حضرت شعبہ فرماتے ہیں کہ حضرت حماد نے ارشاد فرمایا: جہاں تک زانی کا تعلق ہے تو اس کے کپڑے اتار دیے جائیں گے اور آپ نے یہ آیت تلاوت فرمائی: ترجمہ:۔ اور ان دونوں کے سلسلہ میں تمہیں ترس کھانے کا جانب دامن گیر نہ ہو اللہ کے دین کے معاملہ میں۔ راوی کہتے ہں ک: میں نے عرض کی: یہ آیت تو حکم کے بارے میں ہے۔ آپ نے فرمایا: یہ حکم اور کوڑے کے بارے میں ہے۔ [مصنف ابن ابي شيبه/كتاب الحدود/حدیث: 30210]

حضرت ولید بن ابو مالک فرماتے ہیں کہ حضرت ابو عبیدہ بن جراح کے پاس ایک آدمی لایا گیا جس نے زنا کیا تھا وہ کہنے لگا یہ گناہ گار جسم اس قابل ہے کہ اسے مارا جائے پھر اس نے اپنا جبہ اتار دیا پس آپ نے اس طرح مارنے سے انکار کیا اور اس پر اس کے جبہ کو واپس پہنا دیا۔ [مصنف ابن ابي شيبه/كتاب الحدود/حدیث: 30211]

حضرت قاسم کے والد فرماتے ہیں کہ حضرت عبداللہ بن مسعود کے پاس ایک آدمی لایا گیا جو کسی عورت کے ساتھ ایک کپڑے میں پایا گیا تھا۔ تو آپ نے ان دونوں کو چالیس چالیس کوڑے لگائے۔ راوی کہتے ہیں! پھر وہ لوگ حضرت عمر کے پاس گئے حضرت عبداللہ کے خلاف مدد مانگنے کے لیے۔ حضرت عمر حضرت عبداللہ بن مسعود سے ملے اور فرمایا: کچھ لوگ تمہارے خلاف اس معاملہ میں مدد مانگ رہے ہیں تو آپ نے ان کو واقعہ کی اطلاع دی۔ تو آپ یہ سن کر حضرت عبداللہ سے فرمانے لگے! اس میں تمہاری ایسی رائے ہے؟ آپ نے فرمایا: جی ہاں! وہ لوگ کہنے لگے: ہم تو ان سے مدد مانگنے آئے تھے وہ تو خود ان سے فتویٰ پوچھ رہے ہیں۔ [مصنف ابن ابي شيبه/كتاب الحدود/حدیث: 30212]

حضرت جعفر کے والد فرماتے ہیں کہ حضرت علی رضی اللہ عنہ نے ارشاد فرمایا: جب آدمی عورت کے ساتھ پایا جائے تو ان دونوں میں سے ہر ایک کو سو کوڑے مارے جائیں گے۔ [مصنف ابن ابي شيبه/كتاب الحدود/حدیث: 30213]

حضرت عبدالرحمن بن ابی لیلی فرماتے ہیں کہ کسی آدمی کا ایک خدمت گار تھا پس اس شخص نے اسے اپنی بیوی کے ساتھ بستر میں پایا تو حضرت عمر نے اسے چالیس کوڑے مارے۔ [مصنف ابن ابي شيبه/كتاب الحدود/حدیث: 30214]

حضرت ظبیان بن عمارہ فرماتے ہیں کہ حضرت علی رضی اللہ عنہ کے پاس ایک مرد اور عورت لائے گئے اور ایک آدمی کہنے لگا: بیشک ہم نے ان دونوں کو ایک ہی بستر میں پایا ہے اور ان کے پاس شراب اور ناز بو کی خوشبو بھی موجود تھی اس پر حضرت علی رضی اللہ عنہ نے فرمایا: دونوں خبیث مشکوک ہیں، پھر آپ نے ان دونوں کو کوڑے مارے اور سزا ذکر نہیں کی۔ [مصنف ابن ابي شيبه/كتاب الحدود/حدیث: 30215]

حضرت جریر بن حازم فرماتے ہیں کہ حسن بصری نے ارشاد فرمایا: ان دونوں کے سر مونڈے جائیں گے اور کوڑے مارے جائیں گے پس انہوں نے کوڑوں کی تعداد ذکر کی میں اس کو یاد نہ رکھ سکا۔ [مصنف ابن ابي شيبه/كتاب الحدود/حدیث: 30216]

حضرت ابو روح فرماتے ہیں کہ ایک عورت نے کسی آدمی کی باندی سے مشابہت اختیار کی اور یہ رات کا وقت تھا پس اس نے اس سے وطی کی اور وہ سمجھ رہا تھا کہ وہ اس کی باندی ہے۔ پھر یہ معاملہ حضرت عمر کے سامنے پیش کیا گیا۔ تو آپ نے حضرت علی رضی اللہ عنہ کو قاصد بھیج کر بلایا اور فرمایا: آدمی پر پوشیدگی میں حد لگاؤ اور عورت پر اعلانیہ طور پر حد لگاؤ۔ [مصنف ابن ابي شيبه/كتاب الحدود/حدیث: 30217]

حضرت ابو نضرہ فرماتے ہیں کہ حضرت ابن عباس رضی اللہ عنہما سے پوچھا گیا: اغلام باز کی حد کیا ہے؟ آپ نے فرمایا: بستی میں سب سے بلند عمارت دیکھی جائے گی پھر اس عمارت سے اوندھے منہ پھینک دیا جائے گا پھر اس کو پتھر مارے جائیں گے۔ [مصنف ابن ابي شيبه/كتاب الحدود/حدیث: 30218]

حضرت مجاہد اور حضرت سعید بن جبیر فرماتے ہیں کہ انہوں نے حضرت ابن عباس رضی اللہ عنہما کو ایسے آدمی کے بارے میں ارشاد فرماتے ہوئے سنا جو اغلام بازی کرتا ہوا پایا گیا یا پکڑا گیا! اس کو سنگسار کردیا جائے گا۔ [مصنف ابن ابي شيبه/كتاب الحدود/حدیث: 30219]