حضرت قیس بن ابی حازم فرماتے ہیں کہ حضر ت عمر رضی اللہ عنہ نے بدری صحابہ رضی اللہ عنہ م میں سے عربوں اور ان کے موالی سب کے لیے پانچ پانچ ہزار مقرر کیے اور فرمایا: کہ میں ضرور بالضرور ان کو غیروں پر فضیلت دوں گا۔ [مصنف ابن ابي شيبه/كتاب السير/حدیث: 35071]

حضرت مصعب بن سعد رحمہ اللہ فرماتے ہیں کہ حضرت عمر بن خطاب رضی اللہ عنہ نے بدری صحابہ رضی اللہ عنہ م کے لیے چھ چھ ہزار مقرر فرمائے۔ اور امہات المومنین کے لیے دس دس ہزار مقرر فرمائے اور حضرت عائشہ رضی اللہ عنہا سے نبی کریم صلی اللہ علیہ وآلہ وسلم کی خاص محبت ہونے کی وجہ سے ان کے لیے دو ہزار کا اضافہ فرما دیا۔ سوائے دو (جنگ میں) قید ہو کر آنے والی بیویوں حضرت صفیہ بنت حیی رضی اللہ عنہا اور حضرت جویریہ بنت حارث رضی اللہ عنہا کے کہ ان دونوں کے لیے چھ چھ ہزار مقرر فرمائے۔ اور مسلمانوں کی عورتوں میں سے چند عورتوں کے لیے ہزار ہزار مقرر فرمائے۔ ان عورتوں میں حضرت ام عبد بھی شامل تھیں۔ [مصنف ابن ابي شيبه/كتاب السير/حدیث: 35072]

حضرت قیس رحمہ اللہ فرماتے ہیں کہ میں اپنے چچا کے بیٹے کو لے کر حضرت علی رضی اللہ عنہ کی خدمت میں آیا اور میں نے عرض کیا: اے امیر المؤمنین: اس کے لیے بھی عطیہ مقرر فرما دیں۔ آپ رضی اللہ عنہ نے فرمایا: چار سو درہم۔ میں نے عرض کیا: بیشک چار سو درہم اس کو کچھ فائدہ نہیں دیں گے۔ آپ رضی اللہ عنہ اس کے لیے دو سو درہم مزید بڑھا دیں۔ جیسا کہ آپ رضی اللہ عنہ نے لوگوں کے بڑھائے ہیں۔ آپ رضی اللہ عنہ نے فرمایا: اس کے لیے بھی بڑھا دیے۔ راوی کہتے ہیں: کہ آپ رضی اللہ عنہ نے لوگوں کے لیے دو سو درہم بڑھا دیے تھے۔ [مصنف ابن ابي شيبه/كتاب السير/حدیث: 35073]

