حضرت علی بن ثابت رحمہ اللہ فرماتے ہیں کہ میں نے حضرت مکحول اور حضرت عطا سے دریافت کیا کہ امام اگر وہ سارا مال تقسیم کر دے جو ان کو غنیمت میں ملا ہے تو کیا حکم ہے؟ فرمایا (کوئی نہیں) وہ انہی کے لیے ہے۔ [مصنف ابن ابي شيبه/كتاب السير/حدیث: 35461]

حضرت زھری رحمہ اللہ سے دریافت کیا گیا کہ امیر اگر لشکر کو اجازت دے دے اور وہ اپنی مرضی کی چیزیں اٹھالیں تو کیا حکم ہے؟ آپ نے اس کو ناپسند فرمایا۔ [مصنف ابن ابي شيبه/كتاب السير/حدیث: 35462]

حضرت عمران بن حصین رضی اللہ عنہ سے مروی ہے کہ آنحضرت صلی اللہ علیہ وسلم نے بنو عقیل کے ایک مشرک کے بدلے دو مسلمانوں کا فدیہ قرار دیا۔ [مصنف ابن ابي شيبه/كتاب السير/حدیث: 35463]

حضرت سلمہ بن اکوع رضی اللہ عنہ فرماتے ہیں کہ ہم نبی کریم صلی اللہ علیہ وسلم کے دور میں حضرت صدیق اکبر رضی اللہ عنہ کے ساتھ ھوازن کے علاقہ میں جہاد کیلئے گئے، مجھے بنی فزارہ کی لونڈی حصہ میں ملی، جو کہ حسین عرب خاتون تھیں، اس پر موٹا زائد لباس تھا، میں نے مدینہ پہنچنے تک اس کا کپڑا نہیں کھولا، بازار میں نبی کریم صلی اللہ علیہ وسلم کی ہم سے ملا قات ہوئی، آپ صلی اللہ علیہ وسلم نے ارشاد فرمایا: تمہارے والد کی خوبی اللہ کیلئے ہی ہے، اس کو مجھے ھبہ کہ دو، حضرت سلمہ فرماتے ہیں کہ میں نے آپ کو ھبہ کردی، راوی رضی اللہ عنہ فرماتے ہیں کہ: آنحضرت صلی اللہ علیہ وسلم نے وہ باندی مکہ میں جو مسلمان تھے ان کے فدیہ کے واسطے بھیج دی۔ [مصنف ابن ابي شيبه/كتاب السير/حدیث: 35464]

حضرت حسن رحمہ اللہ اور حضرت عطاء رحمہ اللہ فرماتے ہیں کہ مشرکین کے قیدیوں پر احسان کر کے آزاد کردیا جائے یا پھر فدیہ وصول لیا جائے۔ [مصنف ابن ابي شيبه/كتاب السير/حدیث: 35465]

حضرت ابو الجویریہ اور حضرت عاصم بن کلیب رحمہما اللہ سے مروی ہے کہ: حضرت عمر بن عبدالعزیز نے مسلمانوں میں سے قبیلہ جرم کے ایک شخص کا اھل حرب سے ایک لاکھ کے بدلے فدیہ دیا۔ [مصنف ابن ابي شيبه/كتاب السير/حدیث: 35466]

حضرت حماد فرماتے ہیں کہ اگر دشمن میں سے باندی یا غلام قید کر لیے جائیں تو کوئی حرج نہیں کہ ان کا فدیہ کر لیا جائے۔ [مصنف ابن ابي شيبه/كتاب السير/حدیث: 35467]

حضرت شعبی رحمہ اللہ قیدیوں کے متعلق فرماتے ہیں کہ ان پر احسان کر کے یا فدیہ لے کر آزاد کردیا جائے۔ [مصنف ابن ابي شيبه/كتاب السير/حدیث: 35468]

حضرت عبد اللہ رضی اللہ عنہ سے مروی ہے کہ بدر والے دن نبی کریم صلی اللہ علیہ وسلم نے ارشاد فرمایا ان قیدیوں کے بارے میں تمہاری کیا رائے ہے؟ پھر فرمایا: ان میں سے کسی کو بھی آزاد نہ کیا جائے گا مگر فدیہ لے کر یا پھر اس کو قتل کردیا جائے۔ [مصنف ابن ابي شيبه/كتاب السير/حدیث: 35469]

حضرت ابن عباس رضی اللہ عنہما سے مروی ہے کہ آنحضرت صلی اللہ علیہ وسلم نے مہاجرین اور انصار کو لکھا کہ ان کے قتل کے معاملہ میں دیت دیں، اور اپنے قیدیوں کا اچھے طریقہ سے فدیہ ادا کریں اور مسلمانوں کے درمیان (معاملات کی) اصلاح کی جائے گی۔ [مصنف ابن ابي شيبه/كتاب السير/حدیث: 35470]