حضرت زائدہ فرماتے ہیں کہ میں نے حضرت منصور سے عرض کیا کہ باپ کی طرف سے جو دادی ہے اس سے مراد باپ کی ماں اور ماں کے باپ کی ماں ہے؟ فرمایا! جی ہاں! [مصنف ابن ابي شيبه/كتاب الفرائض/حدیث: 33410]

منصور کہتے ہیں کہ حضرت ابراہیم نے فرمایا کہ جب دادیاں ایک جانب کی ہوں جن میں سے بعض بعض سے زیادہ قریب ہوں تو دور کی دادی محروم ہوگی۔ [مصنف ابن ابي شيبه/كتاب الفرائض/حدیث: 33411]

فضیل فرماتے ہیں کہ ابراہیم نے فرمایا کہ دادیاں مال کے چھٹے حصّے کی وارث ہوں گی، پس اگر ایک یا دو یا تین ہوں تو ان کے درمیان حضرت علی رضی اللہ عنہ اور زید رضی اللہ عنہ کے فرمان کے مطابق ایک ہی حصّہ تقسیم ہوگا، اور جب تین دادیاں جمع ہوجائیں جن میں سے ہر ایک میت کے ساتھ رشتے میں برابر ہو تو ایک ہی حصّہ ان کے درمیان تقسیم کیا جائے گا، یعنی ایک دادی ماں کی طرف سے اور ایک دادی باپ کی طرف سے، اس کے باپ کی ماں اور اس کی ماں کی ماں، اور حضرت عبد اللہ رضی اللہ عنہ فرماتے ہیں جب تین دادیاں جمع ہوجائیں تو ان کے درمیان مال کا چھٹا حصّہ تقسیم ہوگا اگرچہ ان میں سے بعض دادیاں نسب میں میت کے زیادہ قریب ہوں اس طرح کہ ان میں سے کوئی دوسرے کی ماں نہ ہو۔ [مصنف ابن ابي شيبه/كتاب الفرائض/حدیث: 33412]

شعبی حضرت مسروق کے بارے میں نقل فرماتے ہیں ان کے پاس چار دادیاں ایک دوسری کے پیچھے چلتی ہوئی آئیں تو انہوں نے تین دادیوں کو وارث بنادیا اور ماں کی دادی کو محروم فرما دیا۔ [مصنف ابن ابي شيبه/كتاب الفرائض/حدیث: 33413]

ابو المہلّب سے روایت ہے کہ دو دادیاں حضرت شریح کے پاس آئیں، آپ نے ان کے درمیان مال کے چھٹے حصّے کو تقسیم فرما دیا۔ [مصنف ابن ابي شيبه/كتاب الفرائض/حدیث: 33414]

حضر ت ابن سیرین فرماتے ہیں کہ حضرت عبد اللہ رضی اللہ عنہ دادیوں کو وارث بناتے تھے اگرچہ وہ دس ہوں، اور فرماتے تھے کہ یہ تو ایک حصّہ ہے جو ان کو نبی کریم صلی اللہ علیہ وآلہ وسلم نے عطا فرمایا ہے۔ [مصنف ابن ابي شيبه/كتاب الفرائض/حدیث: 33415]

شعبی فرماتے ہیں کہ حضرت مسروق کے پاس چار دادیاں ایک دوسری کے پیچھے چلتی ہوئی آئیں تو انہوں نے تین دادیوں کو وارث بنادیا اور ایک یعنی ماں کی دادی کو محروم فرما دیا۔ [مصنف ابن ابي شيبه/كتاب الفرائض/حدیث: 33416]

حضرت قاسم فرماتے ہیں کہ ایک آدمی فوت ہوا اور اس نے اپنی دو دادیاں یعنی نانی اور دادی چھوڑیں، حضرت ابوبکر رضی اللہ عنہ نے نانی کو وارث بنایا اور دوسری کو محروم فرما دیا، تو ایک انصاری نے کہا کہ آپ نے ایک ایسی عورت کو چھوڑ دیا ہے کہ اگر یہ دو دادیاں فوت ہوچکی ہوتیں اور ان کا پوتا زندہ ہوتا تو جس دادی کو آپ نے اس کا وارث بنایا ہے اس سے وہ کچھ بھی وارث نہ بنتا، اور جس کو آپ نے چھوڑ دیا ہے اس سے وہ بیٹے کا بیٹا ہونے کی وجہ سے وارث بنتا، چناچہ حضرت ابوبکر رضی اللہ عنہ نے اس کو بھی وارث بنادیا اور ان کو مال کے چھٹے حصّے میں شریک فرمایا۔ [مصنف ابن ابي شيبه/كتاب الفرائض/حدیث: 33417]

ابو الزناد کہتے ہیں کہ میں نے حضرت خارجہ بن زید، سلیمان بن یسار اور طلحہ بن عبد اللہ بن عوف s کو یہ فرماتے ہوئے سنا کہ جب ماں کی جانب کی دادی زیادہ قریب ہو تو وہی میراث کی زیادہ حق دار ہے۔ [مصنف ابن ابي شيبه/كتاب الفرائض/حدیث: 33418]

عبد اللہ بن ذکوان نقل فرماتے ہیں کہ حضرت خارجہ بن زید رحمہ اللہ نے فرمایا کہ جب ماں کی جانب کی دادی باپ کی جانب کی دادی سے زیادہ قریب ہو تو مال کا چھٹا حصّہ اسی کو ملے گا، اور جب باپ کی جانب کی دادی ماں کی جانب کی دادی سے قریب ہو تو مال کا چھٹا حصّہ ان دونوں کے درمیان تقسیم ہوگا۔ [مصنف ابن ابي شيبه/كتاب الفرائض/حدیث: 33419]