماتے ہیں کہ رسو ل اللہ (صلی اللہ علیہ وآلہ وسلم) نے جانوروں کو مثلہ کرنے سے منع فرمایا۔ [مصنف ابن ابي شيبه/كتاب الديات/حدیث: 29782]

حضرت سعدبن ابرہیم فرماتے ہیں کہ حضرت ابو موسیٰ نے حضرت عمر کو خط لکھا: بیشک ہمارے ہاں ایک آدمی مرگیا اور اس کا نہ تو کوئی رشتہ دار ہے اور نہ ہی کوئی ولی۔ حضرت عمر نے آپ کو جواب لکھا: اگر اس نے کوئی رشتہ دار چھوڑا ہے تو رشتہ دار حقدار ہے ورنہ اس کے سرپرست اگر وہ بھی نہیں ہیں تو بیت المال اس کا وارث بنے گا اور وہ ہی اس کی طرف سے دیت ادا کرے گا۔ [مصنف ابن ابي شيبه/كتاب الديات/حدیث: 29783]

حضرت شعبی اور حسن بصری نے ایسے شخص کے بارے میں جو اسلام لایا اور اس کا کوئی مولیٰ نہیں۔ ان دونوں نے یوں فرمایا: اس کی وراثت مسلمانوں کو ملے گی اور اس کی دیت بھی ان پر ہی لازم ہوگی۔ [مصنف ابن ابي شيبه/كتاب الديات/حدیث: 29784]

اور حضرت یونس سے منقول ہے کہ ایسے شخص کے بارے میں جو اسلام لایا اور اس کا کوئی مولیٰ نہیں حسن بصری اور امام شعبی دونوں نے یوں فرمایا: اس کی وراثت مسلمانوں کو ملے گی اور اس کی دیت بھی ان پر ہی لازم ہوگی۔ [مصنف ابن ابي شيبه/كتاب الديات/حدیث: 29785]

حضرت منصور فرماتے ہیں کہ حضرت ابراہیم نے ارشاد فرمایا: جب آدمی نے دوسرے آدمی کے ہاتھ پر اسلام قبول کیا تو اس کو ہی اس کی وراثت ملے گی اور وہ شخص ہی اس کی طرف سے دیت ادا کرے گا۔ [مصنف ابن ابي شيبه/كتاب الديات/حدیث: 29786]

حضرت ابو بکرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس شخص نے معاہد کو بغیر اس کے حلال ہونے کے قتل کردیا تو اللہ تعالیٰ اس پر جنت کو حرام کردیں گے کہ وہ اس کی خوشبو تک سونگھے۔ [مصنف ابن ابي شيبه/كتاب الديات/حدیث: 29787]

حضرت ابو بکرہ سے نبی کریم صلی اللہ علیہ وآلہ وسلم کا مذکورہ ارشاد اس سند سے بھی منقول ہے۔ [مصنف ابن ابي شيبه/كتاب الديات/حدیث: 29788]

حضرت ابو بکرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس شخص نے معاہد کو اس کے حق کے علاوہ میں قتل کردیا تو اللہ رب العزت اس پر جنت کو حرام کردیں گے۔ [مصنف ابن ابي شيبه/كتاب الديات/حدیث: 29789]

حضرت عبداللہ بن عمرو فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس شخص نے معاہد کو بغیر حق کے قتل کردیا تو وہ شخص جنت کی خوشبو بھی نہیں سونگھ پائے گا۔ حالانکہ اس کی خوشبو چالیس سال کی مسافت کی دوری سے بھی محسوس ہوتی ہے۔ [مصنف ابن ابي شيبه/كتاب الديات/حدیث: 29790]