حضرت عمر رضی اللہ عنہ نے ارشاد فرمایا: میں ہر مسلمان کی پناہ گاہ (فئہ) ہوں۔ [مصنف ابن ابي شيبه/كتاب السير/حدیث: 35940]

ابراہیم رحمہ اللہ سے مروی ہے کہ حضرت عمر رضی اللہ عنہ کو اطلاع ملی کہ ایک لشکر آذربائیجان میں پھنس گیا اور اس نے صبر سے کام لیا اور سب شہید ہوگئے تو آپ رضی اللہ عنہ نے فرمایا: اگر وہ میری طرف واپس لوٹ آتے تو میں ان کی پناہ گاہ (فئہ) ہوتا۔ [مصنف ابن ابي شيبه/كتاب السير/حدیث: 35941]

حضرت ابن عباس رضی اللہ عنہما ارشاد فرماتے ہیں کہ جنگ میں جو تین سے فرار ہوا وہ گویا کہ نہیں فرار ہوا جو دو میں سے فرار ہوگیا وہ فرار شمار ہوگا۔ [مصنف ابن ابي شيبه/كتاب السير/حدیث: 35942]

حضرت علی رضی اللہ عنہ ارشاد فرماتے ہیں کہ جنگ سے فرار ہونا کبیرہ گناہوں میں سے ہے۔ [مصنف ابن ابي شيبه/كتاب السير/حدیث: 35943]

حضرت ابن عمر رضی اللہ عنہما سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35944]

حضرت ابو البختری نے ایک شخص کو جنگ سے بھاگتے ہوئے دیکھا تو فرمایا جہنم کی گرمی تلوار کی گرمی سے زیادہ سخت ہے۔ [مصنف ابن ابي شيبه/كتاب السير/حدیث: 35945]

حضرت ابو عثمان رحمہ اللہ سے مروی ہے کہ جب حضرت ابو عبید شہید ہوئے اور ان کے ساتھیوں کو شکست ہوئی تو حضرت عمر رضی اللہ عنہ نے فرمایا: میں تمہارا مدد گار ہوں۔ [مصنف ابن ابي شيبه/كتاب السير/حدیث: 35946]

حضرت حسن رحمہ اللہ فرماتے ہیں کہ قرآن کریم کی آیت { وَمَنْ یُوَلِّہِمْ یَوْمَئِذٍ دُبُرَہُ } بدر والوں کے حق میں نازل ہوئی۔ [مصنف ابن ابي شيبه/كتاب السير/حدیث: 35947]

حضرت عبدالرحمن بن ابی لیلی رحمہ اللہ سے مروی ہے کہ دو آدمی کوفہ کے میدان سے مسکن کے دن فرار ہوگئے، وہ دونوں حضرت عمر رضی اللہ عنہ کے پاس آئے تو حضرت عمر رضی اللہ عنہ نے ان کو برا بھلا کہا اور سخت باز پرس فرمائی اور فرمایا: دونوں بھاگ کر آگئے؟ اور پھر ان کو بصرہ کے میدان جنگ کی طرف روانہ فرمانے کا ارادہ کیا تو ان دونوں نے عرض کیا اے امیر المومنین رضی اللہ عنہ! نہیں بلکہ آپ ہمیں دوبارہ اسی میدان کی طرف روانہ فرما دیں جہاں سے ہم بھاگے تھے تاکہ ہماری توبہ بھی وہیں سے ہوجائے۔ [مصنف ابن ابي شيبه/كتاب السير/حدیث: 35948]

حضرت ہشام اپنے والد سے روایت کرتے ہیں کہ جنگ جمل والے دن مجھے اور حضرت ابوبکر بن عبدالرحمن کو واپس لوٹا دیا گیا ہمیں چھوٹا قرار دیا گیا۔ [مصنف ابن ابي شيبه/كتاب السير/حدیث: 35949]