حضرت عمر جو کہ حضرت غفرہ رضی اللہ عنہا کے آزاد کردہ غلام ہیں اور دیگر حضرات فرماتے ہیں کہ جب رسول اللہ صلی اللہ علیہ وسلم کی وفات ہوگئی تو بحرین سے بہت سا مال آیا۔ حضرت ابوبکر رضی اللہ عنہ نے فرمایا: جس شخص کا رسول اللہ صلی اللہ علیہ وسلم پر کچھ قرض ہو یا وعدہ ہو تو اس کو چاہیے کہ وہ کھڑا ہو اور اس مال میں سے لے لے۔ حضرت جابر رضی اللہ عنہ کھڑے ہوئے اور فرمایا: بیشک رسول اللہ صلی اللہ علیہ وسلم نے فرمایا تھا: اگر میرے پاس بحرین سے مال آیا تو میں ضرور تمہیں اتنا اور اتنا مال عطا کروں گا۔ آپ صلی اللہ علیہ وسلم نے تین بار فرمایا: اور ہاتھ سے چلو بھرا تھا۔ لہٰذا حضرت ابوبکر رضی اللہ عنہ نے ان سے فرمایا: کھڑے ہو جاؤ اور اپنے ہاتھ سے لے لو۔ پس آپ رضی اللہ عنہ نے لے لیا تو وہ پانچ سو درہم تھے۔ آپ رضی اللہ عنہ نے فرمایا: اس کو ہزار گن کر دے دو۔ اور آپ رضی اللہ عنہ نے لوگوں کے درمیان دس دس دراہم تقسیم فرما دیے۔ اور فرمایا: یہ وہ وعدے ہیں جو رسول اللہ صلی اللہ علیہ وسلم نے لوگوں سے کیے تھے۔ 2۔ یہاں تک کہ جب اگلا سال ہوا تو اس سے کہیں زیادہ مال آیا۔ تو آپ رضی اللہ عنہ نے لوگوں کے درمیان بیس بیس دراہم تقسیم فرما دیے اور پھر بھی مال باقی بچ گیا۔ لہٰذا آپ رضی اللہ عنہ نے غلاموں میں بھی پانچ پانچ دراہم تقسیم فرمائے اور فرمایا: بیشک تمہارے خادمین تمہاری خدمت کرتے ہیں اور تمہارے معاملات نمٹاتے ہیں اس لیے ہم نے ان کو بھی کچھ مال عطا کردیا لوگوں نے کہا: اگر آپ رضی اللہ عنہ مہاجرین اور انصار کو سبقت لے جانے اور رسول اللہ صلی اللہ علیہ وسلم کے نزدیک بہتر مرتبہ کی وجہ سے فضیلت دیتے تو اچھا ہوتا! آپ رضی اللہ عنہ نے فرمایا: ان لوگوں کا اجر تو اللہ کے ذمہ ہے۔ بیشک اس مال میں برابری بہتر ہے کسی کو ترجیح دینے سے۔ راوی کہتے ہیں: آپ رضی اللہ عنہ نے اپنے دورخلافت میں اسی طرح عمل کیا یہاں تک کہ ہجرت کے تیرہویں سال جمادی الاخری کی آخری راتوں میں آپ رضی اللہ عنہ کی وفات ہوگئی۔ 3۔ حضرت عمر بن خطاب رضی اللہ عنہ نے خلافت سنبھالی اور بہت سی فتوحات ہوئیں۔ اور بہت سارا مال آیا۔ آپ رضی اللہ عنہ نے فرمایا: بیشک حضرت ابوبکر رضی اللہ عنہ نے اس معاملہ میں ایک رائے اختیار کی اور میری اس معاملہ میں دوسری رائے ہے۔ میں رسول اللہ صلی اللہ علیہ وسلم سے قتال کرنے والے کو رسول اللہ صلی اللہ علیہ وسلم کے ساتھ قتال کرنے والے کے برابر نہیں کروں گا۔ اور آپ رضی اللہ عنہ نے مہاجرین اور انصار میں سے جن صحابہ رضی اللہ عنہ م نے غزوہ بدر میں شرکت کی تھی ان کے لیے پانچ پانچ ہزار مقرر فرمائے۔ اور وہ مسلمان جو اسلام لانے میں بدریین ہی کی طرح تھے مگر غزوہ بدر میں نہ حاضر ہو سکے ان کے لیے آپ رضی اللہ عنہ نے چار چار ہزار مقرر فرمائے۔ 4۔ اور آپ رضی اللہ عنہ نے نبی کریم صلی اللہ علیہ وآلہ وسلم کی ازواج مطہرات رضی اللہ عنہن کے لیے بارہ بارہ ہزار مقرر فرمائے سوائے حضرت صفیہ اور حضرت جویریہ رضی اللہ عنہ ما کے۔ ان دونوں کے لیے چھ چھ ہزار مقرر فرمائے۔ ا ن دونوں نے یہ قبول کرنے سے انکار کردیا۔ تو حضرت عمر رضی اللہ عنہ نے ان دونوں سے فرمایا: بیشک میں نے ان سب کے لیے ہجرت کی وجہ سے اتنا مال مقرر فرمایا: اس پر ان دونوں نے فرمایا: کہ تم نے ان سب کے لیے رسول اللہ صلی اللہ علیہ وسلم کے نزدیک ہونے کی وجہ سے مقرر فرمایا ہے اور ہمارے لیے بھی ان ہی کی طرح ہوگا۔ حضرت عمر رضی اللہ عنہ نے یہ سمجھ لیا اور پھر ان دونوں کے لیے بھی بارہ بارہ ہزار مقرر فرما دیے۔ 5۔ اور حضرت عباس رضی اللہ عنہ کے لیے بھی بارہ ہزار مقرر فرمائے۔ اور حضرت اسامہ بن زید رضی اللہ عنہ کے لیے چار ہزار مقرر فرمائے اور حضرت عبد اللہ بن عمر رضی اللہ عنہما کے لیے تین ہزار مقرر فرمائے۔ اس پر حضرت ابن عمر رضی اللہ عنہما نے ارشاد فرمایا: اے ابا جان! آپ نے اس کے لیے مجھ سے زیادہ ایک ہزار کیوں بڑھائے؟ حالانکہ اس کے والد کو وہ فضیلت نہیں ہے جو میرے والد کو ہے اور اس کو وہ فضیلت حاصل نہیں ہے جو مجھے ہے۔ اس پر حضرت عمر رضی اللہ عنہ نے فرمایا: بیشک اسامہ کا باپ رسول اللہ صلی اللہ علیہ وسلم کے نزدیک تیرے باپ سے زیادہ محبوب تھا، اور خود اسامہ بھی رسول اللہ صلی اللہ علیہ وسلم کے نزدیک تیرے سے زیادہ محبوب تھا۔ اور آپ رضی اللہ عنہ نے حضرت حسن اور حضرت حسین رضی اللہ عنہ کے لیے پانچ پانچ ہزار مقرر فرمائے۔ اور ان دونوں سے آپ صلی اللہ علیہ وسلم کی محبت کی وجہ سے ان کو ان کے والد سے ملا دیا۔ 6۔ اور آپ رضی اللہ عنہ نے مہاجرین اور انصار صحابہ رضی اللہ عنہ م کے بیٹوں کے لیے دو دو ہزار مقرر فرمائے، پس حضرت عمر بن ابی سلمہ رضی اللہ عنہاپ رضی اللہ عنہ کے پاس سے گزرے تو آپ رضی اللہ عنہ نے فرمایا: اس کے لیے ایک ہزار بڑھا دو۔ اس پر حضرت محمد بن عبد اللہ بن جحش رضی اللہ عنہ نے ان سے فرمایا: جو اس کے باپ کو مرتبہ حاصل ہے وہ ہمارے باپ کو نہیں اور جو اس کو مرتبہ حاصل ہے وہ ہمارے لیے نہیں؟ آپ رضی اللہ عنہ نے فرمایا: بیشک میں نے اس کے والد حضرت ابو سلمہ رضی اللہ عنہ کی وجہ سے اس کے لیے دو ہزار مقرر فرمائے۔ اور اس کی والدہ حضرت ام سلمہ رضی اللہ عنہا کی وجہ سے اس کے لیے ایک ہزار کا اضافہ کردیا پس اگر تیری والدہ بھی اس کی والدہ کی طرح ہوتی تو میں تیرے لیے بھی ایک ہزار کا اضافہ کردیتا۔ 7۔ اور آپ رضی اللہ عنہ نے مکہ والوں کے لیے اور دیگر لوگوں کے لیے آٹھ آٹھ سو مقرر فرمائے۔ پس حضرت طلحہ بن عبید اللہ رضی اللہ عنہاپنے بھائی عثمان کو لے کر آئے تو آپ رضی اللہ عنہ نے اس کے لیے آٹھ سو مقرر کیے۔ اور حضرت نضر بن انس رضی اللہ عنہاپ رضی اللہ عنہ کے پاس سے گزرے تو حضرت عمر رضی اللہ عنہ نے فرمایا: اس کے لیے دو ہزار مقرر کردو۔ اس پر حضرت طلحہ رضی اللہ عنہ نے فرمایا: میں آپ کے پاس اسی جیسا آدمی لے کر آیا تو آپ رضی اللہ عنہ نے اس کے لیے آٹھ سو درہم مقرر کیے اور اس کے لیے دو ہزار مقرر کردیے! آپ رضی اللہ عنہ نے فرمایا: بیشک اس کا باپ غزوہ احد کے دن مجھ سے ملا اور مجھ سے پوچھا: رسول اللہ صلی اللہ علیہ وسلم کا کیا ہوا؟ میں نے کہا: میرا یہی خیال ہے کہ آپ صلی اللہ علیہ وسلم شہید کردیے گئے ہیں۔ تو اس نے اپنی تلوار سونت لی اور اس کی نیام توڑ دی اور کہا: اگر رسول اللہ صلی اللہ علیہ وسلم شہید کردیے گئے ہیں تو بیشک اللہ زندہ ہے اسے موت نہیں آئے گی۔ پھر وہ لڑتے رہے یہاں تک کہ شہید ہوگئے۔ اور یہ دوسرا فلاں فلاں جگہ بکریاں چرا رہا تھا۔ حضرت عمر رضی اللہ عنہ اپنی خلافت کے آغاز سے اسی طرح عمل کرتے رہے یہاں تک کہ تئیسواں سال آگیا۔ اس سال آپ رضی اللہ عنہ نے حج کیا تو آپ رضی اللہ عنہ کو یہ بات پہنچی کہ لوگ کہہ رہے ہیں: اگر امیر المؤمنین کی وفات ہوگئی تو ہم فلاں کے پاس جا کر اس کی بیعت کرلیں گے، اگرچہ حضرت ابوبکر رضی اللہ عنہ کی بیعت اچانک ہوگئی تھی۔ آپ رضی اللہ عنہ نے ایام تشریق کے درمیانی دن میں خطاب کرنے کا ارادہ فرمایا تو حضرت عبد الرحمن بن عوف رضی اللہ عنہ نے آپ رضی اللہ عنہ سے کہا: اے امیر المؤمنین! یہ ایسی جگہ ہے جہاں عام اور بازاری لوگوں کا غلبہ ہے اور ان لوگوں کا جو آپ کی بات کو اس کے صحیح محمل پر نہیں رکھیں گے۔ لہٰذا آپ ہجرت اور ایمان کے گھر کی طرف لوٹ جائیں اور وہاں خطاب فرمائیں تاکہ آپ کی بات سنی جائے۔ چنانچہ آپ رضی اللہ عنہ جلدی سے مدینہ تشریف لائے اور لوگوں سے خطاب کرتے ہوئے فرمایا: اے لوگو! اما بعد! مجھے تم میں سے کسی کہنے والے کی یہ بات پہنچی ہے کہ اگر امیر المؤمنین کی وفات ہوگئی تو ہم فلاں کے پاس جا کر اس کی بیعت کرلیں گے، اگرچہ حضرت ابوبکر رضی اللہ عنہ کی بیعت اچانک ہوگئی تھی۔ اللہ کی قسم! وہ اچانک ہی تھی مگر اللہ نے ہمیں اس کے شر سے بچا لیا۔ اور ہم میں حضرت ابوبکر رضی اللہ عنہ جیسا کون ہے کہ ہم ان کی طرف اسی طرح گردنیں بڑھائیں جس طرح حضرت ابوبکر رضی اللہ عنہ کی طرف بڑھائی تھیں۔ یہ تو اپنے آپ کو قتل کے لیے پیش کرنا ہوگا۔ جو شخص مشورے کے بغیر مسلمانوں کے معاملات چھین لے اس کی کوئی بیعت نہیں۔ سنو! میں نے ایک خواب دیکھا ہے اور میرا خیال ہے کہ یہ میری موت کے قریب ہونے کی وجہ سے ہے۔ میں نے دیکھا کہ ایک مرغا میرے سامنے آیا اور اس نے مجھے تین ٹھونگیں ماریں۔ حضرت اسماء بنت عمیس رضی اللہ عنہا نے مجھے اس کی تعبیر بتائی اور کہا: آپ کو ان سرخ رو عجمیوں میں سے ایک آدمی قتل کرے گا۔ پس اگر میں مر جاؤں تو تمہارا معاملہ ان چھ حضرات کے سپرد ہے جن سے رسول اللہ صلی اللہ علیہ وسلم وفات کے وقت راضی تھے: حضرت عثمان، حضرت علی، حضرت طلحہ، حضرت زبیر، حضرت عبد الرحمن بن عوف اور حضرت سعد بن ابی وقاص رضی اللہ عنہم۔ اگر ان میں اختلاف ہو تو ان کا معاملہ حضرت علی رضی اللہ عنہ کے سپرد ہے۔ اور اگر میں زندہ رہا تو میں وصیت کروں گا۔ اور میں نے پھوپھی اور بھتیجی کے بارے میں غور کیا کہ ان کا کیا حق ہے، ان کا ورثہ لیا جاتا ہے اور وہ وارث نہیں ہوتیں۔ اور اگر میں زندہ رہا تو تمہارے لیے ایک ایسا معاملہ کھولوں گا جسے تم اختیار کرو گے اور اگر میں مر گیا تو تم اپنی رائے دیکھ لو گے۔ اور اللہ تم میں میرا خلیفہ ہے۔ میں نے تمہارے لیے دیوان مدون کیے، شہر آباد کیے، جار تک تمہارے لیے غلہ پہنچایا اور تمہیں واضح راستے پر چھوڑا۔ مجھے تم پر صرف دو آدمیوں کا خوف ہے: ایک وہ آدمی جو اس قرآن کی تاویل پر لڑے اور قتل ہوجائے، اور دوسرا وہ آدمی جو سمجھے کہ وہ اس مال کا اپنے بھائی سے زیادہ حق دار ہے اور اس پر لڑے یہاں تک کہ قتل ہوجائے۔ آپ رضی اللہ عنہ نے یہ خطبہ جمعہ کے دن دیا اور بدھ کے دن آپ رضی اللہ عنہ کو نیزہ مارا گیا۔ [مصنف ابن ابي شيبه/كتاب السير/حدیث: 35074]

