قتادہ روایت کرتے ہیں کہ حضرت سعید نے فرمایا کہ وہ شخص وارث ہوگا۔ [مصنف ابن ابي شيبه/كتاب الفرائض/حدیث: 33610]

قتادہ حضرت حسن سے روایت کرتے ہیں کہ وہ قیدی اپنے رشتہ دار کی میراث کا محتاج ہے۔ [مصنف ابن ابي شيبه/كتاب الفرائض/حدیث: 33611]

ابن ابی ذئب روایت کرتے ہیں کہ زہری نے فرمایا کہ قیدی وارث ہوگا۔ [مصنف ابن ابي شيبه/كتاب الفرائض/حدیث: 33612]

سفیان ایک آدمی کے واسطے سے روایت کرتے ہیں جنہوں نے حضرت ابراہیم کو یہ فرماتے سنا کہ قیدی وارث نہیں ہوگا۔ [مصنف ابن ابي شيبه/كتاب الفرائض/حدیث: 33613]

قتادہ حضرت سعید بن مسیب سے اس قیدی کے بارے میں روایت کرتے ہیں جو دشمنوں کے قبضے میں ہو، فرمایا کہ وہ وارث نہیں ہوگا۔ [مصنف ابن ابي شيبه/كتاب الفرائض/حدیث: 33614]

داؤد فرماتے ہیں کہ حضرت سعید بن مسیب قیدی کو وارث نہیں بناتے تھے۔ [مصنف ابن ابي شيبه/كتاب الفرائض/حدیث: 33615]

ابن ابی ذئب روایت کرتے ہیں کہ حضرت زہری نے فرمایا کہ قیدی اور اس کی بیوی کے مال کو وراثت میں تقسیم کیا جائے گا۔ [مصنف ابن ابي شيبه/كتاب الفرائض/حدیث: 33616]

ہشام حضرت حسن اور ابن سیرین سے روایت کرتے ہیں، فرمایا کہ بچے کو اسی صورت میں وارث بنایا جائے گا جبکہ وہ پیدا ہونے کے بعد آواز نکالے۔ [مصنف ابن ابي شيبه/كتاب الفرائض/حدیث: 33617]

ابن غالب فرماتے ہیں کہ حضرت ابن زبیر نے حضرت حسین بن علی رضی اللہ عنہ سے نومولود بچے کے بارے میں سوال کیا، آپ نے فرمایا: جب وہ آواز نکالے تو اس کا وظیفہ اور رزق واجب ہوجاتا ہے۔ [مصنف ابن ابي شيبه/كتاب الفرائض/حدیث: 33618]

بشر بن غالب کہتے ہیں کہ حضرت ابن زبیر حضرت حسین بن علی رضی اللہ عنہ سے ملے اور ان سے کہا: اے ابو عبد اللہ! ہمیں اس بچے کے بارے میں مسئلہ بیان کریں جو اسلام میں پیدا ہو، آپ نے فرمایا اس کا وظیفہ اور رزق واجب ہوگیا۔ [مصنف ابن ابي شيبه/كتاب الفرائض/حدیث: 33619]