حضرت حماد بن سلمہ فرماتے ہیں کہ میں نے حضرت حماد سے مجوسی کی میراث کے بارے میں پوچھا، آپ نے فرمایا وہ اس جہت سے وارث ہوں گے جو حلال جہت ہو۔ [مصنف ابن ابي شيبه/كتاب الفرائض/حدیث: 33560]

وکیع حضرت سفیان سے اس مجوسی کے بارے میں روایت کرتے ہیں جو اپنی بیٹی سے نکاح کرلے پھر اس سے اس کی دو بیٹیاں ہوجائیں، اور پھر باپ کے مرنے کے بعد ان میں سے کوئی مرجائے۔ فرمایا کہ اس کی حقیقی بہن کے لئے آدھا مال ہے اور اس کی باپ شریک بہن کے لئے جو اس کی ماں ہے مال کا چھٹا حصّہ ہے، دو تہائی مال کو پورا کرنے کے لئے، اس نے اپنے آپ کو اپنی ذات کی وجہ سے ہی محروم کردیا۔ [مصنف ابن ابي شيبه/كتاب الفرائض/حدیث: 33561]

عطاء روایت کرتے ہیں کہ ایک آدمی نے اپنے غلام کو اس طرح آزاد کردیا کہ کسی کو اس پر ولایت نہ ہوگی، چناچہ وہ مرگیا اور اس نے مال چھوڑا حضرت ابن مسعود رضی اللہ عنہ سے اس کے بارے میں پوچھا گیا، آپ نے فرمایا بیشک اہل اسلام آزاد نہیں چھوڑتے، بیشک اہل جاہلیت ہی آزاد چھوڑتے تھے، آپ اس کے مولیٰ اور اس کے محسن ہیں، اور دوسرے لوگوں سے اس کی میراث کے زیادہ حق دار ہیں، اور اگر آپ کو اس میں کوئی تنگی محسوس ہو تو یہاں بہت سے ورثاء ہیں، یعنی بیت المال۔ [مصنف ابن ابي شيبه/كتاب الفرائض/حدیث: 33562]

شعبی کہتے ہیں کہ حضرت ابن مسعود رضی اللہ عنہ کے پاس ایک آزاد شدہ غلام کا مال لایا گیا، جس کے آقاؤں نے اس کو اس طرح آزاد چھوڑا تھا کہ کوئی اس کا وارث نہ ہوگا، آپ نے اس کے آقاؤں کو کہا، یہ تمہارے آزاد شدہ غلام کا مال ہے، وہ کہنے لگے ہمیں اس مال کی کوئی حاجت نہیں ہم نے اس کو اس طرح آزاد کیا تھا کہ کسی کو اس پر ولایت نہ ہوگی، آپ نے فرمایا کہ مسلمانوں کے اموال میں اس کے لئے جگہ موجود ہے۔ [مصنف ابن ابي شيبه/كتاب الفرائض/حدیث: 33563]

ابو عثمان فرماتے ہیں کہ حضرت عمر رضی اللہ عنہ نے فرمایا کہ آزاد چھوڑا ہوا غلام اور صدقہ قیامت کے دن کے لئے ہیں۔ [مصنف ابن ابي شيبه/كتاب الفرائض/حدیث: 33564]

بکر بن عبد اللہ مزنی کہتے ہیں کہ حضرت ابن عمر رضی اللہ عنہما کے پاس تیس ہزار درہم لائے گئے، راوی کہتے ہیں کہ میرا گمان ہے، کہ انہوں نے کہا کہ اس نے اس کو اس طرح آزاد کیا تھا کہ کسی کو اس پر ولایت نہ ہو۔ چناچہ آپ نے حکم دیا کہ اس سے غلام خریدے جائیں۔ [مصنف ابن ابي شيبه/كتاب الفرائض/حدیث: 33565]

زکریا روایت کرتے ہیں کہ حضرت عامر نے اس آدمی کے بارے میں فرمایا جس نے اپنے غلام کو اس طرح آزاد کردیا کہ اس پر کسی کو ولایت نہ ہو، آپ نے فرمایا اس کی میراث اس کے مولیٰ کو ملے گی۔ [مصنف ابن ابي شيبه/كتاب الفرائض/حدیث: 33566]

یونس فرماتے ہیں، کہ حضرت حسن سے اس غلام کی میراث کے بارے میں پوچھا گیا جس کو اس کے آقا نے کسی کی ولایت نہ ہونے کی شرط پر آزاد کیا ہو، آپ نے فرمایا، ہر آزاد شدہ کا یہی حکم ہے۔ [مصنف ابن ابي شيبه/كتاب الفرائض/حدیث: 33567]

ابن عون محمد رحمہ اللہ سے روایت کرتے ہیں فرمایا، کہ میں اس کے علاوہ کچھ نہیں جانتا کہ ایسے غلاموں کی میراث اس کے آقاؤں کے لئے ہوگی، مگر یہ کہ [یہاں عبارت ناقص ہے] [مصنف ابن ابي شيبه/كتاب الفرائض/حدیث: 33568]

ابو عمرو شیبانی فرماتے ہیں کہ حضرت عبد اللہ نے فرمایا، ایسا غلام جہاں چاہے اپنا مال لگا دے۔ [مصنف ابن ابي شيبه/كتاب الفرائض/حدیث: 33569]