حضرت قاسم بن عبد الرحمن رحمہ اللہ فرماتے ہیں کہ حضرت عبد اللہ بن مسعود رضی اللہ عنہ کی سالانہ تنخواہ چھ ہزار تھی۔ [مصنف ابن ابي شيبه/كتاب السير/حدیث: 35075]

حضرت مجاہد رحمہ اللہ فرماتے ہیں کہ حضرت عمر رضی اللہ عنہ نے بدری صحابہ رضی اللہ عنہ م کے لیے چھ چھ ہزار مقرر فرمائے۔ اور نبی کریم صلی اللہ علیہ وآلہ وسلم کی ازواج مطہرات کے لیے بھی اتنا اتنا حصہ مقرر فرمایا۔ [مصنف ابن ابي شيبه/كتاب السير/حدیث: 35076]

حضرت سالم بن ابی الجعد رحمہ اللہ فرماتے ہیں کہ حضرت عمر رضی اللہ عنہ نے حضرت سلمان رضی اللہ عنہ کا سالانہ عطیہ چھ ہزار مقرر فرمایا۔ [مصنف ابن ابي شيبه/كتاب السير/حدیث: 35077]

حضرت عبیدہ سلمانی رحمہ اللہ فرماتے ہیں کہ حضرت عمر رضی اللہ عنہ نے مجھ سے پوچھا: تمہاری کیا رائے ہے کہ ایک آدمی کے لیے کتنی تنخواہ کافی ہوگی؟ میں نے کہا: اتنی اور اتنی۔ آپ رضی اللہ عنہ نے فرمایا: اگر میں باقی رہا تو میں ضرور بالضرور ایک آدمی کی چار ہزار تنخواہ مقرر کروں گا۔ ایک ہزار اس کے ہتھیار کے لیے۔ ایک ہزار اس کے خرچہ کے لیے۔ اور ایک ہزار کو وہ گھر میں استعمال کرے۔ اور ایک ہزار اس اس چیز کے لیے۔ راوی کہتے ہیں کہ میرا خیال ہے کہ آپ رضی اللہ عنہ نے گھوڑے کا ذکر فرمایا۔ [مصنف ابن ابي شيبه/كتاب السير/حدیث: 35078]

حضرت اسود بن قیس رحمہ اللہ اپنے ایک شیخ سے نقل کرتے ہیں کہ انہوں نے فرمایا: کہ میں نے حضرت عمر بن خطاب رضی اللہ عنہ کو یوں فرماتے ہوئے سنا: اگر میں آئندہ سال تک زندہ رہا تو میں مہاجرین کے کم درجہ کے لوگوں کے لیے ضرور بالضرور دو ہزار دوں گا۔ [مصنف ابن ابي شيبه/كتاب السير/حدیث: 35079]

حضرت اسلم رحمہ اللہ فرماتے ہیں کہ میں نے حضرت عمر بن خطاب رضی اللہ عنہ کو یوں فرماتے ہوئے سنا: کہ اگر میں آئندہ سال تک زندہ رہا تو میں آخر والے لوگوں کو ضرور بالضرور پہلے والے لوگوں کے تابع کروں گا، اور میں ان سب کو برابر کر دوں گا۔ [مصنف ابن ابي شيبه/كتاب السير/حدیث: 35080]