حضرت عمر رضی اللہ عنہارشاد فرماتے ہیں کہ مسلمانوں کا جو بھی قیدی کافروں کے قبضہ میں ہو پھر اس کا فدیہ مسلمانوں کا بیت المال ادا کرے گا۔ [مصنف ابن ابي شيبه/كتاب السير/حدیث: 35481]

حضرت بشر بن غالب سے مروی ہے کہ حضرت ابن زبیر رضی اللہ عنہما نے حضرت حسین بن علی رضی اللہ عنہ سے دریافت کیا کہ ایک شخص اھل ذمہ کی طرف سے لڑتا ہوا گرفتار ہوجائے؟ فرمایا جن کی طرف سے وہ لڑا ہے انہی کے خراج میں سے اس کا فدیہ ادا کیا جائے گا۔ [مصنف ابن ابي شيبه/كتاب السير/حدیث: 35482]

حضرت ابراہیم فرماتے ہیں کہ اھل العہد (ذمی) کو مشرکین قید کرلیں پھر مسلمان ان پر غالب آجائیں تو وہ غلام نہیں بنائے جائیں گے۔ [مصنف ابن ابي شيبه/كتاب السير/حدیث: 35483]

حضرت عکرمہ رحمہ اللہ فرماتے ہیں غلام اور معاھد کا فدیہ نہ دیا جائے گا۔ [مصنف ابن ابي شيبه/كتاب السير/حدیث: 35484]

حضرت عطاء قیدیوں کے قتل کرنے کو ناپسند فرماتے تھے۔ [مصنف ابن ابي شيبه/كتاب السير/حدیث: 35485]

حضرت عطاء فرماتے تھے کہ قیدی کو قتل مت کرو۔ [مصنف ابن ابي شيبه/كتاب السير/حدیث: 35486]

حضرت حسن رحمہ اللہ قیدی کے قتل کرنے کو ناپسند فرماتے تھے۔ [مصنف ابن ابي شيبه/كتاب السير/حدیث: 35487]

حضرت ابو جعفر رحمہ اللہ سے مروی ہے کہ جنگ صفین کے دن جب حضرت علی رضی اللہ عنہ کی خدمت میں قیدی لایا جاتا تو آپ اس کا اسلحہ اور سواری ضبط فرما لیتے اور اس سے دوبارہ نہ لڑنے کا عہد لے کر اس کو رہا فرما دیتے۔ [مصنف ابن ابي شيبه/كتاب السير/حدیث: 35488]

حضرت ابی فاختہ سے مروی ہے کہ مجھے میرے پڑوسی نے بتایا کہ جنگ صفین کے دن میں ایک قیدی کو لے کر حضرت علی رضی اللہ عنہ کی خدمت میں حاضر ہوا۔ حضرت علی رضی اللہ عنہ نے فرمایا: میں تجھے باندھ کر قتل نہ کروں گا، میں اللہ رب العالمین سے ڈرتا ہوں۔ [مصنف ابن ابي شيبه/كتاب السير/حدیث: 35489]

حسن سے مروی ہے کہ حجاج کے پاس قیدی لایا گیا حجاج نے حضرت عبد اللہ بن عمر رضی اللہ عنہما سے کہا کھڑے ہوجاؤ اور اس کو قتل کردو، حضرت ابن عمر رضی اللہ عنہما نے ارشاد فرمایا: ہمیں اس کا حکم نہیں دیا گیا، اللہ تعالیٰ فرماتے ہیں کہ: { حَتَّی إِذَا أَثْخَنْتُمُوہُمْ فَشُدُّوا الْوَثَاقَ فَإِمَّا مَنًّا بَعْدُ وَإِمَّا فِدَائً }۔ [مصنف ابن ابي شيبه/كتاب السير/حدیث: 35490]