ابو اسحاق فرماتے ہیں کہ ہم حضرت شریح کے پاس حاضر ہوئے اور ان سے مسئلہ پوچھا تو اس شخص نے جو آپ کے سرہانے کھڑا تھا کہا کہ حضرت دادا کے بارے میں کچھ نہیں کہتے۔ [مصنف ابن ابي شيبه/كتاب الفرائض/حدیث: 33390]

حضرت شعبی فرماتے ہیں کہ دادا کے بارے میں وہ قول اختیار کرو جس پر علماء کا اتفاق ہے، یعنی حضرت زید رضی اللہ عنہ کا قول۔ [مصنف ابن ابي شيبه/كتاب الفرائض/حدیث: 33391]

سعید فرماتے ہیں کہ حضرت عمر رضی اللہ عنہ نے دادا اور کلالہ کے بارے میں ایک کندھے کی ہڈی پر کچھ لکھا، پھر اللہ تعالیٰ سے استخارہ فرمانے لگے، جب آپ زخمی ہوئے تو آپ نے وہ ہڈی منگوائی اور اس کو مٹا دیا، پھر فرمایا: میں نے دادا اور کلالہ کے بارے میں ایک تحریر لکھی تھی، اب میرا خیال ہوا ہے کہ میں تم لوگوں کو تمہاری حالت پر چھوڑ دوں، پس لوگوں کو کچھ پتہ نہ چل سکا کہ آپ نے کندھے کی ہڈی میں کیا لکھا تھا۔ [مصنف ابن ابي شيبه/كتاب الفرائض/حدیث: 33392]

حضرت علی رضی اللہ عنہ سے منقول ہے کہ جو آدمی یہ چاہے کہ جہنم کی گہرائیوں میں گھس جائے وہ دادا اور بھائیوں کے مسئلے میں فیصلہ کر دے۔ [مصنف ابن ابي شيبه/كتاب الفرائض/حدیث: 33393]

حضرت قبیصہ فرماتے ہیں کہ رسول اللہ صلی اللہ علیہ وسلم کی وفات کے بعد ایک جدّہ، ماں کی طرف سے یا پوتے کی طرف سے، حضرت ابوبکر صدیق رضی اللہ عنہ کے پاس آئی اور کہنے لگی کہ میرا پوتا یا میرا نواسا فوت ہوگیا ہے، اور مجھے معلوم ہوا ہے کہ میرا بھی اس کے مال میں حق ہے، حضرت ابوبکر رضی اللہ عنہ نے فرمایا: میں تیرے لئے کتاب اللہ میں کوئی حق نہیں پاتا، اور میں نے تمہارے بارے میں رسول اللہ صلی اللہ علیہ وسلم سے بھی کوئی بات نہیں سنی، اور میں لوگوں سے پوچھوں گا، راوی کہتے ہیں کہ پھر حضرت مغیرہ بن شعبہ رضی اللہ عنہ نے یہ گواہی دی کہ نبی کریم صلی اللہ علیہ وآلہ وسلم نے جدّہ کو مال کا چھٹا حصّہ عنایت فرمایا ہے، آپ نے فرمایا کہ تمہارے ساتھ اس پر کون گواہی دے گا؟ انہوں نے فرمایا کہ محمد بن مسلمہ، چناچہ محمد بن مسلمہ رضی اللہ عنہ نے گواہی دی تو آپ نے اس کو چھٹا حصّہ عنایت فرمایا، اور پھر دوسری جانب کی جدّہ حضرت عمر رضی اللہ عنہ کے پاس آئی، آپ نے اس کو مال کا چھٹا حصّہ دیا اور فرمایا جب تم جمع ہو جاؤ تو یہ مال تمہارے درمیان تقسیم ہوگا۔ [مصنف ابن ابي شيبه/كتاب الفرائض/حدیث: 33394]

معمر راوی یہ اضافہ کرتے ہیں کہ: اور تم میں سے جو اکیلی ہو تو یہ چھٹا حصّہ اس کا ہی ہے۔ [مصنف ابن ابي شيبه/كتاب الفرائض/حدیث: 33395]

حضرت ابن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے دادی کو مال کا چھٹا حصّہ عنایت فرمایا۔ [مصنف ابن ابي شيبه/كتاب الفرائض/حدیث: 33396]

حضرت بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے دادی کو چھٹا حصّہ عنایت فرمایا جبکہ ماں نہیں تھی۔ [مصنف ابن ابي شيبه/كتاب الفرائض/حدیث: 33397]

ایوب ایک آدمی کے واسطے سے حضرت طاؤس کا ارشاد نقل فرماتے ہیں کہ دادی ماں کے درجے میں ہے، جتنے مال کی ماں وارث ہوگی اتنے ہی مال کی وہ بھی وارث ہوگی۔ [مصنف ابن ابي شيبه/كتاب الفرائض/حدیث: 33398]

ابراہیم فرماتے ہیں کہ نبی کریم صلی اللہ علیہ وآلہ وسلم نے تین دادیوں کو مال عنایت فرمایا۔ [مصنف ابن ابي شيبه/كتاب الفرائض/حدیث: 33399]