حضرت لاحق بن حمید سے روایت ہے کہ انہوں نے یا کسی اور نے ابن عمر رضی اللہ عنہما سے کانے کے بارے میں سوال کیا کہ جب اس کی صحیح آنکھ کو پھوڑ دیا جائے، تو ابن عمر رضی اللہ عنہما کے پاس ابن صفوان تھے انہوں نے کہا کہ حضرت عمر نے اس میں پوری دیت کا فیصلہ فرمایا ہے، پھر اس سائل نے کہا کہ اے ابن عمر رضی اللہ عنہما میں آپ سے پوچھتا ہوں تو انہوں نے جواب دیا کہ تو نے مجھ سے سوال کردیا؟ جب کہ یہ تجھے عمر کی حدیث بیان کر رہا ہے کہ انہوں نے اس میں پوری دیت کا فیصلہ کیا ہے۔ [مصنف ابن ابي شيبه/كتاب الديات/حدیث: 28751]

ابراہیم فرماتے ہیں کہ اسلاف کی رائے یہ تھی کہ اگر کسی کانے کی صحیح آنکھ کسی نے پھوڑ دی اور اس نے پہلی آنکھ کا تاوان وصول نہیں کیا تھا تو اب اسے پوری دیت ملے گی۔ [مصنف ابن ابي شيبه/كتاب الديات/حدیث: 28752]

ابراہیم نے فرمایا کہ بنو کاہل کے کچھ لوگوں کا دعویٰ ہے کہ یہ واقعہ ان کے ہاں پیش آیا تھا تو حضرت عثمان رضی اللہ عنہ نے اس میں دونوں آنکھوں کی دیت کا فیصلہ فرمایا۔ ہم نے اس کی گہرائی کے بارے میں پوچھا اور اس کی تحقیق کی تو ہمیں اس کی کوئی بنیاد نہ ملی، چنانچہ یہ بات ٹھنڈی پڑ گئی۔ [مصنف ابن ابي شيبه/كتاب الديات/حدیث: 28753]

عمربن عبدالعزیز کا ارشاد ہے کہ جب ایک ہی آنکھ رہ گئی ہو پھر اس کو کوئی زخم آجائے تو اس میں پوری دیت ہوگی۔ [مصنف ابن ابي شيبه/كتاب الديات/حدیث: 28754]

حضرت سعید بن مسیب کا ارشاد ہے کہ کانے شخص کی آنکھ کو جب پھوڑا جائے تو اس میں پوری دیت ہے۔ [مصنف ابن ابي شيبه/كتاب الديات/حدیث: 28755]

حضرت شریح نے فرمایا ہے کہ جس شخص کی آنکھ کو پھوڑ دیا گیا جب کہ اس کی یہی ایک آنکھ تھی تو اس کے بدلہ میں قصاص ہے اور اگر غلطی سے پھوٹ گئی تو اس میں آدھی دیت ہے۔ [مصنف ابن ابي شيبه/كتاب الديات/حدیث: 28756]

حضرت مسروق سے روایت ہے کہ کانے شخص کی آنکھ کو پھوڑنے میں آدھی دیت ہے کیا میں اللہ کی پھوڑی ہوئی آنکھ کی بھی دیت بھروں گا؟ [مصنف ابن ابي شيبه/كتاب الديات/حدیث: 28757]

حضرت شعبی کا ارشاد ہے کہ کانے شخص کی صحیح آنکھ کو جب جان بوجھ کر پھوڑا جائے تو پھر اس آنکھ کے بدلہ میں آنکھ ہوگی (یعنی قصاص لیا جائے گا) [مصنف ابن ابي شيبه/كتاب الديات/حدیث: 28758]

حضرت عبداللہ بن معقل کا ارشاد ہے کہ کانے شخص کی صحیح آنکھ کو جان بوجھ کر پھوڑنے کے بدلہ میں آنکھ ہے (یعنی قصاص) اس کی پہلی آنکھ کو میں نے تو نہیں پھوڑا ہے۔ [مصنف ابن ابي شيبه/كتاب الديات/حدیث: 28759]

حضرت عطاء بن ابی رباح نے فرمایا کہ اس میں آدھی دیت ہے۔ [مصنف ابن ابي شيبه/كتاب الديات/حدیث: 28760]