عوف کہتے ہیں کہ میں ہشام بن ہبیرہ کے پاس اس وقت موجود تھا جب انہوں نے ایک آدمی کے بارے میں فیصلہ کیا جس نے مرتے وقت اپنی بہن کے لئے اپنے دو بچوں کے برابر مال کی وصیت کی تھی، اور اس کے ورثاء میں بیٹے اور بیٹیاں دونوں تھے، اس بہن نے جس کے لئے وصیت کی گئی تھی یہ چاہا کہ اپنے آپ کو مذکر اولاد کے برابر قرار دے اور ورثاء چاہتے تھے کہ اس کو مؤنث اولاد کے برابر حصّہ دیں، انہوں نے فیصلہ فرمایا کہ اس بہن کو مؤ نث اولاد کے برابر سمجھا جائے گا اگر وہ واضح طور پر بیان نہ کرے۔ [مصنف ابن ابي شيبه/كتاب الوصايا/حدیث: 32908]

عوف اعرابی روایت کرتے ہیں کہ ہشام بن ھبیرہ نے ایک آدمی کے بارے میں فیصلہ کیا جس نے کسی کے لئے اپنے ایک بچے کے برابر مال کی وصیت کی تھی جبکہ اس کی اولاد میں مذکر اور مؤنث دونوں ہوں، کہ اس آدمی کو لڑکی کے برابر حصّہ دیا جائے گا۔ [مصنف ابن ابي شيبه/كتاب الوصايا/حدیث: 32909]

ابوبکر کہتے ہیں کہ وکیع نے کہا کہ حضرت سفیان نے فرمایا کہ اس کو لڑکی کے حصّے کے برابر مال دیا جائے گا۔ [مصنف ابن ابي شيبه/كتاب الوصايا/حدیث: 32910]

یونس زہری سے روایت کرتے ہیں اس آدمی کے بارے میں جس نے کسی کے لئے ایک گھوڑے کی وصیت کی اور اس کا نام لیا اور کہا کہ میرے مال کا تیسرا حصّہ فلاں اور فلاں کے لئے ہے، جبکہ اس کا گھوڑا اس کے ایک تہائی مال کے برابر تھا، زہری فرماتے ہیں کہ ہماری رائے یہ ہے کہ اس کا ایک تہائی مال ان کے حصّوں کے برابر تقسیم کردیا جائے۔ [مصنف ابن ابي شيبه/كتاب الوصايا/حدیث: 32911]

حضرت حسن سے روایت ہے کہ انہوں نے اس آدمی کے بارے میں فرمایا جس نے کسی کے لئے دراہم کی وصیت کی اور کسی کے لئے مال کے چھٹے حصّے کی وصیت کی اور اس طرح کی دوسری وصیتیں کی، کہ وہ سب حصّے بانٹ لیں گے۔ [مصنف ابن ابي شيبه/كتاب الوصايا/حدیث: 32912]

یونس روایت کرتے ہیں کہ حسن اس بات میں کوئی حرج نہیں سمجھتے تھے کہ کوئی آدمی اپنے غلام کے لئے سو یا دو سو درہم کی وصیت کرے جبکہ اس آدمی کے اولیاء راضی ہوں، اور اگر وہ اس کے لئے اپنے مال کے تیسرے حصّے میں سے کچھ مقرر کر دے تو وہ اس کی آزادی میں شمار ہوگا۔ [مصنف ابن ابي شيبه/كتاب الوصايا/حدیث: 32913]

حفص فرماتے ہیں کہ میں نے حضرت عمرو سے اس آدمی کے بارے میں سوال کیا جو اپنے غلام کے لئے وصیت کرے، انہوں نے فرمایا: حضرت حسن فرمایا کرتے تھے کہ اگر وہ اس کے لئے ایک چپاتی کی وصیت بھی کرے تو اس کی آزادی اس کے ساتھ مل جائے گی۔ [مصنف ابن ابي شيبه/كتاب الوصايا/حدیث: 32914]

جندب فرماتے ہیں کہ طھمان نے حضرت ابن عباس رضی اللہ عنہما سے سوال کیا کہ کیا غلام وصیت کرسکتا ہے؟ فرمایا نہیں! [مصنف ابن ابي شيبه/كتاب الوصايا/حدیث: 32915]

ہشام روایت کرتے ہیں کہ حضرت حسن اور محمد بن سیرین فرماتے ہیں کہ آدمی کی وصیت اس جگہ نافذ ہوجائے گی جہاں اس نے کی الّا یہ کہ وصیت کے ذمہ دار پر تہمت آجائے۔ [مصنف ابن ابي شيبه/كتاب الوصايا/حدیث: 32916]

جابر سے روایت ہے کہ حضرت عامر نے فرمایا: وصیت کا ذمہ دارتو باپ کے درجے میں ہے، اور جب اس پر کوئی تہمت لگ جائے تو اس کو معزول کردیا جائے یا اس کے ساتھ دوسرا آدمی ملا دیا جائے۔ [مصنف ابن ابي شيبه/كتاب الوصايا/حدیث: 32917]