وکیع روایت کرتے ہیں کہ حضرت سفیان نے فرمایا کہ اسلام ایک ملّت ہے اور کفر ایک ملّت۔ [مصنف ابن ابي شيبه/كتاب الفرائض/حدیث: 33590]

شعبہ روایت کرتے ہیں کہ حضرت حکم اور حماد نے فرمایا کہ اسلام ایک ملّت ہے اور کفر ایک ملّت۔ [مصنف ابن ابي شيبه/كتاب الفرائض/حدیث: 33591]

خالد روایت کرتے ہیں کہ حضرت محمد بن سیرین رحمہ اللہ نے اس آدمی کے بارے میں فرمایا جس نے اپنا نصرانی غلام آزاد کیا اور پھر مرگیا، کہ وہ اس کا وارث نہیں ہوگا۔ [مصنف ابن ابي شيبه/كتاب الفرائض/حدیث: 33592]

اسماعیل بن ابی حکیم روایت کرتے ہیں کہ حضرت عمر بن عبد العزیز رحمہ اللہ نے اپنا ایک نصرانی غلام آزاد کیا پھر وہ مرگیا تو آپ نے اس کی میراث بیت المال میں رکھ دی۔ [مصنف ابن ابي شيبه/كتاب الفرائض/حدیث: 33593]

یونس روایت کرتے ہیں کہ حضرت حسن فرمایا کرتے تھے کہ جب بچہ مرجائے اور اس کے والدین میں سے کوئی ایک مسلمان ہو تو اس کا وارث مسلمان ہوگا نہ کہ کافر۔ [مصنف ابن ابي شيبه/كتاب الفرائض/حدیث: 33594]

مغیرہ حضرت ابراہیم سے اور حجاج حضرت عطاء سے یہی روایت نقل کرتے ہیں۔ [مصنف ابن ابي شيبه/كتاب الفرائض/حدیث: 33595]

شعبہ فرماتے ہیں کہ میں نے حضرت حکم اور حماد سے اس بچے کے بارے میں پوچھا جس کے والدین میں سے کوئی ایک مسلمان ہو، فرمایا کہ وہ مسلمان کے ساتھ ہے، وہ مسلمان کا وارث ہوگا اور اس کا وارث مسلمان ہوگا۔ [مصنف ابن ابي شيبه/كتاب الفرائض/حدیث: 33596]

عبد الحمید بن سلمہ اپنے والد سے اور وہ اپنے دادا سے روایت کرتے ہیں کہ ان کے والدین ان کے بارے میں نبی کریم صلی اللہ علیہ وآلہ وسلم کے سامنے جھگڑا کرنے لگے جن میں سے ایک مسلمان اور دوسرا کافر تھا، آپ نے ان کو اختیار دے دیا، اور وہ کافر کی طرف مائل ہوگئے، آپ نے فرمایا: اے اللہ! اس کو ہدایت فرما دے، چناچہ وہ مسلمان کی طرف مائل ہوگئے، آپ نے اس کا مسلمان کے لئے فیصلہ فرما دیا۔ [مصنف ابن ابي شيبه/كتاب الفرائض/حدیث: 33597]

حسن حضرت عمر رضی اللہ عنہ سے روایت کرتے ہیں کہ اولاد والدین میں سے مسلمان کے ساتھ ہوگی۔ [مصنف ابن ابي شيبه/كتاب الفرائض/حدیث: 33598]

شعبی حضرت شریح سے یہی مضمون نقل کرتے ہیں۔ [مصنف ابن ابي شيبه/كتاب الفرائض/حدیث: 33599]