اور حضرت عکرمہ نے ارشاد فرمایا: اس پر حد جاری ہوگی۔ [مصنف ابن ابي شيبه/كتاب الحدود/حدیث: 30250]

حضرت قتادہ فرماتے ہیں کہ حضرت حسن بصری نے ارشاد فرمایا: جب ایک شخص نے آدمی پر تہمت لگائی تو اس پر حدقذف قائم کردی جائے گی۔ پس اگر وہ دوبارہ اس پر تہمت لگائے تو اس پر حد قذف جاری نہیں ہوگی۔ مگر یہ کہ وہ ایک دوسری تہمت نئے سرے سے اس پر لگائے۔ [مصنف ابن ابي شيبه/كتاب الحدود/حدیث: 30251]

حضرت عبدالرحمن فرماتے ہیں کہ حضرت عمر نے جب حضرت ابو بکرہ اور ان کے ساتھیوں کے متعلق حکم دیا تو ان کو کوڑے مارے گئے پھر حضرت ابو بکرہ نے دوبارہ کہا: مغیرہ نے زنا کیا ہے۔ تو حضرت عمر نے ان کو کوڑے مارنے کا ارادہ کیا تو حضرت علی رضی اللہ عنہ نے آپ سے فرمایا: کس بات پر آپ اسے کوڑے ماریں گے؟ کیا انہوں نے جو کہنا تھا وہ کہہ نہیں چکے! تو آپ نے ان کو چھوڑ دیا۔ [مصنف ابن ابي شيبه/كتاب الحدود/حدیث: 30252]

حضرت فضیل فرماتے ہیں کہ حضرت ابراہیم سے ایسے شخص کے بارے میں مروی ہے جس نے ایک آدمی پر تہمت لگائی پس اسے کوڑے مارے گئے پھر بھی وہ اس پر تہمت لگاتا ہے۔ آپ نے فرمایا: اسے کوڑے نہیں مارے جائیں گے۔ [مصنف ابن ابي شيبه/كتاب الحدود/حدیث: 30253]

حضرت شعبی نے ارشاد فرمایا: تہمت لگانے والے پر قسم نہیں ہے۔ [مصنف ابن ابي شيبه/كتاب الحدود/حدیث: 30254]

حضرت ابن ابی ذئب فرماتے ہیں کہ حضرت عمر بن عبدالعزیز نے ایک آدمی سے قسم اٹھوائی جس نے تہمت لگائی تھی۔ [مصنف ابن ابي شيبه/كتاب الحدود/حدیث: 30255]

حضرت محمد بن اسحاق فرماتے ہیں کہ حضرت قاسم سے ایک آدمی کے متعلق پوچھا گیا جو کسی آدمی کو یوں کہہ دے: اے درزی کے بیٹے، یا اے پچھنے لگانے والے کے بیٹے، یا اے قصائی کے بیٹے اور حالانکہ اس کا باپ ایسا نہیں ہے تو اس کا کیا حکم ہے؟ اس پر حضر ت قاسم نے فرمایا: تحقیق ہم نے یوں پایا تھا کہ حدود قائم نہیں جاتی تھیں مگر واضح تہمت لگانے کی صورت میں یا واضح طو ر پر نفی کرنے کی صورت میں۔ [مصنف ابن ابي شيبه/كتاب الحدود/حدیث: 30256]

حضرت عبدالکریم فرماتے ہیں کہ حضرت سعید بن مسیب نے ارشاد فرمایا: حد جاری نہیں ہوگی مگر اس شخص پر جو حد کو بالکل واضح طور پر گاڑے۔ [مصنف ابن ابي شيبه/كتاب الحدود/حدیث: 30257]

حضرت اسماعیل بن سالم فرماتے ہیں کہ دو آدمیوں کے درمیان جھگڑا تھا، تو ان میں سے ایک نے دوسرے سے کہا: کوفہ میں کوئی ولد الزنا پیدا نہیں ہوا مگر دوسرے میں اس کی مشابہت ہے۔ اور دوسرے نے کہا: اگر اس دوسرے کے پاس جو کچھ ہے وہ کھول دیا جائے تو کوفہ میں کوئی بدکار عورت باقی نہ رہے مگر یہ اسے پہچان لے۔ اس بارے میں حضرت شعبی سے پوچھا گیا تو انہوں نے فرمایا: ان میں سے کسی ایک پر بھی حد نہیں ہے۔ [مصنف ابن ابي شيبه/كتاب الحدود/حدیث: 30258]

حضرت ابن طاؤس فرماتے ہیں کہ حضرت طاؤس مبہم بات میں حد کو لازم نہیں سمجھتے تھے۔ [مصنف ابن ابي شيبه/كتاب الحدود/حدیث: 30259]